ސުނާމީއެއްގެ އިންޒާރު ދީފައެއް ނުވާނެ، ދައުރުވަމުން ދަނީ ދޮގު މެސެޖެއް: އެންޑީއެމްއޭ
ރާއްޖެއަށް ސުނާމީއެއް އަރާނެކަމަށް ބުނެ އެއްވެސް އިންޒާރެއް ނެރެފައި ނުވާނެ ކަމަށާއި، މިހާރު ސޯޝަލް މީޑިއާގައި ދައުރުވަމުންދަނީ ކަނޑައެޅިގެން ދޮގު ޚަބަރެއް ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މިއަދު ބުނެފިއެވެ.
އިންޑޮނޭޝިއާގެ ސުމަޓްރާ ކައިރިއަށް ބާރުގަދަ ބިންހެލުމެއް އައިސް، އޭގެ ސަބަބުން ރާއްޖެއަށް ސުނާމީއެއް އަރާފާނެ ކަމުގެ އިންޒާރު އެންޑީއެމްއޭއިން ދީފައިވާ ކަމަށް ބުނެ، މިއަދުގެ ވަގުތެއްގައި ސޯޝަލް މީޑިއާގެ އެކި މަންސަތަކުގައި މެސެޖެއް ވަނީ ދައުރުވާން ފަށައިފައެވެ. މިކަމާ ގުޅިގެން ރައްޔިތުންގެ މެދުގައި ބިރުވެރިކަން އުފެދިފައި ވަނިކޮށް، އެންޑީއެމްއޭ އިން ވަނީ އެ މައުލޫމާތުތައް ދޮގުކޮށްފައެވެ.
އެންޑީއެމްއޭ އިން ބުނީ ސޯޝަލް މީޑިއާގައި ދައުރުވަމުންދާ މެސެޖަކީ ކަނޑައެޅިގެން ދޮގު މައުލޫމާތެއްގެ މައްޗަށް އެކުލަވާލައިގެން އާންމުކޮށްފައިވާ ލިޔުމެއް ކަމަށެވެ. އަދި އެ ސަރަހައްދަށް އެފަދަ ބިންހެލުމެއް އައިސް ސުނާމީއެއްގެ އިންޒާރެއް އެ އިދާރާއަށް ލިބިފައިނުވާ ކަމަށާއި، އަދި އެ އިދާރާއިން ވެސް އެފަދަ އެއްވެސް އިންޒާރެއް ނުވަތަ އެންގުމެއް ނެރެފައި ނުވާނެ ކަމަށް ވަނީ ޔަގީންކޮށްދީފައެވެ.
މިކަމާ ގުޅިގެން އެންޑީއެމްއޭ އިން ނެރުނު ބަޔާނުގައި ވިދާޅުވީ، އެ އޮތޯރިޓީގެ ނަމުގައި ދައުރުވަމުން އަންނަ އެ މެސެޖަކީ އެއްވެސް އަސްލެއް ނެތް މެސެޖެއް ކަމަށެވެ. އަދި ކާރިސާތަކާ ގުޅޭ އެންމެހައި މައުލޫމާތާއި އިރުޝާދުތައް އާންމުންނާ ހިއްސާކުރަމުން ގެންދާނީ އެ އޮތޯރިޓީގެ ރަސްމީ މަންސަތަކުން އެކަނި ކަމަށް ވެސް ވަނީ ފާހަގަކޮށްފައެވެ.
"މި އޮތޯރިޓީގެ ނަމުގައި ދައުރުވަމުން އަންނަ މި މެސެޖަކީ ހަޤީގީ މެސެޖެއް ނޫންކަމުގައި ދަންނަވަމެވެ. މި އޮތޯރިޓީއިން ޢާއްމުންނާ ޙިއްސާކުރާ މަޢުލޫމާތާއި އިރުޝާދު ދެމުންގެންދާނީ މި އޮތޯރިޓީގެ ރަސްމީ މަންސަތަކުންނެވެ. މިކަން ހުރިހާ ފަރާތްތަކުންވެސް ކަށަވަރުކުރުމަށް އެދެމެވެ،" އެންޑީއެމްއޭގެ ބަޔާނުގައި ވެއެވެ.
މީގެއިތުރުން، ގުދުރަތީ ކާރިސާތައް ފަދަ އާންމު ސަލާމަތާއި ރައްކާތެރިކަމާ ގުޅުންހުރި ހައްސާސް މައުލޫއުތަކުގައި، ހަގީގަތެއް ނެތް ވާހަކަތައް ނުފެތުރުމަށާއި، ކަންކަމުގެ މައުލޫމާތު ފެތުރުމުގައި ހުރިހާ ފަރާތްތަކުންވެސް ޒިންމާދާރުކަމާއެކު އަމަލުކުރުމަށް އެންޑީއެމްއޭ އިން ވަނީ އިލްތިމާސްކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް