މައްކާ، މަދީނާ އަދި ސައުދީގެ އެކި ސަރަހައްދުތަކަށް އަމާޒުކޮށް ހޫޘީން ފޮނުވާލި ހަމަލާތަކެއް ހުއްޓުވައިފި
ސައުދީ އަރަބިއްޔާގެ މުގައްދަސް ދެ ބިން ކަމަށްވާ މައްކާއާއި މަދީނާގެ އިތުރުން ރިޔާޟް ފަދަ މުހިންމު ސަރަހައްދުތަކަށް އަމާޒުކޮށް ހޫޘީން ދިން ނުރައްކާތެރި ހަމަލާތަކެއް ސައުދީގެ ވައިގެ ދިފާއީ ބާރުތަކުން ކާމިޔާބުކަމާއެކު ހުއްޓުވައިފިއެވެ.
ޔަމަނުގައި ހަރަކާތްތެރިވާ ކޯލިޝަން ފޯސްއިން މައުލޫމާތު ދޭ ގޮތުގައި، ހުކުރު އަދި ހޮނިހިރު ދުވަހު ހޫޘީން ވަނީ ގައުމުގެ އެކި ހިސާބުތަކަށް އަމާޒުކޮށް ދެ މިސައިލާއި ތިން ޑްރޯން ފޮނުވާލާފައެވެ. މީގެ ތެރޭގައި ހުޅަނގު ސަރަހައްދަށް އަމާޒުކުރި ކުރޫޒް މިސައިލަކާއި، ދެކުނަށް ފޮނުވާލި ބެލިސްޓިކް މިސައިލެއް ހިމެނެއެވެ. މި ހުރިހާ ހަމަލާތަކެއްވެސް ސައުދީގެ ދިފާއީ ނިޒާމުން ވަނީ ވައިގެ ތެރޭގައި ނައްތާލާފައެވެ.
ކޯލިޝަނުގެ ތަރުޖަމާނު މޭޖަރ ޖެނެރަލް ތުރުކީ އަލް މާލިކީ ފާހަގަކުރެއްވި ގޮތުގައި، މިއީ ފާއިތުވި ބުރާސްފަތި ދުވަހު ރިޔާޟާއި އިރުމަތީ ޕްރޮވިންސަށް އަމާޒުކޮށް ފޮނުވާލި ތިން ބެލިސްޓިކް މިސައިލް ހުއްޓުވި ހާދިސާއަށްފަހު، ޖެހިޖެހިގެން ދިން ހަމަލާތަކެކެވެ.
މި ހަމަލާތަކާ ގުޅިގެން ސައުދީގެ ސިވިލް ޑިފެންސްއިން ވަނީ ރައްޔިތުންގެ ސަލާމަތަށްޓަކައި ހާއްސަ އިރުޝާދުތަކެއް ނެރެފައެވެ. އެގޮތުން ނުރައްކަލުގެ އިންޒާރު ލިބޭ ވަގުތުތަކުގައި ބިއްލޫރި ކުޑަދޮރުތަކާއި، ބެލްކަނީ އަދި ފުރާޅު ފަދަ ހާމަ ތަންތަނަށް ނުނިކުމެ، ރައްކާތެރިކަމުގެ ފިޔަވަޅުތައް އެޅުމަށް ވަނީ އިލްތިމާސްކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
