ރިއަލް އެސްޓޭޓް ބިލަށް، އާންމުންގެ ހިޔާލަށް ހުޅުވާލައިފި
ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ރިއަލް އިސްޓޭޓް ބިލަށް އާންމުންގެ ހިޔާލަށް އެދި މިއަދު ރައްޔިތުންގެ މަޖިލީހުން މިއަދު ހުޅުވާލައިފިއެވެ.
ރައްޔިތުންގެ މަޖިލީހަށް ސަރުކާރުގެ ފަރާތުން ރިއަލް އެސްޓޭޓް ވިޔަފާރީގެ ބިލު ހުށަހެޅުއްވީ ހެންވޭރު އުތުރު ދާއިރާގެ މެންބަރު އަޙްމަދު އައިފާނެވެ. މި ބިލް މިހާރު އޮތީ ދިރާސާކުރުމުގެ މަރުހަލާގައި މަޖިލީހުގެ ގައުމީ ތަރައްގީއާއި ތަރިކަ ކޮމިޓީގައެވެ. މި ބިލް ކޮމިޓީއަށް ފޮނުވާފައިވަނީ އިއްޔެއެވެ.
ސަރުކާރުން މި ބިލް ހުށަހެޅުމުގެ މައިގަނޑު މަޤްޞަދުތަކުގެ ތެރޭގައި ދިވެހިރާއްޖޭގެ ރިއަލް އެސްޓޭޓް ވިޔަފާރީގެ ދާއިރާ ދެމެހެއްޓެނިވި ގޮތެއްގައި ތަރައްޤީކޮށް ކުރިއެރުވުމާއި، ހާމަކަންބޮޑު އަދި ޖަވާބުދާރީވަނިވި ނިޒާމެއްގެ ތެރެއިން މި ވިޔަފާރި ހިންގޭނެ ހަރުދަނާ ޤާނޫނީ އޮނިގަނޑެއް އެކުލަވައިލުން ހިމެނެއެވެ. މީގެ އިތުރުން، މި ދާއިރާގައި މަސައްކަތްކުރާ ޑިވެލޮޕަރުން ރަޖިސްޓަރީކުރުމާއި، އެ ފަރާތްތަކުގެ ޙައްޤުތަކާއި ޒިންމާތައް ކަނޑައެޅުމާއި، ޕްރޮޕަޓީ ގަންނަ ފަރާތްތަކުގެ މަޞްލަޙަތު ރައްކާތެރިކުރުމުގެ އިތުރުން މުޅި ނިޒާމު މޮނިޓަރކުރެވޭނެ ހަރުދަނާ އުސޫލުތަކެއް ކަނޑައެޅުންވެސް މި ބިލުގެ މަޤްޞަދުތަކުގެ ތެރޭގައި ހިމެނެއެވެ.
ސަރުކާރުން ރަސްމާލޭގެ ބިމުގެ ބައެއް ތަރައްޤީކޮށް ހިންގުމަށް ޔޫއޭއީގެ އީގަލް ހިލްސްއަށް ދިނުމަށް މަސައްކަތްކުރަމުންދަނިކޮށް ރިއަލް އެސްޓޭޓް ބިލް އާންމުންގެ ހިޔާލަށް ހުޅުވާލާފައިވާއިރު، އެފަދަ މަޝްރޫޢުއާ ގުޅުންހުރި ބައެއް ކަންކަން މި ބިލްގައި ހިމެނޭކަން ފާހަގަކޮށްލެވެއެވެ. އެގޮތުން ބޭރުގެ އެއްވެސް ޕާޓިއަކަށް ރާއްޖޭގެ އެއްވެސް ސަރަހައްދެއްގައި މަޝްރުޢުއެއް ކުރިއަށްގެންދެވޭނީ އިސްލާމީ ޝަރިއަތާ ހިލާފް ނުވާ ގޮތުގެ މަތިންނެވެ. އެގޮތުން ބިލުގެ 77 ވަނަ މާއްދާގެ (ރ) ގައި ބަޔާންކޮށްފައިވަނީ، މިފަދަ ޒޯންތަކުގައި ތަރައްޤީކުރާ ތަންތަނަށް އަދި އެތަނުގައި ހިންގާ ވިޔަފާރިތަކަށް ނުވަތަ ދިރިއުޅޭ ފަރާތްތަކަށް ބަނގުރަލާއި، ބަނގުރާ އެކުލެވޭ ތަކެއްޗާއި، އޫރުމަހާއި އޫރުމަހުން އުފައްދާ ތަކެތި އެތެރެކުރުމާއި، ވިއްކުމާއި ބޭނުންކުރުމަކީ މުޅިން މަނާކަމެއް ކަމަށެވެ.
އަދި ބިލުގެ 98 ވަނަ މާއްދާގައިވާ ގޮތުން، ޖުވާ ކުޅުން ފަދަ ޝަރީޢަތުގައި ޙަރާމްކުރައްވާފައިވާ ކަންކަމަށް މަގުފަހިވާ އެއްވެސް ވިޔަފާރިއެއް ނުވަތަ ޚިދުމަތެއް މި ޒޯންތަކުގައި ނުހިންގޭނެއެވެ. މި ބިލަށް ހިޔާލު ހުށަހެޅުމުގެ އެންމެ ފަހު ތާރީހަކީ އަންނަ ޑިސެމްބަރުމަހުގެ ދެވަނަ ދުވަހެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް