ރަޝިއާގެ ލެބޯޓްރީއެއްގައި ހިނގި ހާދިސާއަކާ ގުޅިގެން ނުރައްކާތެރި "ޕްލޭގް" ބަލި ފެތުރިދާނެކަމުގެ ބިރު ހީވެއްޖެ

ރަޝިއާގެ ސައިބީރިއާ ސަރަހައްދުގައި ހުންނަ ސިއްހީ ތަހުލީލީ އިދާރާއެއްގެ ލެބޯޓްރީ ޓެކްނީޝަނަކު، ނުރައްކާތެރި "ޕްލޭގް" ބަލި ފަތުރާ ޖަރާސީމު ހުރި ޓިއުބެއް ތަޅާލި ކަމަށް ބުނާ ހާދިސާއަކަށްފަހު، އޭނާ ކުއްލި ގޮތަކަށް މަރުވުމާ ގުޅިގެން އެ ސަރަހައްދުގައި ބޮޑު ބިރުވެރިކަމެއް އުފެދިއްޖެއެވެ.

މި ހާދިސާ ހިނގާފައިވަނީ އިރްކުޓްސްކް ސަރަހައްދުގައި ހުންނަ ރިސާޗް އެންޓި-ޕްލޭގް އިންސްޓިޓިއުޓްގައެވެ. ރިޕޯޓްތައް ބުނާގޮތުން އުމުރުން 28 އަހަރުގެ ދާރިއާ ޝިޕިލޯވާ ނަމަކަށް ކިޔާ ޓެކްނީޝަނަކު ނިއުމޯނިކް ޕްލޭގްގެ ޖަރާސީމު ހުރި ޓެސްޓް ޓިއުބެއް ތަޅާލާފައިވަނީ މިދިޔަ ސެޕްޓެމްބަރު މަހުގެ 25 ވަނަ ދުވަހުއެވެ. އޭގެ ހަތަރު ދުވަސް ފަހުން ނޭވާލާ ނިޒާމަށް ޖެހޭ ބައްޔެއްކަމަށްވާ ނިއުމޯނިއާގެ ނުރައްކާތެރި އަލާމާތްތަކާއެކު އޭނާ ހޮސްޕިޓަލުގައި އެޑްމިޓްކުރި ނަމަވެސް، މިދިޔަ ބުދަ ދުވަހުގެ ރޭގެ ވަގުތެއްގައި އޭނާ ވަނީ މަރުވެފައެވެ.

މި ހާދިސާއާ ގުޅިގެން ރަޝިއާގެ ކަމާބެހޭ އިދާރާތަކުން ވަނީ ރައްކާތެރިކަމުގެ ހަރުކަށި ފިޔަވަޅުތަކެއް އަޅާފައެވެ. އެގޮތުން އޭނާއަށް ފަރުވާދިން ހޮސްޕިޓަލުގެ ބައެއް ވޯޑުތައް ކަރަންޓީނުކޮށް، އޭނާއާ ދިމާވި ގާތްގަނޑަކަށް 200 އެއްހާ މީހުން ސިއްހީ މާހިރުންގެ ބެލުމުގެ ދަށަށް ގެނެސްފައިވެއެވެ. ނަމަވެސް ރަޝިއާގެ ސިއްހީ އިދާރާ، ރޮސްޕޮޓްރެބްނަޑްޒޯރ އިން ބުނެފައިވަނީ އޭނާ މަރުވީ ސީދާ ޕްލޭގް ބަލީގައިކަން އަދި ކަށަވަރު ނުވާ ކަމަށާއި، ހެދި ޓެސްޓުތަކުން އެފަދަ ޖަރާސީމެއް ފެނިފައިނުވާ ކަމަށެވެ.

މި ހާދިސާއާ ގުޅިގެން ބައިނަލްއަގުވާމީ ސަމާލުކަން ވެސް ވަނީ މިކަމަށް ހުއްޓިފައެވެ. އެމެރިކާގެ ވައިޓް ހައުސް އާއި ސިއްހީ އިދާރާތަކުން ދަނީ މި ހާލަތު ވަރަށް ގާތުން މޮނިޓަރ ކުރަމުންނެވެ. އެމެރިކާގެ ސްޓޭޓް ޑިޕާޓްމަންޓުން ވަނީ މިކަމުގެ ސައްހަ މައުލޫމާތު ވީހާވެސް އަވަހަކަށް އަދި ދެފުށް ފެންނަ ގޮތެއްގައި ހާމަކުރުމަށް ރަޝިއާ ސަރުކާރަށް ގޮވާލާފައެވެ.

ނިއުމޯނިކް ޕްލޭގަކީ ނޭވާލާ ނިޒާމުގެ ތެރެއިން ވަރަށް ފަސޭހައިން އެކަކު އަނެކަކަށް ފެތުރޭ، އަދި ފަރުވާ ނުދެވިއްޖެނަމަ ފުރާނައަށް ނުރައްކާވާ ފަދަ ނުރައްކާތެރި ބައްޔެކެވެ. ރަޝިއާގެ ކަމާބެހޭ ފަރާތްތަކުން ބުނާގޮތުގައި މިހާތަނަށް މޮނިޓަރ ކުރަމުންދާ އެއްވެސް މީހެއްގެ ކިބައިން ބަލީގެ އަލާމާތެއް ފެނިފައެއް ނުވެއެވެ.

ނިއުމޯނިކް ޕްލޭގަކީ ޔާސީނިއާ ޕެސްޓިސް ނަމަކަށް ކިޔާ ބެކްޓީރިއާއެއް ސަބަބުން ޖެހޭ ބައްޔެކެވެ. ދުނިޔޭގެ ޞިއްޙަތު ޖަމިއްޔާ (ޑަބްލިއުއެޗްއޯ) ބުނާ ގޮތުގައި މި ބެކްޓީރިއާ އާންމުކޮށް ފެންނަނީ ކުދި ޖަނަވާރުތަކާއި އެ ތަކެތީގެ އުކުނުންނެވެ.

އެ ޖަމިއްޔާއިން ބުނާ ގޮތުގައި ޕްލޭގް ވަރަށް ފަސޭހައިން ފެތުރޭ އިރު ކުރީކޮޅު ފަރުވާ ނުދެވިއްޖެ ނަމަ ފުރާނައަށް ނުރައްކާވެދާނެއެވެ.