ރާއްޖޭގައި ހަކުރުބަލީގެ އާބާދީ 7،000 އަރައިފި
ދިވެހިރާއްޖޭގައި ހަކުރުބަލި ތަހައްމަލުކުރާ 7،000 މީހުން މިވަގުތު އެބަތިބި ކަމަށާއި، ހަކުރު ބައްޔަކީ މީހުން މަރުވާން މެދުވެރިވާ ތިންވަނައަށް އެންމެ ނުރައްކާތެރި ބަލިކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
ކޮންމެ އަހަރެއްގެ ނޮވެންބަރު 14 ވަނަ ދުވަހު ފާހަގަކުރާ މި ދުވަހުގެ މިއަހަރުގެ ޝިއާރެއްގެ ގޮތުގައި ކަނޑައަޅާފައިވަނީ، "ހަކުރުބަލިން ރައްކާތެރިވުމަށް ދުރާލާ ފިޔަވަޅު އަޅަމާ" ނުވަތަ "އާލީ އެކްޝަން އޮން ޑައިބެޓީސް" އެވެ. މި ދުވަހާ ގުޅިގެން އެ އިދާރާއިން ނެރުނު ބަޔާނުގައި ވަނީ، ގައިންގަޔަށް ނާރާ ބަލިތަކަކީ ރާއްޖޭގެ ސިއްހީ ނިޒާމަށް ކުރިމަތިވެފައިވާ ބޮޑު ގޮންޖެހުމެއްކަން ފާހަގަކޮށްފައެވެ. އަދި މި ބަލި ރާއްޖޭގައި މިހާރު އޮތް ހާލަތު ވަނީ ސާފްކޮށް ބަޔާންކޮށްދީފައެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު އާންމުކުރި ތަފާސްހިސާބުތަކަށް ބަލާއިރު، ރާއްޖޭގައި އަހަރަކު މަރުވާ މީހުންގެ ގާތްގަނޑަކަށް 85 އިންސައްތަ މީހުން މަރުވަނީ، ގައިންގަޔަށް ނާރާ ބަލިތަކުގައެވެ. މީގެ ތެރެއިން ތިންވަނައަށް އެންމެ ގިނައިން މީހުން މަރުވާ ބައްޔަކީ ހަކުރުބައްޔެވެ.
މިއަހަރުގެ އޮކްޓޫބަރު 30 ވަނަ ދުވަހާ ހަމައަށް ރާއްޖޭގެ ހޮސްޕިޓަލްތަކުން އެއްކޮށްފައިވާ މައުލޫމާތަށް ބަލާއިރު، ޓައިޕް 1 ޑައިބެޓީސްގެ 300 ބަލިމީހުންނާއި، ޓައިޕް 2 ޑައިބެޓީސްގެ 7،000 ބަލިމީހުން އަދި މާބަނޑު ދުވަސްވަރު ހަކުރު މައްޗަށް ގޮސްގެން އަހަރަކު 250 އެއްހާ މީހުން ފަރުވާ ހޯދަމުންދެއެވެ.
ހަކުރުބަލީގެ މައިގަނޑު ދެ ވައްތަރު ކަމަށްވާ، ޓައިޕް 1 އަދި ޓައިޕް 2 ޑައިބެޓީސްއާ ގުޅޭގޮތުން އެޗްޕީއޭއިން ބުނީ، ހެލިފެލިވެ އުޅުން މަދުވުމާއި، ބަރުދަން އިތުރުވުމާއި، އާއިލާގައި ހަކުރުބަލީގެ މީހުން ތިބުމުގެ އިތުރުން ދުންފަތުގެ އިސްތިއުމާލު ކުރުމަކީ މި ބައްޔަށް މަގުފަހިވާ މައިގަނޑު ސަބަބުތައް ކަމަށެވެ.
ހަކުރުބަލިން ރައްކާތެރިވުމަށްޓަކައި އެޗްޕީއޭއިން ކުރުމަށް އިލްތިމާސްކޮށްފައިވާ ކަންތައްތައް:
މިންހެޔޮ ކާނާ އިހްތިޔާރުކުރުން
ކެއުމުގެ ވަގުތުތަކާއި ކާ މިންވަރާމެދު ސަމާލުވުން
ގަވާއިދުން ކަސްރަތުކޮށް ހަށިގަނޑުގެ ބަރުދަން އެކެށީގެންވާ މިންވަރެއްގައި ހިފެހެއްޓުން
ދުންފަތާ ދުރުހެލިވުން
ބަލީގެ އަލާމާތެއް ފެނިއްޖެނަމަ ނުވަތަ ބަލި ޖެހުމުގެ ފުރުސަތު ބޮޑު ފަރާތްތަކުން ދުރާލާ ޓެސްޓުކުރުން
ބައްޔަށް ފަރުވާ ހޯދާ ފަރާތްތަކުން ޑޮކްޓަރުންގެ އިރުޝާދާއެކު ގަވާއިދުން ޓެސްޓުތައް ހެދުން
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
