އަންތާލިޔާ ލީޑާރސް ސަމިޓުގައި ރައީސުލްޖުމްހޫރިއްޔާގެ ދެކަނބަލުން ބައިވެރިވެވަޑައިގެންފި

ތުރުކީވިލާތުގައި ކުރިއަށްދާ "އަންތާލިޔާ ލީޑަރސް ސަމިޓް" ގެ ފެށުމުގެ ރަސްމިއްޔާތުގައި ރައީސް ޑރ. މުހައްމަދު މުއިއްޒު އާއި އެމަނިކުފާނުގެ އަނބިކަނބަލުން ސާޖިދާ މުހައްމަދު ބައިވެރިވެވަޑައިގެންފިއެވެ.

މި ރަސްމިއްޔާތު ކުރިއަށްދަނީ ތުރުކީގެ އަންތާލިޔާގައެވެ.ރައީސުލްޖުމްހޫރިއްޔާގެ ދެކަނބަލުން މިވަގުތު ތުރުކީވިލާތުގެ އަންތާލިޔާއަށް ކުރައްވަމުންދާ ދަތުރުފުޅަކީ، އދ. ގެ ގައުމުތަކުގެ މޫސުމީ ބަދަލުތަކާ ބެހޭ އިދާރާ އިން އިންތިޒާމުކޮށްގެން ބާއްވާ 31 ވަނަ ކޮންފަރެންސް އޮފް ދަ ޕާޓީސް (ކޮޕް31) ގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ. މި ކޮންފަރެންސް ކުރިއަށްދަނީ 2026 ނޮވެމްބަރު 10 އިން 14 އަށެވެ.

ސަމިޓުގެ ފެށުމުގެ ރަސްމިއްޔާތަށްފަހު، ރައީސުލްޖުމްހޫރިއްޔާ ވަނީ، ގައުމުތަކުގެ އިސްވެރިންނާއި ސަރުކާރުތަކުގެ ވެރިންނާއެކު ނެންގެވި ރަސްމީ އާއިލީ ފޮޓޯގައި ބައިވެރިވެވަޑައިގެންފައެވެ.

"ޓުވާޑްސް އަ ސަސްޓެއިނަބަލް، ރެސިލިއެންޓް، އެންޑް އިކުއިޓިބަލް ފިއުޗާ" މި ޝިއާރުގެ ދަށުން ބާއްވާ މި ސަމިޓަކީ މޫސުމީ ބަދަލުތަކާ ދެކޮޅަށް ކުރެވޭ މަސައްކަތްތަކުގެ ތެރެއިން އެއްބާރުލުން އިތުރަށް ވަރުގަދަކުރުމަށް ދުނިޔޭގެ ލީޑަރުން ބައްދަލުކުރާ ފޯރަމެކެވެ. މި ސަމިޓުގައި މައިގަނޑު ގޮތެއްގައި އަލިއަޅުވާލާ ދާއިރާތަކުގެ ތެރޭގައި ސާފު ހަކަތައަށް ބަދަލުވުމާއި، އަމަލީ ފެންވަރުގައި ކަރަންޓުގެ ހިދުމަތް ފުޅާކުރުމާއި، މޫސުމީ މާލީ އެހީތެރިކަން އަދި އަރބަން ސަރަހައްދުތައް މޫސުމީ ބަދަލުތަކަށް ހޭނުވުން ހިމެނެއެވެ.

ރައީސުލްޖުމްހޫރިއްޔާގެ މި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީ ފެންވަރުގެ ވަފުދެއް ބައިވެރިވެވަޑައިގަންނަވައެވެ.