ފޯރަމްގައި ސޮއިކުރެވޭ އެއްބަސްވުންތަކުގެ ސަބަބުން އިގްތިސާދީ ގުޅުން އިތުރަށް ބަދަހިވެގެންދާނެ: ޗައިނާ ސަފީރު

ދިވެހިރާއްޖެއާއި ޗައިނާއާ ދެމެދު މީގެކުރިން ސޮއިކުރެވުނު އެއްބަސްވުންތަކާއި، "ޗައިނާ–މޯލްޑިވްސް އިންވެސްޓްމަންޓް ކޯޕަރޭޝަން ފޯރަމް" ގެ ތެރެއިން ސޮއިކުރެވޭ އެއްބަސްވުންތަކުގެ ސަބަބުން ދެ ގައުމުގެ އިގްތިސާދީ ގުޅުން އިތުރަށް ވަރުގަދަވެގެންދާނެ ކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޝިއަންހުއާ ވިދާޅުވެއްޖެއެވެ.

ބުދަ ދުވަހު ބާސެލޯ މޯލްޑިވްސްގައި ބޭއްވި ޗައިނާ–މޯލްޑިވްސް އިންވެސްޓްމަންޓް ކޯޕަރޭޝަން ފޯރަމްގައި ވާހަކަދައްކަވަމުން ސަފީރު ވިދާޅުވީ، މި އެއްބަސްވުންތަކަކީ ދެ ގައުމުގެ ވެރިން ކަނޑައަޅުއްވާފައިވާ، ދެގައުމުން އިސްކަންދޭ ކަންކަން ކުރިއެރުވުމަށް އެޅޭ މުހިންމު ފިޔަވަޅެއް ކަމަށެވެ.

ސަފީރުގެ ވާހަކަފުޅުގައި، ރައީސް ޑރ. މުޢިއްޒު ޗައިނާއަށް ކުރެއްވި ފުރަމާނަ ދަތުރުފުޅާއެކު ދެ ގައުމުގެ ގުޅުން "ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނާޝިޕް" އަކަށް ބަދަލުވެގެން ދިޔަކަން ފާހަގަކުރެއްވިއެވެ. އަދި ޝަންހާއީ ކޯޕަރޭޝަން އޮގަނައިޒޭޝަން ސަމިޓުގައި ބައިވެރިވެވަޑައިގަތުމަށް އެމަނިކުފާނު ޗައިނާއަށް ކުރެއްވި ދަތުރުފުޅަށްވެސް އަލިއަޅުއްވާލެއްވިއެވެ.

ސިނަމާލެ ބްރިޖަކީ ދެ ގައުމުގެ ކާމިޔާބު ގުޅުމުގެ ރަމްޒެއްގެ ގޮތުގައި ސިފަކުރައްވަމުން ސަފީރު ވިދާޅުވީ، ވޭތުވެދިޔަ އަށް އަހަރު ދުވަހުގެ ތެރޭގައި އެ ބްރިޖުގެ ސަބަބުން ދިވެހިންގެ ދިރިއުޅުމަށާއި އިގްތިސާދަށް ބޮޑެތި ކުރިއެރުންތަކެއް ލިބިފައިވާ ކަމަށެވެ. އަދި މުސްތަގުބަލުގައި ޓެކްނޮލޮޖީއާއި، އިންވެސްޓްމަންޓް އަދި އިންސާނީ ވަސީލަތްތައް ތަރައްގީކޮށްގެން އައު "މައުނަވީ ރަހުމަތްތެރިކަމުގެ ބްރިޖެއް" އެޅޭނެ ކަމަށް އުއްމީދު ކުރައްވާކަމަށް ވިދާޅުވިއެވެ.

ރާއްޖޭގެ ތަރައްގީއަށް ޗައިނާގެ ޓެކްނޮލޮޖީއާއި ތަޖުރިބާ ބޭނުންކުރެވިދާނެ މުހިންމު ދާއިރާތަކުގެ ގޮތުގައި ސަފީރު ފާހަގަކުރެއްވީ ދަނޑުވެރިކަމާއި، އިއާދަކުރަނިވި ހަކަތަ އަދި ދަތުރުފަތުރުގެ ދާއިރާއެވެ.

އެގޮތުން ސްމާޓް ގްރީންހައުސްތަކާއި، ހައިޑްރޯޕޮނިކްސް އަދި ފެން އިސްރާފުނުވާ ގޮތަށް ދަނޑުވެރިކަން ކުރުމުގެ ނިޒާމުތަކުގެ އެހީގައި ރާއްޖޭގައި ކާބޯތަކެތި އުފައްދާ މިންވަރު އިތުރުކުރެވިދާނެ ކަމަށް ވިދާޅުވިއެވެ. މީގެއިތުރުން، ސޯލާ ނިޒާމުތަކުގެ އެހީގައި، ރާއްޖޭގެ ހަކަތައިގެ 33 އިންސައްތަ އިއާދަކުރަނިވި ހަކަތައަށް ބަދަލުކުރުމަށް ރައީސް މުޢިއްޒު ގެންގުޅުއްވާ ލަނޑުދަނޑި ހާސިލުކުރެވޭނެ ކަމުގެ ޔަގީންކަން ސަފީރު ދެއްވިއެވެ.

އަދި ކަރަންޓުން ދުއްވާ އުޅަނދުފަހަރާއި އީވީޓީއޯއެލް (eVTOL) މަތިންދާބޯޓުތައް ފަދަ ޒަމާނީ ވަސީލަތްތަކުން ރާއްޖޭގެ ދަތުރުފަތުރާއި މުދާ އުފުލުމުގެ ހަރަދު ވަރަށް ބޮޑަށް ކުޑަކުރެވިދާނެ ކަމަށްވެސް ފާހަގަކުރެއްވިއެވެ.

ޒުވާން ވިޔަފާރިވެރިންނާއި ފަންނީ މީހުން ބިނާކުރުމަށް ބާރުއަޅުއްވަމުން ސަފީރު ވަނީ، ހާއްސަކޮށް ފެހި، ނޫ އަދި ޑިޖިޓަލް އިގްތިސާދުގެ ދާއިރާތަކުން ޒުވާނުންނަށް ހުނަރު ތަރައްގީކުރުމުގެ ފުރުސަތުތައް ފަހިކޮށްދިނުމަށް އެދިވަޑައިގެންފައެވެ.

މީގެއިތުރުން އިގްތިސާދީ ގުޅުން ވަރުގަދަކުރުމަށް ސިޔާސީ ގޮތުން އޮންނަ އިތުބާރު މުހިންމުކަން ފާހަގަކުރައްވައި، ސަރުކާރުގެ އިދާރާތަކާއި ވިޔަފާރިތަކުގެ މެދުގައި އޮންނަ ގުޅުން އިތުރަށް ބަދަހިކުރުމަށް ސަފީރު އެދިލެއްވިއެވެ.

އަދި މި ފޯރަމަކީ ޓެކްނޮލޮޖީއާއި އިންވެސްޓްމަންޓްގެ ދާއިރާއިން ދެ ގައުމުގެ ގުޅުމުގެ އައު ބާބެއް ފެށިގެންދާނެ ބިންގަލެއް ކަމަށް ވިދާޅުވަމުން، ފޯރަމްގައި ދެކެވުނު ވާހަކަތައް އަމަލީ މަސައްކަތްތަކަކަށް ބަދަލުކޮށް، ރާއްޖޭގެ ދިގު މުއްދަތުގެ ތަރައްގީއަށް މަސައްކަތްކުރުމަށް ސަފީރު ބައިވެރިންނަށް އިލްތިމާސްކުރެއްވިއެވެ.