މިދިޔަ ހަފުތާގައި ހިމަބިއްސަށް ފައްސިވީ އެންމެ މީހެއް: އެޗްޕީއޭ

ވޭތުވެދިޔަ ހަފުތާގައި މުޅި ރާއްޖެއިން ހިމަބިއްސަށް (މީސަލްސް) ފައްސިވީ އެންމެ މީހެއް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.

އެޗްޕީއޭއިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މިދިޔަ ހަފުތާގައި ފެނުނު ކޭހާއެކު، މިއަހަރުގެ މިހާތަނަށް ރާއްޖެއިން މި ބައްޔަށް ފައްސިވި މީހުންގެ ޖުމްލަ އަދަދު ވަނީ 291 އަށް އަރާފައެވެ.

ރާއްޖެއަކީ ހިމަބިހި އެއްކޮށް ނައްތާލެވިފައިވާ ގައުމެއްގެ ގޮތުގައި ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން ރަސްމީކޮށް ކަނޑައަޅައި، ބަލައިގެންފައިވަނީ 2017 ވަނަ އަހަރުގައެވެ.

ނަމަވެސް، މިއަހަރުގެ މެއި މަހުގެ ތެރޭގައި ރާއްޖޭގައި އަނެއްކާވެސް މި ބަލި ފެތުރެން ފެށިއެވެ. ބަލި ފެތުރެން ފެށި ދުވަސްވަރު ކޮންމެ ހަފުތާއަކުވެސް ގިނަ އަދަދެއްގެ މީހުން މި ބައްޔަށް ފައްސިވަމުން ދިޔަ ނަމަވެސް، އެޅުނު ރައްކާތެރިކަމުގެ ފިޔަވަޅުތަކާއެކު މިހާރު މި ބަލި ޖެހޭ މީހުންގެ އަދަދު ވަނީ ވަރަށް ބޮޑަށް ދަށްކުރެވިފައެވެ.

ހިމަބިހި ކޮންޓްރޯލް ކުރުމަށްޓަކައި އެޗްޕީއޭއިން ދަނީ ހިމަބިހިން ރައްކާތެރިވުމަށް ޖަހާ "އެމްއާރު" ވެކްސިން ޖެހުމުގެ ހާއްސަ މަސައްކަތްތަކެއް މުވައްޒަފުން މެދުވެރިކޮށް ކުރިއަށް ގެންދަމުންނެވެ. މިގޮތުން، މި އަހަރުގެ މިހާތަނަށް 17،524 މީހަކަށް އެމްއާރު ވެކްސިން ދީފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކައެވެ.

ސިއްހީ އިދާރާތަކުން އިލްތިމާސްކުރަނީ، ވެކްސިންގެ ޑޯޒްތައް ފުރިހަމަނުވާ ފަރާތްތަކުން ވީ އެންމެ އަވަހަކަށް ވެކްސިން ފުރިހަމަކުރުމަށާއި، ބަލީގެ އެއްވެސް އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަށެވެ.