މައްކާއާއި މަދީނާއަށް އަމާޒުކޮށް ހޫޘީން ދެމުންދާ ހަމަލާތައް މުސްލިމް ވޯލްޑް ލީގުން ކުށްވެރިކޮށްފި
މުސްލިމުންގެ އެންމެ މުގައްދަސް ބިންތައް ކަމުގައިވާ މައްކާއާއި މަދީނާގެ އިތުރުން ސައުދީ އަރަބިއްޔާގެ އާންމުން ދިރިއުޅޭ ސަރަހައްދުތަކަށް އަމާޒުކޮށް ހޫޘީ ހަނގުރާމަވެރިން ދެމުންދާ މިސައިލް އަދި ޑްރޯން ހަމަލާތައް މުސްލިމް ވޯލްޑް ލީގުން (އެމް.ޑަބްލިޔު.އެލް) ކުށްވެރިކޮށްފިއެވެ.
މިކަމާ ގުޅިގެން އެ ޖަމިއްޔާގެ ސެކްރެޓަރީ ޖެނެރަލް ޝައިޚް ޑރ. މުޙައްމަދު އަލްޢީސާ ނެރުއްވި ބަޔާނެއްގައި ވިދާޅުވީ، އިސްލާމްދީނުގެ މުގައްދަސް ބިނާތަކަށާއި މައުސޫމް އާންމުންގެ ފުރާނައަށް ނުރައްކާވާ ގޮތަށް ހޫޘީން ގަސްތުގައި ހިންގަމުންދާ މި އަމަލުތަކަކީ ބަލައިގަނެވޭނެ ކަންތައްތަކެއް ނޫން ކަމަށެވެ. އަދި ސައުދީގެ ވައިގެ ދިފާއީ ބާރުތަކުން އެ ހަމަލާތައް ނާކާމިޔާބު ކޮށްލާފައިވާކަންވެސް އޭނާ ފާހަގަކުރެއްވިއެވެ.
ޑރ. އަލްޢީސާ އިތުރަށް ވިދާޅުވީ، ދުނިޔޭގެ ދެ ބިލިއަނަށްވުރެ ގިނަ މުސްލިމުންގެ ޖަޒުބާތުތަކާ ކުޅެލުމަށް ހިންގާ މިފަދަ ނިރުބަވެރި އަމަލުތަކަކީ ދީނީ އަދި އިންސާނީ އެއްވެސް ހަމައަކަށް ފެތޭ ކަމެއް ނޫން ކަމަށެވެ. އަދި އަމިއްލައަށް 'އަންޞާރުﷲ' ގެ ނަމުން ނަންދީގެން އުޅޭ މި ގުރޫޕުގެ އަމަލުތަކަކީ އިސްލާމްދީނުގެ އަސްލުތަކާ ޚިލާފު، މުސްލިމް އުންމަތަށް ވެވޭ ހިޔާނާތެއްގެ ގޮތުގައި އޭނާ ސިފަކުރެއްވިއެވެ.
މި ބަޔާނުގައި ޑރ. އަލްޢީސާ ވަނީ މުގައްދަސް ބިންތަކާއި އާންމުންގެ ސަލާމަތަށްޓަކައި ސައުދީ އަރަބިއްޔާއިން އަޅާ ކޮންމެ ފިޔަވަޅަކަށް މުސްލިމް ވޯލްޑް ލީގުގެ ފުރިހަމަ ތާއީދު އޮތްކަން ހާމަކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
