ފައިނޭންސް ފޯރަމާއެކު ނޫ އިޤްތިޞާދަށް އިންވެސްޓްމަންޓްތައް ހޯދުމުގެ ފުރުސަތުތައް ފަހިވެގެންދާނެ: ޔަޒްމީދު

މޫސުމީ ބަދަލުތަކާ ގުޅިގެން ކުރިމަތިވާ ނުރައްކާތައް ކުޑަކުރުމަށާއި، ރާއްޖޭގެ ކަނޑުގެ އިޤްތިޞާދު ނުވަތަ 'ބްލޫ އިކޮނޮމީ' ކުރިއެރުވުމަށްޓަކައި ބޭނުންވާ އިންވެސްޓްމަންޓްތައް ހޯދުމަށް ފައިނޭންސް ފޯރަމުން މަގުފަހިވެގެންދާނެ ކަމަށް ޕެންޝަން އޮފީހުގެ ސީ.އީ.އޯ މުޙައްމަދު ޔަޒްމީދު ވިދާޅުވެއްޖެއެވެ.

މިއަހަރުގެ މޯލްޑިވްސް ފައިނޭންސް ފޯރަމް ހުޅުވުމުގެ ރަސްމިއްޔާތުގައި ވާހަކަދައްކަވަމުން ޔަޒްމީދު ވިދާޅުވީ، ރާއްޖޭގެ ތިމާވެށީގެ ދެމެހެއްޓެނިވިކަމާއި މާލީ ހަމަޖެހުމާ ދެމެދު އޮތްގުޅުން ވަރަށް ބޮޑުކަމަށެވެ. ރާއްޖޭގެ ރަށްތަކަކީ ތިރި ޖަޒީރާ ރަށްތަކެއްކަން ފާހަގަކުރައްވަމުން، މޫސުމީ ބަދަލުތަކުގެ ސަބަބުން ކުރިމަތިވާ ލޮޅުންތަކުގެ އަސަރު އާއިލާތަކުގެ އާމްދަނީއަށާއި މުޅި އިޤްތިޞާދަށް ކުރާނެ ކަމަށް އޭނާ ފާހަގަކުރެއްވިއެވެ.

ޕެންޝަން ފަންޑުގެ އިންވެސްޓްމަންޓްތަކާ ގުޅޭގޮތުން ވާހަކަދައްކަވަމުން އޭނާ ވިދާޅުވީ، ފަންޑުގެ ނެޓް އެސެޓް މިހާރު 30 ބިލިއަން ރުފިޔާއަށްވުރެ މައްޗަށް ގޮސްފައިވާއިރު، މުސްތަޤުބަލުގެ ޖީލުތަކުގެ މާލީ ރައްކާތެރިކަން ކަށަވަރުކުރުމަކީ އެ އޮފީހުގެ އެންމެ ބޮޑު މަސްއޫލިއްޔަތު ކަމަށެވެ. އެގޮތުން، ތިމާވެއްޓާ ރައްޓެހި ނުވަތަ 'ގްރީން ފައިނޭންސް' މަޝްރޫޢުތަކަށް އިންވެސްޓްކުރުމުގައި މާލީ ހަރުދަނާކަމާއި ހާމަކަން ބޮޑު މިންގަނޑުތަކަކަށް އަމަލުކުރާނެ ކަމުގެ ޔަގީންކަން އޭނާ ދެއްވިއެވެ.

މީގެ އިތުރުން، އިންވެސްޓަރުންގެ އިތުބާރު ހޯދުމަށްޓަކައި ހަރުދަނާ ގަވާއިދުތަކާއި، ދެމެހެއްޓެނިވި ރިޕޯޓިންގ އުސޫލުތައް ބޭނުންވާ ކަމަށާއި، ހަމައެކަނި ސިޔާސަތުތަކަކުން ނުފުދޭނެ ކަމަށް ޔަޒްމީދު ވިދާޅުވިއެވެ. އޭނާ ފާހަގަކުރެއްވި ގޮތުގައި، މިހާރު އޮތް ފުރުސަތުތަކަކީ އިންވެސްޓް ކުރެވޭ ފަދަ އަމަލީ މަޝްރޫޢުތަކަކަށް ބަދަލުކުރުމަށް ސަރުކާރާއި މާލީ އިދާރާތައް ގުޅިގެން މަސައްކަތް ކުރަންޖެހެއެވެ.

މިއަހަރުގެ ފައިނޭންސް ފޯރަމްގައި ދައުލަތުގެ މުއައްސަސާތަކާއި، ބޭންކުތަކުގެ އިތުރުން މާލީ ދާއިރާގެ ގިނަ އަދަދެއްގެ ތަޖުރިބާކާރުން ބައިވެރިވެވަޑައިގަންނަވައެވެ.