ރަޝިޔާގެ ހަމަލާތަކުން ޔޫކްރެއިންގެ ކަރަންޓު ވިއުގައަށް ގެއްލުންވެ، އެތައް ބަޔަކު އަނދިރީގައި

ޔޫކްރެއިނުގެ ނިޕްރޯޕެޓްރޯވްސްކް އަދި ހާކީވް ސަރަހައްދުގެ ހަކަތަ ފޯރުކޮށްދޭ މުހިންމު ވަސީލަތްތަކަށް ރަޝިޔާއިން ދިން ވައިގެ ހަމަލާތަކާ ގުޅިގެން، ގާތްގަނޑަކަށް 850،000 މީހުން ކަރަންޓުގެ ޚިދުމަތުން މަހްރޫމްވެއްޖެއެވެ.

ޔޫކްރެއިނުގެ އިރުމަތީ ނިޕްރޯޕެޓްރޯވްސްކް ސަރަހައްދުގެ ހަކަތަ އުފައްދާ މަރުކަޒަކަށް ރޭގަނޑުގެ ވަގުތެއްގައި ދިން ނުރައްކާތެރި ހަމަލާއެއްގައި، 600،000 އަށްވުރެ ގިނަ ރައްޔިތުންގެ ކަރަންޓު ކެނޑިފައިވާ ކަމަށް އެ ގައުމުގެ ހަކަތައާ ބެހޭ ކުންފުނިން ވަނީ ކަށަވަރުކޮށްދީފައެވެ.

ޑީ.ޓީ.އީ.ކޭ' އިން ޓެލެގްރާމް މެދުވެރިކޮށް އާންމުކުރި މެސެޖެއްގައި ބުނީ އާދީއްތަ ދުވަހު ކަރަންޓު ކެނޑުމުގެ ދަތިތަކާ ކުރިމަތިލާން ޖެހުނީ ޕަވްލޯގްރޭޑް، ސަމަރިވްސްކީ، ކާމިއަންސްކޭ، ނިޕްރޯ ޑިސްޓްރިކްޓް އަދި ނިޕްރޯ ސިޓީގެ ރައްޔިތުންނަށް ކަމަށެވެ. އަދި ގެއްލުން ލިބުނު މަރުކަޒުތައް މަރާމާތުކޮށް، އަލުން ޚިދުމަތް ދިނުމަށް އިންޖިނިއަރުން މެދުކެނޑުމެއްނެތި މަސައްކަތް ކުރަމުންދިޔަ ނަމަވެސް، ތަކުރާރުކޮށް ދެމުންދާ ހަމަލާތަކުގެ ސަބަބުން އެ މަސައްކަތަށް ބޮޑެތި ހުރަސްތަކެއް ކުރިމަތިވަމުންދާ ކަމަށްވެސް އެ ކުންފުނިން ބުންޏެވެ.

ރަޝިޔާއިން ދެމުންގެންދާ ވައިގެ ހަމަލާތައް އިތުރަށް ފުޅާކޮށް، ހަކަތައިގެ ވިއުގަތަކަށް އަމާޒުކޮށް ޑްރޯން އަދި މިސައިލް ހަމަލާތައް ވަރުގަދަކުރަމުން ދިއުމާ ގުޅިގެން، ޔޫކްރެއިނުން ދަނީ ހަނގުރާމައިގެ ނާޒުކު ފިނި މޫސުމަކާ ކުރިމަތިލުމަށް ތައްޔާރުވަމުންނެވެ.

އިރުއުތުރު ޚާކީވް ސަރަހައްދުގެ އަސާސީ އުމްރާނީ ވަސީލަތްތަކަށް އަމާޒުކޮށް ދިން ހަމަލާތަކާ ގުޅިގެން، އިތުރު 250،000 އެއްހާ ރައްޔިތުންގެ ކަރަންޓުގެ ޚިދުމަތް ވަނީ މެދުކެނޑިފައެވެ. މި ހަމަލާތަކުގައި އެއްވެސް މީހެއްގެ ފުރާނައަށް ނުރައްކާވެ، އަނިޔާއެއް ލިބުނު ކަމުގެ ރިޕޯޓެއް އަދި ލިބިފައިނުވެއެވެ.

މި ހަމަލާތައް އަމާޒުވެފައި މިވަނީ، ހަކަތަ އުފައްދާ މަރުކަޒުތަކަށް ދިން ވަރުގަދަ ހަމަލާތަކަކާ ގުޅިގެން ފަސް ސަރަހައްދަކުން ކަރަންޓު ކެނޑި، ވެރިރަށް ކިއޭވްއަށް ހަކަތަ ފޯރުކޮށްދިނުމުގައި ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް ޔޫކްރެއިނުގެ އެނާޖީ މިނިސްޓްރީން ހާމަކުރިތާ އެންމެ ދުވަހެއް ފަހުންނެވެ.