ޤައުމަށް ތަރައްޤީގެ އެންމެ ފައިދާހުރި ގޮތް ހޯދުމުގައި ދިވެހިންނަކީ ނަމޫނާ ބައެއް: ރައީސް
ޤައުމަށް ތަރައްޤީގެ އެންމެ ފައިދާހުރި އަދި އެންމެ ލާބަހުރި ގޮތްތައް ހޯދައި، އެ މަގުން ކުރިއަށް ދިއުމުގައި ދިވެހި ރައްޔިތުންނަކީ އަބަދުވެސް ލާމަސީލު ނަމޫނާ ބައެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޖުމްހޫރީ ދުވަހުގެ މުނާސަބަތުގައި ބޭއްވެވި ރަސްމީ ޖަލްސާގައި ޤައުމާ މުޚާޠަބު ކުރައްވައި ރައީސް ޑރ.މުއިއްޒު ދެއްކެވި ވާހަކަ ފުޅުގައި ވިދާޅުވީ، ދިވެހިންގެ ތާރީޚުގައި ދީނީ، ސިޔާސީ އަދި އިޤްތިޞާދީ ގޮތުން ނިންމާފައިވާ މުހިންމު ނިންމުންތަކުން ދައްކުވައިދެނީ ދިވެހިންނަކީ ޒަމާނީ ކުރިއެރުމާއި ހޭލުންތެރިކަމަށް އަބަދުވެސް ލޯބިކުރާ ބައެއް ކަމަށެވެ.
އެގޮތުން، ދުނިޔެއަށް އިސްލާމްދީން ފެތުރިގެން ދިޔައިރު، ވަށައިގެންވާ މާޙައުލަށް ބެލުމެއް ނެތި ދިވެހިން އިސްލާމްދީން ޚިޔާރުކުރީ އެއީ ޙައްޤު ދީން ކަމުގައި ވާތީ ކަމަށް ރައީސް ވިދާޅުވިއެވެ. އަދި ސިޔާސީ ގޮތުން ބަލާއިރު މި ސަރަޙައްދުގައި އެންމެ ފުރަތަމަ ލިޔެވިފައިވާ ޤާނޫނު އަސާސީއެއް އެކުލަވާލައި، ރަސްކަމަކުން އިންތިޚާބީ ރަސްކަމަކަށް، އަދި ޖުމްހޫރިއްޔަތަކުން ޒަމާނީ ޑިމޮކްރަސީއަށް ދިވެހިން ކުރި ދަތުރަކީ ވެސް ޤައުމަށް އެންމެ ފައިދާހުރި މަގު އިޚްތިޔާރުކުރުމުގެ ހެއްކެއް ކަމުގައި އެމަނިކުފާނު ބަޔާންކުރެއްވިއެވެ.
ރާއްޖޭގެ ތަރައްޤީގެ ތާރީޚަށް އަލިއަޅުއްވާލައްވަމުން ރައީސް ވަނީ ކުރީގެ ވެރިން ގެންނެވި ބަދަލުތަކުގެ މިސާލު ދައްކަވާފައެވެ. އެގޮތުން ރާއްޖޭގެ ފުރަތަމަ ރައީސް ސުމުއްވުލް އަމީރު މުޙައްމަދު އަމީން ދޮށިމޭނާ ކިލެގެފާނު އަންހެން ކުދިންނަށް ތަޢުލީމު ދެއްވުމަށާއި، ރަށްރަށުގައި ފުޅާ މަގުތައް ހެއްދެވުމަށް ފެއްޓެވި މަސައްކަތްޕުޅަށް ބައެއް ފަރާތްތަކުން ދެކޮޅުހެދި ނަމަވެސް، ރައްޔިތުން އެކަން ބަލައިގަނެ ޤައުމަށް ފައިދާހުރި ނަތީޖާ ނެރެދިންކަން ފާހަގަކުރެއްވިއެވެ. ހަމައެއާއެކު، ދެވަނަ ރައީސް ސުމުއްވުލް އަމީރު އިބްރާހީމް ނާޞިރުގެ ޒައާމަތުގައި މަސްދޯނިފަހަރުގައި އިންޖީނު އެޅުމަށް ބަޔަކު ދެކޮޅުހެދި ނަމަވެސް، ވިސްނުންތެރި އޮޑިވެރިން އެކަން ބަލައިގަތުމާއި، ރާއްޖޭގައި ފަތުރުވެރިކަން ނުހިންގޭނެ ކަމަށް ބޭރުގެ މާހިރުން ނިންމާފައި ވަނިކޮށް ދިވެހިން ނުކުމެ އެ ސިނާޢަތް ކާމިޔާބުކޮށް، މިއަދު އިޤްތިޞާދުގެ މައި ތަނބަކަށް ހަދާފައިވާކަން ވެސް ރައީސް ހަނދާންކޮށްދެއްވިއެވެ.
މި ޙާދިސާތަކަށް ބަލާއިރު ވެސް ދިވެހި ރައްޔިތުން ކުރެ ގިނަ ބޭފުޅުން އަބަދުވެސް ކުރިއެރުމާ ޒަމާނީ ތަރައްޤީ އަށް މަރުޙަބާ ވިދާޅުވާ ކަން އެނގޭ. އިސްކުރައްވަނީ ޤައުމީ ވިސްނުންކަން ސާފުވޭ. އެހެނީ ދިވެހި ރައްޔިތުން އެވަނީ ހޭލުންތެރި ކަމަށް މަދަނީ ތަރައްޤީ އަށް ބޮޑު ތަރުޙީބެއް ދެއްވާފަ. ދިވެހި ރައްޔިތުން ބޭނުންވަނީ ހޭލުންތެރި ދިވެހި ޤައުމެއް.
ރައީސް ޑރ. މުޢިއްޒު ވިދާޅުވީ، އެމަނިކުފާނުގެ ސަރުކާރުގެ ތަރައްޤީގެ ސިޔާސަތު ބިނާވެފައިވަނީ އިސްލާމްދީނުގެ މަތީގައިވާ އިންސާނީ ތަރައްޤީއާއި، ޒަމާނީ ޢުމްރާނީ ތަރައްޤީގެ މައްޗަށް ކަމަށެވެ. އަދި އަމާޒަކީ ދިވެހި ޤައުމިއްޔަތާއި އިސްލާމީ ބިންގަލުގެ މަތީގައި ސިޔާދަތާއި މިނިވަންކަން ދަމަހައްޓައި، އީޖާދީ އިޤްތިޞާދަކާއި ތަޢުލީމީ، ހުނަރުވެރި، ދުޅަހެޔޮ މުޖުތަމަޢެއް ބިނާކޮށް، ދުނިޔެއަށް ލޯހުޅުވިފައިވާ ތަހުޒީބީ ޤައުމަކަށް ދިވެހިރާއްޖެ ހެއްދެވުން ކަމުގައި އެމަނިކުފާނު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް