ރަޝިޔާއިން އެމެރިކާއަށް ކަނޑައަޅުއްވާފައި ހުންނަވާ ސަފީރު ކުއްލި ގޮތަކަށް މަރުވެއްޖެ

ރަޝިޔާއިން އެމެރިކާއަށް ކަނޑައަޅުއްވާފައި ހުންނަވާ ސަފީރު އެލެކްޒެންޑަރ ޑާޗިއެވް، އުމުރުން 66 އަހަރުގައި ކުއްލި ގޮތަކަށް ރަޝިޔާގެ ވެރިރަށް މޮސްކޯގައި މަރުވެއްޖެއެވެ.

ރަޝިޔާގެ ހާރިޖީ ވުޒާރާއިން ބުދަ ދުވަހު ނެރުނު ބަޔާނެއްގައި އޭނާ ކުއްލި ގޮތަކަށް މަރުވިކަން ވަނީ ކަޝަވަރުކޮށްދީފައެވެ.

އެގޮތުން، ރަޝިޔާގެ ހާރިޖީ ވުޒާރާގެ ތަރުޖަމާނު މާރިއާ ޒަހާރޯވާ ބުނި ގޮތުގައި، ޑާޗިއެވް އަވަހާރަވީ ދިގު މުއްދަތަކަށް ތަހައްމަލު ކުރަމުންދިޔަ ބަލިއަކަށް ފަރުވާ ހޯއްދަމުން ދަނިކޮށެވެ. އެމެރިކާގެ ވޮޝިންޓަން ޑީސީގައި ހުންނަ ރަޝިޔާ އެމްބަސީ ދޫކޮށް އޭނާ މޮސްކޯއަށް އެނބުރި އައީ އެ ބައްޔަށް ފަރުވާ ހޯދުމަށެވެ. ހާރިޖީ ވުޒާރާއިން ވަނީ، ޑާޗިއެވްއަކީ އެ ގައުމުގެ ހާރިޖީ ދާއިރާގެ އެންމެ ގޮންޖެހުން ބޮޑު މަސައްކަތްތަކުގައި ހިދުމަތް ކުރި ފާހަގަކޮށްލެވޭ ޤާބިލު ބޭފުޅެއްގެ ގޮތުގައި ސިފަކޮށް، އޭނާގެ އާއިލާއަށް ތައުޒިޔާ ފޮނުވާފައެވެ.

ހުޅަނގުގެ ޤައުމުތަކަށް ވަރަށް ބޮޑަށް ފާޑުވިދާޅުވާ ތަޖުރިބާކާރު ޑިޕްލޮމެޓެއްގެ ގޮތުގައި މަޝްހޫރުވެފައިވާ ޑާޗިއެވް، އެމެރިކާގެ ސަފީރުކަމުގެ މަޤާމާ ހަވާލުވީ 2025 ވަނަ އަހަރުގެ މާރިޗު މަހުގައެވެ. އޭނާގެ ސަފީރުކަމުގެ ދައުރުގައި އެމެރިކާގެ ރައީސް ޑޮނަލްޑް ޓްރަމްޕް މޮސްކޯއާއެކު ދެޤައުމުގެ މަޝްވަރާތައް ފައްޓައި، ޔޫކްރެއިނަށް ދެމުންދިޔަ އެހީތައް މަދުކުރުމާއި ގުޅިގެން އެމެރިކާއާއި ރަޝިޔާގެ ގުޅުން ވަނީ ކޮންމެވެސް ވަރަކަށް ރަނގަޅުވާން ފަށާފައެވެ.

އެމެރިކާގެ ސަފީރުކަމަށް ވަޑައިގަތުމުގެ ކުރިން ޑާޗިއެވް ވަނީ ރަޝިޔާގެ ހާރިޖީ ވުޒާރާގެ ނޯތު އެޓްލާންޓިކް ޑިޕާޓްމަންޓުގެ ވެރިޔާގެ މަޤާމުވެސް ވޮޝިންޓަންގައި އަދާކޮށްފައެވެ. މީގެ އިތުރުން، 2014 އިން 2021 އަށް ކެނެޑާއަށް ކަނޑައަޅުއްވާފައި ހުންނަވާ ރަޝިޔާގެ ސަފީރުކަންވެސް އޭނާ ކުރެއްވިއެވެ.

މީގެ ގާތްގަނޑަކަށް ދިހަ އަހަރު ކުރިންވެސް ރަޝިޔާގެ އިސް ޑިޕްލޮމެޓަކު ވަނީ މިފަދަ ކުއްލި ގޮތަކަށް މަރުވެފައެވެ. އެގޮތުން، އދ. އަށް ކަނޑައަޅުއްވާފައި ހުންނެވި ރަޝިޔާގެ ސަފީރު ވިޓާލީ ޗާކިން 2017 ވަނަ އަހަރު އުމުރުން 64 އަހަރުގައި އަވަހާރަވީ، އޭނާގެ 65 ވަނަ އުފަންދުވަހަށް އެންމެ ދުވަހަކަށް ވެފައި ވަނިކޮށް ހާޓް އެޓޭކެއް ޖެހިވަޑައިގެންނެވެ.