ޓްރަމްޕް ޗައިނާއިން ފުރައިފި، ކިމް ޖޮންގް އުންއާ ބައްދަލުކޮށްފައެއް ނުވޭ
އެމެރިކާގެ ރައީސް، ޑޮނަލްޑް ޓްރަމްޕް އުތުރު ކޮރެއާގެ ރައީސް، ކިމް ޖޮންގް އުންއާ ޗައިނާ ދަތުރުގައި ބައްދަލުކުރާނެ ކަމުގެ އަޑުތައް ގަދަވެފައިވަނިކޮށް ޓްރަމްޕް ޗައިނާއިން ފުރައިފިއެވެ.
ޗައިނާގެ ޝެންޒެންގައި ޓްރަމްޕް އަދި ކިމް ބައްދަލުކުރާނެ ކަމުގެ އުއްމީދު ޓްރަމްޕް ހިމެނޭހެން ގިނަ ބަޔަކު ކުރިއެވެ.
ޝެންޒެންގައި ކުރިއަށްދިޔަ ބައިނަލްއަޤްވާމީ ސަމިޓްގެ ހަވާސާގައި ޓްރަމްޕް ވަނީ ރަޝިޔާ އަދި ޗައިނާގެ ލީޑަރުންނާ ބައްދަލުކޮށްފައެވެ. މި ދަތުރުގެ ތެރެއިން އުތުރު ކޮރެއާގެ ލީޑަރާވެސް ބައްދަލުކުރުމުގެ ފުރުސަތު އޮތް ކަމަށް ޓްރަމްޕް ވަނީ ތަކުރާރުކޮށް ބުނެ، އެކަމަށް އުއްމީދު ކުރާ ކަމަށް ބުނެފައެވެ. ނަމަވެސް މީޑިއާތަކުން ވަނީ ޓްރަމްޕް ކިމް އާ ބައްދަލުނުކުރާކަމަށް ރިޕޯޓްކޮށްފައެވެ.
ނަމަވެސް، ކިމް ޖޮންގް އުންގެ ފަރާތުން ނުވަތަ އުތުރު ކޮރެއާގެ ސަރުކާރުން މިފަދަ ބައްދަލުވުމެއް ބޭއްވުމާ ގުޅޭގޮތުން އެއްވެސް ރަސްމީ ޔަޤީންކަމެއް ދީފައެއް ނުވެއެވެ. އުތުރު ކޮރެއާގެ ފަރާތުން އެއްވެސް އިޝާރާތެއް ނުލިބި އޮއްވައި، ޓްރަމްޕްގެ ޝެންޒެން ދަތުރު ނިންމައިލުމާއެކު، ދެ ލީޑަރުންގެ ބައްދަލުވުމެއް ނުބޭއްވޭނެކަން ވަނީ ޔަޤީންވެފައެވެ.
މި ބައްދަލުވުން ހަމަޖެހިގެން ނުދިޔަ ނަމަވެސް، ޓްރަމްޕްގެ ފުރަތަމަ ރިޔާސީ ދައުރުގައި ދެ ލީޑަރުންގެ މެދުގައި ވަނީ ތާރީހީ ބައްދަލުވުންތަކެއް ބާއްވާފައެވެ. އެގޮތުން، ދެ ކޮރެއާ ވަކިކުރާ ޑީމިލިޓަރައިޒްޑް ޒޯން (ޑީއެމްޒީ) ގެ 38 ވަނަ ޕެރަލަލް ހުރަސްކޮށް، އުތުރު ކޮރެއާ އަށް ވަން ފުރަތަމަ އެމެރިކާގެ ރައީސް ކަމުގެ ޝަރަފު ޓްރަމްޕް ވަނީ ހޯދާފައެވެ.
ޝެންޒެންގައި ދުނިޔޭގެ ބޮޑެތި ބާރުތަކުގެ ލީޑަރުންނާއެކު ޓްރަމްޕް ވަނީ މުހިންމު މަޝްވަރާތަކެއް ކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް