އެމެރިކާގެ ބާޒާރުގައި އިންޑިއާގެ ފޭރާމުގެ ވިޔަފާރި ދަށަށް

އެމެރިކާގެ ބާޒާރުގައި އިންޑިއާގެ ފޭރާން އުފައްދާ ސިނާއަތަށް ބޮޑެތި ގޮންޖެހުންތަކަކާއި ގެއްލުންތަކަކާ ކުރިމަތިލާން ޖެހިއްޖެއެވެ.

އެމެރިކާއިން އިމްޕޯޓް ޑިއުޓީ ބޮޑުކުރުމާއި، ދެ ގައުމުގެ ދެމެދުގައި އޮތް ވިޔަފާރީގެ ގުޅުންތަކަށް އައި ބަދަލުތަކާ ގުޅިގެން، އިންޑިއާގެ ފޭރާން އުފައްދާ ކުންފުނިތަކުން މިހާރު ދަނީ އެމެރިކާގެ ބާޒާރަށް ބަރޯސާވުން މަދުކޮށް، ޔޫރަޕާއި އިނގިރޭސިވިލާތުގެ ބާޒާރުތަކަށް ކަމަށް ރިޕޯޓްތައް ބުނެއެވެ.

އިންޑިއާގެ މަޝްހޫރު ފޭރާން އުފައްދާ ކުންފުންޏެއް ކަމަށްވާ "އޮރިއެންޓް ކްރާފްޓް" ގެ ވެރިޔާ ސުދީރު ދިންގްރާއިން ބުނެފައިވަނީ އެމެރިކާއިން ޑިއުޓީ ބޮޑުކުރުމާ ގުޅިގެން އެ ގައުމުގެ ވިޔަފާރިވެރިން ވަނީ ކުރިން ދީފައިވާ ގިނަ އޯޑަރުތައް ކެންސަލްކޮށް، ބޮޑެތި ޑިސްކައުންޓްތަކަށް އެދެން ފަށާފައިވާކަމަށެވެ. މި ސަބަބާހުރެ، ކުރިން އެ ކުންފުނީގެ އުފެއްދުންތަކުގެ 84 އިންސައްތަ އެމެރިކާއަށް އެކްސްޕޯޓް ކުރި ނަމަވެސް، މިހާރު އެ އަދަދު ވަނީ 10 އިންސައްތައަށް ވުރެ ދަށަށް ގޮސްފައެވެ. އެހެންކަމުން، މިހާރު އެ ކުންފުނިން މައިގަނޑު ގޮތެއްގައި އުފައްދަނީ އިނގިރޭސިވިލާތުގެ މަޝްހޫރު ބްރޭންޑްތައް ކަމަށްވާ "ނެކްސްޓް" އަދި "މާކްސް އެންޑް ސްޕެންސަރ" ފަދަ ކުންފުނިތަކަށެވެ.

މީގެ އިތުރުން، 53،000 އަށް ވުރެ ގިނަ މުވައްޒަފުން މަސައްކަތްކުރާ ބޮޑު ކުންފުންޏެއް ކަމަށްވާ "ގޯކަލްދާސް އެކްސްޕޯޓްސް" އިން ވެސް މިހާރު ދަނީ ޔޫރަޕްގެ މާކެޓަށް ހާއްސަ ސަމާލުކަމެއް ދެމުންނެވެ. އެ ކުންފުނީގެ މެނޭޖިންގ ޑިރެކްޓަރ ބައެއް މީޑިއާތަކަށް މައުލޫމާތު ހިއްސާކުރަމުން ވިދާޅުވީ، ކުރިއަށް އޮތް 3 އަހަރާއި 5 އަހަރާ ދެމެދު އެ ކުންފުނިން ޔޫރަޕަށް ކުރާ އެކްސްޕޯޓް 25 އިންސައްތައާއި 30 އިންސައްތައާ ދެމެދުގެ މިންވަރަކަށް އިތުރުކުރުމަށް އަމާޒު ހިފާފައިވާ ކަމަށެވެ.

ފަހުގެ ތަފާސްހިސާބުތަކުން ދައްކާ ގޮތުގައި، މި އަހަރުގެ އޭޕްރީލް މަހުން ފެށިގެން އޮގަސްޓް މަހުގެ ނިޔަލަށް އިންޑިއާއިން އެމެރިކާއަށް އެކްސްޕޯޓްކުރި ފޭރާމުގެ މިންވަރު ވަނީ 9.8 އިންސައްތަ ދަށަށް ގޮސްފައެވެ. ނަމަވެސް، މީގެ ބަދަލުގައި އެހެނިހެން ޤައުމުތަކަށް ކުރި އެކްސްޕޯޓް ވަނީ 3.7 އިންސައްތަ އިތުރުވެފައެވެ. ހާއްސަކޮށް، އިންޑިއާ އާއި އިނގިރޭސިވިލާތާ ދެމެދު ވެވުނު މިނިވަން ވިޔަފާރީގެ އެއްބަސްވުމުގެ ދަށުން ޑިއުޓީއަކާ ނުލައި މުދާ އެތެރެކުރެވޭ ގޮތް ހަމަޖެހިގެން ދިޔުމަކީ އިންޑިއާގެ ވިޔަފާރިވެރިންނަށް ލިބުނު ވަރަށް ބޮޑު ކުރިއެރުމެކެވެ.

މި ގޮންޖެހުންތަކާއެކު، އުފެއްދުންތެރިކަމުގެ ހަރަދު ކުޑަކުރުމަށްޓަކައި އިންޑިއާގެ ކުންފުނިތަކުން ދަނީ އެ ގައުމުގެ އެތެރޭގައި ހަރަދު ކުޑަ ސަރަހައްދުތަކަށް ފެކްޓްރީތައް ބަދަލުކުރުމުގެ މަސައްކަތް ވެސް ކުރަމުންނެވެ. މިގޮތުން ޖާރްކަންދު ސްޓޭޓްގެ ރާންޗީ ފަދަ ސަރަހައްދުތައް ފާހަގަކޮށްލެވެއެވެ.