ދުނިޔޭގެ ސަލާމަތާއި ރައްކާތެރިކަން ބޮޑަށް ބިނާވެފައިވަނީ ރަޝިޔާ، ޗައިނާ އަދި އެމެރިކާގެ މައްޗަށް: ޕުޓިން
ބައިނަލްއަޤްވާމީ ސަލާމަތާއި ރައްކާތެރިކަން ބިނާވެފައިވަނީ ރަޝިޔާ، ޗައިނާ އަދި އެމެރިކާގެ މައްޗަށް ކަމަށް ރަޝިޔާގެ ރައީސް ވްލޮޑޮމިއަރ ޕުޓިން ވިދާޅުވެއްޖެއެވެ.
ޕުޓިން މިހެން ވިދާޅުވީ، ދުނިޔޭގެ ބޮޑެތި ބާރުތަކުގެ މެދުގައި އޮތް ގުޅުންތަކާ ބެހޭގޮތުން ވާހަކަ ދައްކަވަމުންނެވެ.
މި ތިން ޤައުމުގެ ލީޑަރުންގެ މެދުގައި ބޭއްވޭ ތިން ފަރާތުގެ ސަމިޓަށް އިޝާރާތް ކުރައްވަމުން ރައީސް ޕުޓިން ވަނީ އެ ބައްދަލުވުމަށް ވަރަށް ބޮޑަށް ތަޢުރީފު ކުރައްވާފައެވެ. އެގޮތުން، ރަޝިޔާ، ޗައިނާ އަދި އެމެރިކާ ބައިވެރިވާ މި ސަމިޓަކީ ބައިނަލްއަޤްވާމީ ޚާރިޖީ ސިޔާސަތުގެ ތާރީޚުގައި ލިޔެވިގެންދާނެ އައު ބާބެއްގެ ގޮތުގައި އޭނާ ސިފަކުރެއްވިއެވެ.
މީގެ އިތުރުން، އެމެރިކާއާއި ރަޝިޔާއާ ދެމެދު އޮތް ގުޅުންތަކަށް އަލިއަޅުއްވާލައްވަމުން ޕުޓިން ވިދާޅުވީ، ވޮޝިންޓަނާއެކު ރަޝިޔާއިން ބާއްވާ ގުޅުންތަކުގެ ބައެއް ދާއިރާތައް މިހާރަށްވުރެ ހަރުދަނާކޮށް، އޭގެ ނަތީޖާ ރަނގަޅު ކުރުމަށް އޭނާ އެދިވަޑައިގަންނަވާ ކަމަށެވެ. ދެ ޤައުމުގެ ދެމެދުގައި އޮތް މުޢާމަލާތްތައް އިތުރަށް ފުޅާކޮށް، އޭގެ ފައިދާ ދެ ފަރާތަށްވެސް ލިބޭނެ ގޮތަށް ކަންކަން ބައްޓަން ކުރުމުގެ މުހިންމުކަން އޭނާ ފާހަގަކުރެއްވިއެވެ.
ރަޝިޔާގެ ޓާސް ނިއުސް އެޖެންސީން ރިޕޯޓްކޮށްފައިވާ ގޮތުގައި، ބައިނަލްއަޤްވާމީ މައްސަލަތަކުގައި ނިންމަންޖެހޭ ބައެއް ނިންމުންތައް މި ސަމިޓުގެ ބޭރުން އެހެން އޮނިގަނޑުތަކުގެ ތެރެއިންވެސް ނިންމަމުންދާނެ ކަމަށް ޕުޓިން ވިދާޅުވިއެވެ. މިއީ އެކި ލެވެލްތަކުގައި މަޝްވަރާތައް ކުރިއަށް ގެންދިއުމަށް އޮތް ފުރުސަތެއްކަން އޭނާގެ ވާހަކަފުޅުން ދޭހަވެއެވެ.
އެއްބަސްވުންތަކާ ބެހޭގޮތުން ވާހަކަފުޅު ދައްކަވަމުން ޕުޓިން ވިދާޅުވީ، އެއްވެސް އެއްބަސްވުމަކަށް ނާދެވި އޮތުމަށްވުރެ، ފުރިހަމައަށް ތަންފީޒު ނުކުރެވުނު ނަމަވެސް ކޮންމެވެސް ކަހަލަ އެއްބަސްވުމެއް އޮތުން މާ ރަނގަޅު ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް