ތާލިބާނުން ހަތިޔާރާއި ހަނގުރާމަވެރިން ފޮރުވުމަށް ސިއްރު ބިންގަރާސްތަކެއް ބިނާކުރަނީ

އަފްޣާނިސްތާނުގައި ވެރިކަންކުރާ ޠާލިބާން ޖަމާއަތުން އެ ގައުމުގެ ގަންދަހާރުގައި ބިމުގެ އަޑީގެ ބިންގަރާސްތަކާއި، ހަތިޔާރު ރައްކާކުރާ ގުދަންތަކުގެ އިތުރުން ރައްކާތެރި މަރުކަޒުތަކެއް ބިނާކުރަމުންދާކަން ހާމަވެއްޖެއެވެ.

މިކަން ހާމަވެފައިވަނީ ސެޓެލައިޓް ފޮޓޯތަކާއި، އެ ސަރަޙައްދުގައި ދިރިއުޅޭ ރައްޔިތުންނާ ޙަވާލާދީ 'އަފްޣާނިސްތާން އިންޓަނޭޝަނަލް' އިން ކުރިއަށްގެންދިޔަ ތަޙްޤީޤީ ރިޕޯޓަކުންނެވެ.

ތަހުގީގުން އެނގުނު ގޮތުގައި، ހާއްސަކޮށް ގަންދަހާރާއި އަފްޣާނިސްތާނުގެ އެކި ކަންކޮޅުތަކުގައި މިފަދަ މަސައްކަތްތައް ވަރަށް ފުޅާދާއިރާއެއްގައި ކުރިއަށްގެންދާއިރު، މި ތަންތަނަކީ ބާރުގަދަ ހަތިޔާރާއި ވަޒަން ރައްކާކުރުމަށާއި، ވައިގެ މަގުން ދީފާނެ ހަމަލާތަކުން އަސްކަރީ ސާމާނު ސަލާމަތްކުރުމުގެ އިތުރުން، އެ ޖަމާއަތުގެ އިސްވެރިން ފިލައިތިބުމަށް ހާއްސަކޮށްގެން ބިނާކުރާ ތަންތަން ކަމަށް ބެލެވެއެވެ. ބިން ކޮނުމުގެ މި ބޮޑު މަސްރޫއު ހިންގަމުންދަނީ ގަންދަހާރުގެ އައިނޯ މީނާގެ ފަރުބަދަމަތީ ސަރަހައްދުތަކާއި، އެއާޕޯޓްގެ ވަށައިގެންވާ ސަރަހައްދުތަކުގެ އިތުރުން މައިވަންދު، ޒާރީ އަދި ސްޕިން ބޯލްދަކް ފަދަ ޑިސްޓްރިކްޓްތަކުގައި ކަމަށް ރިޕޯޓުގައި ވަނީ ބުނެފައެވެ.

ބިމުގެ އަޑީގެ ވަރުގަދަ ވިއުގަ

މައުލޫމާތު އެނގޭ ފަރާތްތަކުން ހާމަކުރި ގޮތުގައި، މީގެ 18 މަސްދުވަސް ކުރިން ފެށި މި މަސައްކަތުގެ ދަށުން ބިނާކުރާ ބިންގަރާސްތަކުގެ ތެރޭގައި އެކި ބޭނުންތަކަށް ހާއްސަ ތަންތަން ހިމެނެއެވެ. އޭގެ ތެރޭގައި ދަތުރުފަތުރަށާއި މުދާ ރައްކާކުރުމަށް ބޭނުންކުރާ ބިންގަރާސްތަކުގެ އިތުރުން، ބޮޑެތި އަސްކަރީ އުޅަނދުފަހަރު ވަދެނިކުމެ ހެދޭ ގޮތަށް ފަރުމާކޮށްފައިވާ ބޮޑެތި ބިންގަރާސްތައް ހިމެނެއެވެ. އަދި ބައެއް ތަންތަނަކީ މީހުންނަށް ދިގު މުއްދަތަކަށް ދިރިއުޅެވޭނެހެން ފެނާއި ކާބޯތަކެތީގެ އިންތިޒާމުތަކާއެކު ޢިމާރާތްކޮށްފައިވާ ތަންތަނެވެ.

މަސައްކަތުގައި ހަރަކާތްތެރިވާ ބައެއް މީހުން ބުނިގޮތުގައި، ހަރު ހިލަތައް ފަޅާލުމަށް ބާރުގަދަ ގޮވާތަކެތި ބޭނުންކުރަމުންދާއިރު، މި ސަރަހައްދުތަކުގެ ސަލާމަތީ ކަންކަން ވަނީ އިންތިހާއަށް ވަރުގަދަކޮށްފައެވެ. މަސައްކަތްކުރާ ތަން ސިއްރުކުރުމުގެ ގޮތުން، މަސައްކަތު މީހުން އެތަންތަނަށް ގެންދަނީ ލޯމަތީގައި ފޮތިގަނޑު އަޅުވައިގެން ކަމަށްވެސް ރިޕޯޓުގައި ފާހަގަކޮށްފައިވެއެވެ.

މުއްލާ ޢުމަރުގެ ތާރީހީ ގޯތި

މި ތަހުގީގުގައި ފާހަގަކޮށްފައިވާ މުހިންމު އެއް ތަނަކީ، ޠާލިބާނުންގެ ބާނީ މުއްލާ މުޙައްމަދު ޢުމަރު ކުރިން ދިރިއުޅުއްވި ޤަންދަހާރުގެ ގެކޮޅެވެ. މިހާރު މިތަން ބަލަހައްޓަނީ ޠާލިބާނުންގެ އެންމެ މަތީ ވެރިޔާ ހިބަތުﷲ އަޚުންޒާދާގެ ސަލާމަތީ ކަންކަން ބަލަހައްޓާ ހާއްސަ "ޢުމަރީ ޔުނިޓް" އިންނެވެ. ސެޓެލައިޓް ފޮޓޯތަކުން ދައްކާ ގޮތުގައި އެ ގޯތިތެރޭގައި އައު އިމާރާތްތަކެއް ބިނާކުރުމުގެ އިތުރުން، ކައިރީގައިވާ ފަރުބަދައާ ދިމާލަށް ބިން ކޮނުމުގެ މަސައްކަތްތަކެއް ދަނީ ހިނގަމުންނެވެ. މި ސަރަހައްދަކީ އާންމުން ވަނުމާއި ފޮޓޯ ނެގުން މުޅިން މަނާ، ރައްކާތެރިކަން ވަރުގަދަކޮށްފައިވާ ޒޯނެކެވެ.

އެއާޕޯޓާއި އަސްކަރީ މަރުކަޒުތައް

ޤަންދަހާރު އެއާޕޯޓާއި، ޠާލިބާނުންގެ އަސްކަރީ މަރުކަޒުތައް ހުރި ސަރަހައްދުތަކުގައިވެސް ބިންގަނޑު ކޮނުމުގެ މަސައްކަތްތައް ފެންނަން ހުރިކަމަށް ރިޕޯޓުގައި ބަޔާންކޮށްފައިވެއެވެ. ޠާލިބާނުންގެ އިސްވެރިޔާ ވަނީ ވެރިރަށް ކާބުލް ހިމެނޭހެން އެކި ޕްރޮވިންސްތަކުގައި ހުރި ހަތިޔާރުތައް ޤަންދަހާރަށް ބަދަލުކުރުމަށާއި، ފަރުބަދަތައް ކޮނެގެން ބިންގަރާސްތައް ހެދުމަށް ސީދާ އަމުރު ނެރުއްވާފައެވެ.

ޒަވާރު ހޮހަޅަތައް

ޚޯސްތު ޕްރޮވިންސްގައި ހުންނަ ތާރީޚީ "ޒަވާރު" ހޮހަޅަތަކުގެ ކޮމްޕްލެކްސް އަލުން މަރާމާތުކޮށް ބޭނުންކުރުމަށްވެސް ޠާލިބާނުން މަސައްކަތްކުރިއެވެ. މިއީ ކުރީގެ ސޯވިއެޓް އިއްތިހާދާ ދެކޮޅަށް ކުރި ހަނގުރާމައިގައި އުސާމާ ބިން ލާދިންގެ އެހީތެރިކަމާއެކު ބޭނުންކުރި މަޝްހޫރު ތަނެކެވެ. ނަމަވެސް، އެ ސަރަހައްދު އަލުން ހަނގުރާމައިގެ މައިދާނަކަށް ވެދާނެތީ އެކަމާ ރައްޔިތުން ފާޅުކުރި ކަންބޮޑުވުންތަކާއި ދެކޮޅުވެރިކަމާ ގުޅިގެން، އެ މަސައްކަތް މިހާރު ވަނީ ވަގުތީގޮތުން މެދުކަނޑާލާފައެވެ.

މީގެއިތުރުން، އަފްޣާނިސްތާނުގެ އިރުދެކުނު ޕްރޮވިންސްތަކުގައިވެސް ބިންގަރާސްތަކާއި ޚަންދަޤު ކޮނުމުގެ މަސައްކަތްތައް ޠާލިބާނުން ފުޅާ ދާއިރާއެއްގައި ކުރަމުންދާ ކަމަށް އެ ރިޕޯޓުގައި ބަޔާންކޮށްފައިވެއެވެ.