ތިން އަހަރުތެރޭގައި 1.4 ބިލިއަން ރުފިޔާގެ މަސްތުވާތަކެތި އަތުލައިގަނެވުނު: ދާހިލީ ވުޒާރާ
ވޭތުވެދިޔަ ތިން އަހަރުތެރޭގައި 1.4 ބިލިއަން ރުފިޔާގެ މަސްތުވާތަަކެތި އަތުލައިގެންފައިވާ ކަމަށް ދާހިލީ ވުޒާރާގެ ތަފާސްހިސާބުތަކުން ދައްކައިފިއެވެ.
ދާހިލީ ވުޒާރާއިން މިއަދު ނެރުނު ތަފާސްހިސާބުތަކުން ދިވެހިރާއްޖޭގެ މަސްތުވާތަކެތީގެ މައްސަލައާއި ގުޅޭގޮތުން ކަންބޮޑުވާފަދަ އަދަދުތަކެއް ހިއްސާކޮށްފައިވެއެވެ.
އެގޮތުން، ވޭތުވެދިޔަ ތިން އަހަރުތެރޭގައި 1.4 ބިލިއަން ރުފިޔާގެ މަސްތުވާތަކެތި ކަމާބެހޭ ފަރާތްތަކުން އަތުލައިގެންފައިވާއިރު، 16،852 ބަނގުރާ ފުޅި އާއި މަސްތުވާތަކެތީގެ ވިޔަފާރި ހިންގާ 11 ތަނެއް ވަނީ ބަންދުކޮށްފައެވެ. މީގެ އިތުރުން، މަސްތުވާތަކެއްޗާއި ދެކޮޅަށް 508 އޮޕަރޭޝަން އާއި މަސްތުވާތަކެއްޗާއި ގުޅުންހުރި މާލީ ކުށްތަކާއި މަނީ ލޯންޑަރިންގ ގެ ތަހުގީގުތައްވެސް ކަމާބެހޭ ފަރާތްތަކުން ކުރިއަށް ގެންގޮސްފައިވެއެވެ.
ތަފާސްހިސާބުތަކުން ދައްކާ ގޮތުގައި، ވޭތުވެދިޔަ ތިން އަހަރުތެރޭގައި އަތުލައިގެން މަސްތުވާތަކެތީގެ ބަރުދަން 1.32 ޓަނަށް އަރައެވެ.
މަސްތުވާތަކެތީގެ މައްސަލަ ރާއްޖޭގައި ވަރަށް ބޮޑަށް ގޯސްވެފައިވާއިރު، ކަމާބެހޭ ފަރާތްތަކުން ދަނީ މަސްތުވާތަކެތި ގަނެވިއްކާ ފަރާތްތައް ހުއްޓުވުމުގެ ގޮތުން ގިނަ އޮޕަރޭޝަންތަކެއް ކުރިއަށްގެންދަމުންނެވެ. ހަމައެއާއެކު، ސަރުކާރުން ވަނީ މަސްތުވާތަކެއްޗާއި ގުޅޭ ކުށްތަކަށް ދެވޭ އަދަބުތައް އިތުރަށް ހަރުކަށި ކުރުމުގެ ގޮތުން ހަރުދަނާ ފިޔަވަޅުތަކެއް އަޅާފައެވެ.
އެގޮތުން މަސްތުވާތަކެތި ބޭނުންކުރުމުގެ ފުރުސަތު ފަހިކޮށްދޭ ތަންތަން ބަންދުކުރުމުގެ ބާރު ފުލުހުންނާއި ކޯޓުތަކަށް ލިބިދޭ ގޮތަށް، މަސްތުވާތަކެއްޗާ ބެހޭ ޤާނޫނަށް ގެނައި އިޞްލާހުތަކަށް 7 މާރިޗު 2026 އިން ފެށިގެން އަމަލުކުރަން ފަށާފައިވާކަން ފާހަގަކޮށްލެވެއެވެ.
މި ގެނެވުނު އިޞްލާޙުގެ ދަށުން، މަސްތުވާތަކެތި ބޭނުންކުރާ ކަމަށް ޝައްކުކުރެވޭ ތަންތަން 24 ގަޑިއިރުގެ މުއްދަތަށް ބަންދުކުރުމުގެ ނޯޓިސް ދިނުމުގެ އިޚްތިޔާރު ފުލުހުންނަށް ވަނީ ދީފައެވެ. އަދި އެފަދަ ތަންތަން ގިނަވެގެން ތިން މަސް ދުވަހުގެ މުއްދަތަށް ބަންދުކޮށްފައި ބެހެއްޓުމުގެ އަމުރު ނެރުމުގެ ޤާނޫނީ ބާރު ކޯޓުތަކަށް މިހާރު ވަނީ ލިބިދީފައެވެ.
ޤާނޫނުގައިވާ ގޮތުން މަސްތުވާތަކެތި ބޭނުންކުރުމަށް ތަނެއް ދެއްކުމާއި އެފަދަ ޚިދުމަތެއް ފޯރުކޮށްދިނުމަކީ ޖިނާއީ ބޮޑު ކުށެކެވެ. އެފަދަ ކުށެއް ސާބިތުވެއްޖެނަމަ 5 އަހަރު ދުވަހުގެ ޖަލު ޙުކުމެއް އައުމާއެކު، 100,000 (އެއްލައްކަ) ރުފިޔާއާ ހަމައަށް ޖޫރިމަނާ ކުރެވޭނެއެވެ. މީގެއިތުރުން، އެ ތަނަކީ މަސްތުވާތަކެތި ބޭނުންކުރުމަށް ބޭނުންކުރާ ތަނެއްކަން އެނގިހުރެ އެކަމަށް ހުއްދަދިނުމާއި އެކަން ހުއްޓުވަން މަސައްކަތް ނުކުރުމަކީ ވެސް، އެ ތަނެއްގެ ވެރިފަރާތާއި، ކުއްޔަށް ހިފާފައިވާ ފަރާތް ނުވަތަ އެ ތަނެއް ބެލެހެއްޓުމާ ޙަވާލުވެހުރި ފަރާތަކުން ކުރާ ޤާނޫނީ ކުށެއް ކަމުގައި ވަނީ ކަނޑައަޅާފައެވެ.
ކޯޓު އަމުރެއްގެ ދަށުން ބަންދުކޮށްފައި ހުންނަ މުއްދަތުގައި، އެއްވެސް ހުއްދައަކާ ނުލައި އެފަދަ ތަންތަނަށް ވަދެނިކުމެ ހެދުމަކީ މަނާކަމެކެވެ. އަދި ބަންދުކޮށްފައިވާ ތަންތަނަށް ހުއްދަނެތި ވަންނަ ފަރާތްތަކަށާއި، އެ ތަންތަނަށް އެކި ގޮތްގޮތުން ގެއްލުންދޭ ފަރާތްތަކާ ދެކޮޅަށް ޤާނޫނުގައިވާ އެންމެ ހަރުކަށި ފިޔަވަޅު އަޅަމުން ގެންދާނެ ކަމަށް ވެސް ފުލުހުން ބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް