ޢިމްރާން އަދާލަތުގެ ލީޑާޝިޕާ ހަވާލުވުމުން ގިނަ ޢިލްމުވެރިންތަކެއް ޕާޓީއާ ދުރަށް ވަޑައިގެންނެވި: އެސްޖީ ޒިނާހު
ޢަދާލަތު ޕާޓީގެ ރައީސްކަމާ ޝައިޚް ޢިމްރާން ޢަބްދުﷲ ހަވާލުވެވަޑައިގެންނެވި ހިސާބުން ފެށިގެން، ރާއްޖޭގެ މަޝްހޫރު އެތައް ދީނީ ޢިލްމުވެރިންނެއް އެ ޕާޓީއާ ދުރަށް ވަޑައިގެންނެވި ކަމަށް އެ ޕާޓީގެ ސެކްރެޓަރީ ޖެނެރަލް ޙަސަން ޒިނާހު ވިދާޅުވެއްޖެއެވެ.
ޒިނާހު މިހެން ވިދާޅުވީ ޢަދާލަތު ޕާޓީގެ ކުރީގެ ތަރުޖަމާނު ޢަލީ ނަޒީރު ދެއްކެވި ވާހަކަތަކަކަށް ރައްދު ދެއްވަމުންނެވެ. އެގޮތުން، ޝައިޚް ޙަސަން ލަޠީފް ޢަދާލަތު ޕާޓީން ވަކިވެވަޑައިގަތުމާ ގުޅިގެން ނަޒީރު ވިދާޅުވެފައިވަނީ، އެކަމުން ރަމްޒުކޮށްދެނީ ޕާޓީގެ މިހާރުގެ ލީޑަރޝިޕްގެ ނުކުޅެދުންތެރިކަމާއި، ސިޔާސީ ހަލަބޮލި މާހައުލުގައި މެންބަރުންގެ ރޫޙާ އެއްގޮތަށް ޕާޓީ ހިންގުމުގެ ވިސްނުމާއި ޤާބިލުކަން މިހާރުގެ ލީޑަރޝިޕްގައި ނެތް ކަމެވެ.
ނަޒީރުގެ މި ވާހަކަތަކަށް ރައްދު ދެއްވަމުން އެސްޖީ ޒިނާހު ވިދާޅުވީ، ޝައިޚް ޢިމްރާން ޕާޓީގެ ރިޔާސަތާ ހަވާލުވެވަޑައިގެންނެވިތާ މާ ގިނަ ދުވަހެއް ނުވަނީސް، ޢަދާލަތު ޕާޓީގެ ޢިލްމުވެރިންގެ މަޖިލީހުގެ ރައީސް އަދި ޕާޓީގެ މުއައްސިސް ޑރ. ޢަބްދުލްމަޖީދު ޢަބްދުލްބާރީ (رحمه الله) ޕާޓީއާ ދުރަށް ވަޑައިގެންނެވި ކަމަށެވެ.
މީގެއިތުރުން، އޭރުގެ ލީޑަރޝިޕުން ނިންމި ނިންމުންތަކުގެ ސަބަބުން ގިނަ އަދަދެއްގެ ޢިލްމުވެރިން ޕާޓީއާ ދުރަށް ޖެހިވަޑައިގެންނެވިކަން ފާހަގަކުރައްވަމުން ޒިނާހު ވަނީ ބައެއް ބޭފުޅުންގެ ނަންތައް ހާމަކުރައްވާފައެވެ. އޭގެ ތެރޭގައި ހިމެނިވަޑައިގަންނަވަނީ:
ޝައިޚް މުޙައްމަދު ދީދީ
ޝައިޚް މުޙައްމަދު ލަޠީފް
ޑރ. މުޙައްމަދު ޝަހީމް ޢަލީ ސަޢީދު
ޝައިޚް ޢިއްޒުއްދީން
ޝައިޚް ޢަލީ ރިޟާ
ޝައިޚް ރުޝްދީ
ޝައިޚް ޙުސައިން ފަހުމީ
ޝައިޚް ރަޒީން، އަދި
ޝައިޚް ނަސީމް ފަތުޙީ
ހަމައެއާއެކު، ޖަމްޢިއްޔަތުއް ސަލަފްގެ ޢިލްމުވެރިން ޢަދާލަތު ޕާޓީއާ ވަރަށް ގާތުން މަސައްކަތް ކުރައްވަމުން ގެންދެވުމަށްފަހު ދުރަށް ޖެހިވަޑައިގަތީވެސް، އޭރުގެ ލީޑަރޝިޕުން ކަންކަން ނިންމަމުން ދިޔަ ގޮތާމެދު ހިތްހަމަނުޖެހިގެން ކަމަށް ޒިނާހު ވިދާޅުވިއެވެ.
މާޒީގައި އެކަންކަން އެހެން ހިނގާފައިވީ ނަމަވެސް، ޒިނާހު ވިދާޅުވީ މިއަދު ޢަދާލަތު ޕާޓީގެ އާ ލީޑަރޝިޕަށް ރާއްޖޭގެ ޢިލްމުވެރިން ފުރިހަމައަށް އިތުބާރު ކުރައްވާ ކަމީ ފެންނަން އޮތް ހަގީގަތެއް ކަމަށެވެ.
ދާދިފަހުން އަދާލަތު ޕާޓީން ވަނީ މި ސަރުކާރުގެ ކުރިއަށް އޮތް ދެ އަހަރާއި 2028 ވަނަ އަހަރުގެ ރިޔާސީ އިންތިޚާބުގައި އަދުގެ ސަރުކާރު ހިންގާ ޕީއެންސީއާ ގުޅިގެން ކުރިއަށްދާން ނިންމާފައެވެ. އެކަމާ ގުޅިގެން ޕާޓީގެ ބައެއް މެންބަރުން އަންނަނީ ނުރުހުން ފާޅުކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް