ޓެރަރިޒަމާ ދެކޮޅަށް މަސައްކަތްކުރުމާ ބެހޭ ގޮތުން އިންޑިއާ އާއި އިންޑޮނީޝިއާއިން މަޝްވަރާކޮށްފި

ޓެރަރިޒަމާ ދެކޮޅަށް މަސައްކަތްކުރުމާ ބެހޭ އިންޑިއާ-އިންޑޮނޭޝިއާ ޖޮއިންޓް ވަރކިންގ ގްރޫޕްގެ 7 ވަނަ ބައްދަލުވުން އިންޑިއާގެ ވެރިރަށް ނިއުދިއްލީގައި ބާއްވައިފިއެވެ.

އިންޑިއާގެ އެކްސްޓަރނަލް އެފެއާޒް މިނިސްޓްރީން ބުނީ މިމަހުގެ 12 ވަނަ ދުވަހު ބޭއްވި މި ބައްދަލުވުމުގެ ރިޔާސަތު ބެލެހެއްޓެވީ އިންޑިއާގެ އެކްސްޓަރނަލް އެފެއާޒް މިނިސްޓްރީގެ ކައުންޓަރ ޓެރަރިޒަމާ ބެހޭ އެޑިޝަނަލް ސެކްރެޓަރީ ޑރ. ސުހެއިލް އަޖާޒް ޚާން އާއި، އިންޑޮނޭޝިއާގެ ނޭޝަނަލް ކައުންޓަރ ޓެރަރިޒަމް އެޖެންސީ (ބީ.އެން.ޕީ.ޓީ) ގެ ޑެޕިއުޓީ ފޮރ އިންޓަނޭޝަނަލް ކޯޕަރޭޝަން މިސްޓަރ ޑިއޮނިސިއަސް އެލްވަން ސްވަސޯނޯ ކަމަށެވެ. މި ބައްދަލުވުމުގައި ދެ ޤައުމުގެ ކަމާބެހޭ އެކި އިދާރާތަކުގެ މަންދޫބުން ބައިވެރިވެވަޑައިގެންނެވިއެވެ.

ޓެރަރިޒަމް ހުއްޓުވުމަށާއި އެކަމާ ދެކޮޅަށް މަސައްކަތްކުރުމުގައި ދެ ޤައުމުގެ ގުޅުން އިތުރަށް ބަދަހިކުރުމުގެ މުހިންމުކަން މި ބައްދަލުވުމުގައި ފާހަގަކުރެވުނެވެ. އަދި ޓެރަރިޒަމްގެ ހުރިހާ ބާވަތަކާއި ސިފަތަކެއް ހަރުކަށި އިބާރާތުން ކުށްވެރިކޮށް، ޓެރަރިޒަމަށް އެއްވެސް ފުރުޞަތެއް ނުދިނުމުގެ އުސޫލު ދެ ޤައުމުން ވަނީ އަލުން ކަށަވަރުކޮށްދީފައެވެ. މީގެ އިތުރުން، ޓެރަރިޒަމާ ދެކޮޅަށް ދެމެހެއްޓެނިވި ގޮތެއްގައި ބައިނަލްއަޤްވާމީ ފެންވަރުގައި ހަރުދަނާ ފިޔަވަޅުތަކެއް އެޅުމަށް ދެ ގައުމުންވެސް ވަނީ ގޮވާލާފައެވެ.

މި ބައްދަލުވުމުގައި، ދެ ޤައުމުގައާއި، ސަރަޙައްދީ އަދި ބައިނަލްއަޤްވާމީ ފެންވަރުގައި ޓެރަރިޒަމްގެ ނުރައްކާ އޮތް މިންވަރާއި، ބޯޑަރު ހުރަސްކޮށް ހިންގާ ޓެރަރިޒަމްގެ ޢަމަލުތަކާ ގުޅޭގޮތުން ދެ ފަރާތުން މަޝްވަރާކުރިއެވެ. އަދި ހަރުކަށި ފިކުރު ފެތުރުން ހުއްޓުވުމާއި، ޓެރަރިޒަމަށް ޚަރަދުކުރުން ހުއްޓުވުމާއި، ޓެރަރިސްޓް ބޭނުންތަކަށް އިންޓަނެޓާއި ޒަމާނީ އައު ޓެކްނޮލޮޖީތައް ނަހަމަ ގޮތުގައި ބޭނުންކުރުން ހުއްޓުވުމުގެ އިތުރުން، އިންތިޒާމުވެގެން ހިންގާ ބޮޑެތި ކުށްތަކާއި ޓެރަރިޒަމާ ހުރި ގުޅުން ފަދަ، ޒަމާނީ ގޮންޖެހުންތަކާ މެދު ޚިޔާލު ބަދަލުކުރެވުނެވެ.

ޓެރަރިޒަމާ ދެކޮޅަށް ފުރިހަމަ އަދި ދެމެހެއްޓެނިވި ގޮތެއްގައި މަސައްކަތްކުރުމަށް ބައިނަލްއަޤްވާމީ އެއްބާރުލުން އިތުރުކުރުމުގެ މުހިންމުކަން ދެގައުމުންވެސް ފާހަގަކުރިއެވެ. އެގޮތުން އދ، އާސިއާން، ބްރިކްސް އަދި އެފް.އޭ.ޓީ.އެފް ފަދަ ބައިނަލްއަޤްވާމީ ޖަމާޢަތްތަކުގެ ތެރެއިން ގުޅިގެން މަސައްކަތްކުރުމަށް ދެގައުމުން އެއްބަސްވިއެވެ.

ޓެރަރިޒަމާ ދެކޮޅަށް ކުރިއަށްގެންދާ މި އެއްބާރުލުމަކީ އިންޑިއާ އާއި އިންޑޮނޭޝިއާގެ "ކޮމްޕްރިހެންސިވް ސްޓްރެޓެޖިކް ޕާޓްނަރޝިޕް" ގެ ވަރަށް މުހިންމު ބައެކެވެ.

މި ދަތުރުފުޅުގެ ތެރެއިން، ޤާބިލުކަން އިތުރުކުރުމުގެ ދާއިރާއިން ދެ ޤައުމުގެ މެދުގައި ގުޅުން ބަދަހިކުރުމާ ބެހޭގޮތުން މަޝްވަރާކުރުމަށްޓަކައި އިންޑޮނޭޝިއާގެ ވަފުދު އިއްޔެ އިންޑިއާގެ ނޭޝަނަލް ސެކިއުރިޓީ ގާޑްގެ މައި މަރުކަޒަށް ޒިޔާރަތްކުރިއެވެ.

ޖޮއިންޓް ވަރކިންގ ގްރޫޕްގެ ދެން އޮންނަ ބައްދަލުވުން، ދެ ގައުމަށް އެއްބަސްވެވޭ ތާރީޚެއްގައި އިންޑޮނޭޝިއާގެ ވެރިރަށް ޖަކާޓާގައި ބޭއްވުމަށް ދެ ޤައުމުން ވަނީ އެއްބަސްވެފައެވެ.