ސައުދީން 9 މިސައިލާއި ޑްރޯން ވައްޓާލައިފި؛ މައްކާ ސަރަހައްދަށް ބައެއް ބައިތައް ވެއްޓުނު

ސައުދީ އަރަބިއްޔާގެ އެކި ސަރަހައްދުތަކަށް އަމާޒުކޮށް ހޫޘީ ހަނގުރާމަވެރިން ފޮނުވާލި ނުރައްކާތެރި ހަމަލާތަކެއް ސައުދީގެ ވައިގެ ދިފާއީ ބާރުން ނާކާމިޔާބުކޮށްލައިފިއެވެ.

މި ހަމަލާތަކުގެ ތެރެއިން ދެ ބެލިސްޓިކް މިސައިލެއްގެ ބައިތައް މައްކާ ސަރަހައްދުގެ އަވަށަކަށް ވަނީ ވެއްޓިފައެވެ.

ޔަމަނުގެ ގާނޫނީ ސަރުކާރު އިއާދަކުރުމަށް މަސައްކަތްކުރާ ކޯލިޝަނުގެ ތަރުޖަމާނު މޭޖަރ ޖެނެރަލް ތުރްކީ އަލްމާލިކީ ނެރުއްވި ބަޔާނެއްގައި ވިދާޅުވީ، ހުއްޓުވި ހަމަލާތަކުގެ ތެރޭގައި ރިޔާދު، މައްކާ އަދި ސައުދީގެ ދެކުނާއި އިރުމަތީ ސަރަހައްދުތަކަށް އަމާޒުކޮށްފައިވާ ދެ ބެލިސްޓިކް މިސައިލާއި، ތިން ކްރޫޒް މިސައިލްގެ އިތުރުން ހަތަރު ޑްރޯން ހިމެނޭ ކަމަށެވެ.

ކޯލިޝަނުން އެންމެ ފުރަތަމަ ހާމަކުރި ގޮތުގައި، ބުދަ ދުވަހުގެ އިރުއޮއްސުނު ވަގުތު ރިޔާދު ސަރަހައްދަށް އަމާޒުކޮށް ހޫޘީން ފޮނުވާލި ތިން ކްރޫޒް މިސައިލެއް ވަނީ ހުއްޓުވައި ނައްތާލާފައެވެ. އޭގެ ފަހުން އެރޭގެ ވަގުތެއްގައި، މައްކާ އާއި ދެކުނު ސަރަހައްދަށް އަމާޒުކޮށް ފޮނުވާލި ދެ ޑްރޯން ވައިގެ ދިފާއީ ބާރުން ވައްޓާލާފައިވާކަން ކޯލިޝަނުން އިއުލާނުކުރިއެވެ.

އަދި ބުދަ ދުވަހުގެ ދަންވަރުގެ ވަގުތެއްގައި، ހުޅަނގުގެ ސަރަހައްދަށް އަމާޒުކޮށް ފޮނުވާލި ދެ ބެލިސްޓިކް މިސައިލެއް ވެސް ވަނީ ހުއްޓުވައި ނައްތާލާފައެވެ. ބުރާސްފަތި ދުވަހުގެ ފަތިހުގެ ވަގުތެއްގައި ކޯލިޝަނުން ކަށަވަރުކޮށްދިން ގޮތުގައި، ވައްޓާލި ދެ ބެލިސްޓިކް މިސައިލެއްގެ ބައިތައް ވަނީ މައްކާ ސަރަހައްދުގެ "ސަބޫހާ" ނަމަކަށް ކިޔާ އަވަށަކަށް ވެއްޓިފައެވެ.

ހަމަ އެ ވަގުތާ ގާތްގަނޑަކަށް އެއްވަގުތެއްގައި، އިރުމަތީ ޕްރޮވިންސަށް އަމާޒުކުރި އިތުރު ޑްރޯނެއް ވެސް ވަނީ ވައިގެ ތެރޭގައި ގޮއްވާލާފައެވެ.

މިކަމާ ގުޅޭ އެންމެ ފަހުގެ މައުލޫމާތު ދެމުން ކޯލިޝަނުން މިއަދު ބުނެފައިވަނީ، ރިޔާދު ސަރަހައްދަށް އަމާޒުކޮށް ފޮނުވާލި އިތުރު ޑްރޯނެއް ވެސް ކާމިޔާބީއާއެކު ހުއްޓުވާފައިވާ ކަމަށެވެ.