އެމެރިކާ އަސްކަރިއްޔާގެ ދެ މަތިންދާބޯޓު ވީއައިއޭއަށް ޖައްސައިފި

އެމެރިކާ އަސްކަރިއްޔާގެ މެރިން ކޯޕްސްއަށް ނިސްބަތްވާ ދެ މަތިންދާބޯޓެއް ވެލާނާ އިންޓަނޭޝަނަލް އެއާޕޯޓް (ވީއައިއޭ) އަށް ޖައްސައިފިއެވެ.

ބެލް-ބޯއިންގް އެމް.ވީ-22ބީ އޮސްޕްރޭގެ މި ދެބޯޓަކީ، މައިގަނޑު ގޮތެއްގައި އެމެރިކާގެ މެރިން ކޯޕްސްއިން ހަމަލާތަކަށް އެހީތެރިވުމަށާއި، ސިފައިން އުފުލުމަށާއި، އަދި ހަނގުރާމައިގެ ލޮޖިސްޓިކްސްއަށް ބޭނުންކުރާ، މެދު ފަންތީގެ ލިފްޓު އުފުލާ ޓިލްޓްރޯޓަރ (ހެލިކޮޕްޓަރެއްގެ ސިފަ އެކުލެވިގެންވާ) ބޯޓެކެވެ.

މިއަދު އެކްސްގައި ރާއްޖެއަށް އަންނަ މިފަދަ ބޯޓުތަކާއި ވައިގެ ދަތުރުފަތުރާ ގުޅޭ ހަބަރުތައް ގެނެސްދޭ އެކައުންޓެއް ކަމަށްވާ "އޭވިއޭޓާސް މޯލްޑިވްސް" އިން ވަނީ، މި ބޯޓުތައް ވީއައިއޭގައި ޓެކްސީ ކުރަމުންދާ މަންޒަރު ފެންނަ ވީޑިއޯއެއް ހިއްސާކޮށްފައެވެ.

ވެލާނާ އިންޓަނޭޝަނަލް އެއާޕޯޓަކީ، އެކި ގައުމުތަކުގެ އަސްކަރިއްޔާއިން އެއް ގައުމުން އަނެއް ގައުމަށް ދަތުރުކުރާއިރު ތެޔޮ އެޅުމަށްޓަކައި އިހްތިޔާރުކުރާ އެއާޕޯޓެކެވެ. ރާއްޖެ އޮންނަ ސަރަހައްދުގެ ސަބަބުން މުދާ އުފުލާ އެހެނިހެން ބޯޓުތައް ވެސް ރާއްޖެއަށް އާންމުކޮށް އާދެއެވެ.

އެމެރިކާއިން އީރާނާ ދެކޮޅަށް މިވަގުތު ހަނގުރާމަ ކުރަމުންދާއިރު، ހަނގުރާމަ ފެށުނު ފަހުން މީގެ ކުރިންވެސް އެމެރިކާ އަސްކަރިއްޔާގެ ބޯޓެއް ވަނީ ރާއްޖެއަށް އައިސްފައެވެ. މިކަމާއި ގުޅޭ ގޮތުން، ސަރުކާރުން ވަނީ އެއްވެސް ހަނގުރާމައަކުން ނިމިގެން ނޫނީ ހަނގުރާމައަކަށް ދިއުމަށްޓަކައި ވިޔަސް އެއްވެސް ބޯޓަކަށް އެހީތެރިކަން ފޯރުކޮށްދީފައިނުވާނެ ކަމަށާއި ކުރިއަށް އޮތްތާވެސް ފޯރުނުކޮށްދޭނެ ކަމުގެ ޔަގީންކަން ދެއްވާފައެވެ.