ދީނުގެ ރޮނގުން ޚިދުމަތްކުރުމުގެ އެންމެ މަތިވެރި ޝަރަފް ޑރ. މުޙައްމަދު ރަޝީދު އިބްރާހިމަށް އަރުވައިފި
އިސްލާމްދީނަށް ހޭލުންތެރިކަން އިތުރުކުރުމާއި ދީނުގެ ރޮނގުން ޚިދުމަތްކުރުމުގެ އެންމެ މަތިވެރި ޝަރަފް، ނިޝާން އިއްޒުއްދީނުގެ އިއްޒަތުގެ ވެރިޔާ ޑރ. މުޙައްމަދު ރަޝީދު އިބްރާހިމަށް އަރުވައިފި އެވެ.
ޑރ. މުޙައްމަދު ރަޝީދު އިބްރާހިމަށް، މި ޝަރަފު އަރުވާފައިވަނީ ޖުމްހޫރީ ދުވަހުގެ މުނާސަބަތުގައި މިރޭ ބޭއްވެވި ރަސްމީ ޖަލްސާގަ އެވެ.
މިރޭ އޮތް ޖަލްސާގައި އެ އެވޯޑް، ޑރ. ރަޝީދުގެ އާއިލާއާ ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ. އެމަނިކުފާނަށް މި ޝަރަފު އަރުވާފައިވަނީ އިސްލާމްދީނަަށް ހޭލުންތެރިކަން އިތުރުކުރުމަށާއި އެ ދާއިރާއިން މި ޤައުމަށް އެމަނިކުފާނު ކޮށްދެއްވާފައިވާ ޚިދުމަތުގެ އަގު ވަޒަންކުރެއްވުމުގެ ގޮތުން ކަމަށް ރައީސުލްޖުމްހޫރިއްޔާގެ އޮފީހުން ބުނެ އެވެ.

ޑރ. މުޙައްމަދު ރަޝީދު އިބްރާހިމަކީ ވަރަށް ބޮޑު ޢިލްމުވެރި އެކެވެ. ދިވެހީންގެ ދީނީ ހޭލުންތެރިކަން އިތުރުކުރެއްވުމަށް ވަރަށް ގިނަގުނަ މަސައްކަތްޕުޅު ކުރައްވާފައިވެ އެވެ.
އެމަނިކުފާނު ވަނީ އިސްލާމީ ކަންތައްތަކާއި ބެހޭ އެންމެ މަތީ މަޖިލީހުގެ ރައީސް ކަމުގެ މަޤާމާއި އިސްލާމީ ކަންތައްތަކާއި ބެހޭ މިނިސްޓްރީގެ މިނިސްޓަރުގެ އެޑްވައިޒަރުކަމުގެ މަޤާމާއި އިސްލާމީ ފަތުވާދޭ އެންމެ މަތީ މަޖިލީހުގެ ރައިސް ކަމާއި މެންބަރުކަން ކުރައްވާފަ އެވެ. އަދި ކީރިތި ޤުރުއާނުގެ ދިވެހި ތަރުޖަމާން ކުރެއްވި ކޮމެޓީގެ ރައީސް ކަމާއި މެންބަރުކަން ވެސް ކުރެއްވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް