ޓައިވާނާއި ޗައިނާ އެއްކުރުމަކީ ހުއްޓުވޭނެ ކަމެއް ނޫން: ޝީ ޖިންޕިންގް

ޓައިވާން އަލުން ޗައިނާއާ ގުޅުވައި އެއްކުރުމަކީ ތާރީހީ ގޮތުން ކުރަންޖެހޭ ކަމެއް ކަމަށާއި، ތާރީހުގެ އޮއިވަރު ނުހުއްޓުވޭނެ ކަމަށް ޗައިނާގެ ރައީސް ޝީ ޖިންޕިންގް މިއަދު ވިދާޅުވެއްޖެއެވެ.

ބެއިޖިންގްގެ ގްރޭޓް ހޯލް އޮފް ދަ ޕީޕަލްގައި ބޭއްވި ހާއްސަ ރަސްމިއްޔާތެއްގައި ވާހަކަދައްކަވަމުން ރައީސް ޝީ ވިދާޅުވީ، ސުލްހަވެރިކަމާއެކު ޓައިވާން ޗައިނާއާ ގުޅުވުމަށް މަސައްކަތް ކުރައްވާނެ ކަމަށެވެ. މި ވާހަކަފުޅުގައި ބާރުގެ ބޭނުންކުރުމާ ގުޅޭގޮތުން އޭނާ އެއްވެސް އެއްޗެއް ވިދާޅުވެފައެއް ނުވެއެވެ.

ޗައިނާގެ އިންގިލާބީ ބަތަލު ސުން ޔަތު-ސެންގެ 160 ވަނަ އުފަންދުވަސް ފާހަގަކުރުމަށް ބޭއްވި މި ޖަލްސާގައި ޝީ ވިދާޅުވީ، "އެއް ޤައުމެއް، ދެ ނިޒާމެއް" ގެ އުސޫލުގެ ދަށުން ސުލްހަވެރިކަމާއެކު އެއްބައިވަންތަކަން ޤާއިމުކުރުމަށް ޗައިނާއިން އަބަދުވެސް އިސްކަންދޭ ކަމަށެވެ. އަދި "އެއް ޗައިނާ" ގެ އުސޫލު ގަބޫލުކުރާނަމަ ޓައިވާނާއެކު މަޝްވަރާކުރުމަށް ތައްޔާރަށް އޮތް ކަމަށްވެސް އޭނާ ވިދާޅުވިއެވެ. މީގެ އިތުރުން، ޓައިވާނުގެ ރައްޔިތުންނާއެކު ޗައިނާގެ ހުރިހާ ރައްޔިތުން ގުޅިގެން، ޓައިވާން ވަކިވެގަތުމަށް މަސައްކަތްކުރާ ފަރާތްތަކާ ދެކޮޅަށް ތެދުވުމަށް އޭނާ ގޮވާލެއްވިއެވެ.

ޑިމޮކްރެޓިކް އުސޫލުން ވެރިކަންކުރާ ޓައިވާނަކީ ޗައިނާގެ ބައެއްގެ ގޮތުގައި ޗައިނާއިން ދެކުނު ނަމަވެސް، ޓައިވާނުގެ ސަރުކާރުންނާއި އެ ޤައުމުގެ މައި ސިޔާސީ ޕާޓީތަކުން ޗައިނާގެ މި ދައުވާއާއި "އެއް ޤައުމެއް، ދެ ނިޒާމެއް" ގެ މޮޑެލްއަށް ވަރަށް ބޮޑަށް ދެކޮޅު ހަދައެވެ. ޝީގެ މި ވާހަކަފުޅާ ގުޅިގެން ޓައިވާނުގެ ސަރުކާރުން އަދި އެއްވެސް ރައްދެއް ދީފައެއް ނުވެއެވެ.

މި ތަޤުރީރުގައި ބާރުގެ ބޭނުންކުރާނެ ވާހަކަ ޝީ ވިދާޅުނުވި ނަމަވެސް، ޗައިނާއިން ޓައިވާން ހިފުމަށް އަސްކަރީ ބާރު ބޭނުންކުރުމުގެ ފުރުސަތު ދޫކޮށްލާނެ ކަމަށް ދުވަހަކުވެސް ބުނެފައެއް ނުވެއެވެ. އެގޮތުން، ޗައިނާގެ އަސްކަރިއްޔާއިން ކޮންމެ ދުވަހަކުހެން ޓައިވާން ވަށައިގެންވާ ސަރަހައްދުތަކުގައި ހަރަކާތްތެރިވަމުންދާއިރު، ޕެސިފިކް ކަނޑުގެ ސަރަހައްދުތަކަށްވެސް ޗައިނާގެ އަސްކަރީ ނުފޫޒު ދަނީ ފުޅާކުރަމުންނެވެ.

ޝީ މިފަދަ މޭރުމަކުން ވާހަކަފުޅު ދައްކަވާފައި މިވަނީ، އަންނަ ހަފްތާގައި ޗައިނާގެ ޝެންޒެންގައި ބާއްވާ އޭޕެކް ސަމިޓުގައި އެމެރިކާގެ ރައީސް ޑޮނަލްޑް ޓްރަމްޕާ ބައްދަލުކުރެއްވުމަށް ތައްޔާރުވަމުންދާ ދަނޑިވަޅެއްގައެވެ. ހަމައެއާއެކު، ޓައިވާނުގައި ބާއްވާ މުހިންމު ލޯކަލް އިންތިހާބަށް ދެ ހަފްތާއަށްވުރެ ކުޑަތަންވެފައިވާތީ، މި ވާހަކަފުޅަށް ސަރަހައްދީ އަދި ބައިނަލްއަޤްވާމީ މަސްރަހުގައި ބޮޑު ސަމާލުކަމެއް ވަނީ ލިބިފައެވެ.