ހުއްދަ ދީފައިވާ ތަންތަން ފިޔަވައި އެހެން ތަންތަނަށް އެއްނުވުމަށް ފުލުހުން އަންގައިފި
ކުރިން އެންގުމަކާ ނުލައި އެއްވުމަށް ހުއްދަ ދީފައިވާ ތަންތަން ފިޔަވައި އެހެން ތަންތަނަށް އެއްނުވުމަށާއި، ގާނޫނީ އިމުގެ ތެރޭގައި އެއްވުންތައް ބޭއްވުމަށް ދިވެހި ފުލުހުންގެ ޚިދުމަތުން އަންގައިފިއެވެ.
ފުލުހުން މިފަދައިން އެންގީ ރަސްމާލެ ތަރައްގީ ކުރުމުގެ މަޝްރޫއުގެ ތެރެއިން އެތަން އީގަލްސް ހިލްސް ކުންފުންޏަށް 99 އަހަރަށް ކުއްޔަށް ދޭ މައްސަލައިގައި ކަންބޮޑުވުން ފާޅުކޮށް، "ދިވެހީންގެ ބިން ދިވެހިންނަށް" މި ނަމުގައި އިދިކޮޅު ފަރާތްތަކުން މިރޭ މާލޭގައި އެއްވުމެއް ބޭއްވުމަށް ތައްޔާރުވަމުންދާތީ އެކަމާ ގުޅިގެން ނެރުނު ބަޔާނެއްގައެވެ.
ދިވެހި ފުލުހުންގެ ޚިދުމަތުން ނެރުނު ބަޔާނުގައި ބުނީ، މިރޭ މާލޭގައި ބޭއްވުމަށް ރާވަމުންދާ އެއްވުމުގައި ބައިވެރިވާ ފަރާތްތަކުގެ ސަލާމަތާއި ރައްކާތެރިކަމާ ގުޅޭގޮތުންނާއި، އަދި އާންމު ދަތުރުފަތުރަށާއި ހިނގާބިނގާވެ އުޅޭ ފަރާތްތަކަށް ދިމާވެދާނެ ދަތިތަކާ ގުޅޭގޮތުން އެއްވެސް ފަރާތަކުން ފުލުހުންނާ އެއްވެސް މައުލޫމާތެއް މިހާތަނަށް ހިއްސާކޮށްފައި ނުވާ ކަމަށެވެ.
ވުމާއެކު، ކުރިން އެންގުމަކާ ނުލައި އެއްވުމަށް ކަނޑައަޅައި ހުއްދަ ކޮށްފައިވާ ތަންތަން ފިޔަވައި އެހެން ތަންތަނަށް އެއްނުވުމަށާއި، އެ އެއްވުން ގާނޫނީ އިމުގެ ތެރެއިން ބޭއްވުމަށް އެއްވުން އިންތިޒާމު ކުރާ ފަރާތްތަކަށް ފުލުހުން ވަނީ އަންގާފައެވެ.
ފުލުހުން އިތުރަށް ބުނި ގޮތުގައި، މިފަދަ އެއްވުންތަކުގެ ސަބަބުން މަގުތަކުގެ އާންމު ދަތުރުފަތުރަށާއި ހިނގާބިނގާވެ އުޅޭ ރައްޔިތުންނަށް އެކި ކަހަލަ ދަތިތަކާ ކުރިމަތިލާން ޖެހެއެވެ. އެހެންކަމުން، އެއްވެސް ފަރާތަކަށް ދަތިނުވާނޭހެން އަދި ގާނޫނީ އިމުގެ ތެރެއިން ހުރިހާ ކަމެއް އިންތިޒާމު ކުރުމަށް ފުލުހުން ވަނީ އިލްތިމާސްކޮށް ނަސޭހަތްތެރިވެފައެވެ.
މީގެއިތުރުން، އެއްވުމުގެ ތެރެއިން ގާނޫނާއި ގަވާއިދާ ޚިލާފު އެއްވެސް އަމަލެއް ހިންގައިފިނަމަ، އެފަދަ ކަންކަން ވަގުތުން ހުއްޓުވައި، ގާނޫނީ ފިޔަވަޅު އަޅާނެކަމުގެ އިންޒާރުވެސް ފުލުހުންގެ ބަޔާނުގައި ވަނީ ދީފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
