އިހްތިރާމް އަދާކުރުމުގެ ޤައުމީ ކެމްޕެއިން ފެށުމުގެ ރަސްމިއްޔާތާ ގުޅިގެން މިރޭ ހަވާ އަރުވަނީ

އިހުތިރާމް އަދާކުރުމުގެ ޤައުމީ ކެމްޕެއިން ފެށުމުގެ ގޮތުން މިރޭ ބާއްވާ ރަސްމިއްޔާތާ ގުޅިގެން ހަވާ އެރުވުމަށް ނިންމައިފިއެވެ.

އިހްތިރާމް އަދާކުރުމުގެ ޤައުމީ ކެމްޕެއިން ފެށުމަށް ހަމަޖެހިފައިވަނީ މިރޭ މާފަންނު ޓްރެކްދަނޑުގައެވެ. ހަވާ އެރުވުމަށް ހަމަޖައްސާފައިވަނީ 09:30 އިން ފެށިގެން 10:30 ހާ ދެެމދުގެ ވަގުތެއްގައި ކަމަށް ފަންނާއި ސަޤާފަތާއި ތަރިކައާ ބެހޭ ވުޒާރާއިން ވަނީ ބުނެފައެވެ. ހަވާ އެރުވުމަށް ހަމަޖެހިފައިވަނީ މޭރީ ބްރައުންއާ ދިމާލު ބޭރުންނެވެ. ހަވާއެރުވުން ކުރިއަށްގެންދިއުމަށް ހަމަޖެހިފައިވަނީ 3 މިނެޓްހާއިރަށްކަމަށް ވުޒާރާއިން ބުންޏެވެ.

މިރޭ ބޭއްވުމަށް ހަމަޖެހިފައިވާ މި ކެމްޕެއިން އިފްތިތާހްކޮށްދެއްވާނީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. ކެމްޕެއިން ފެށުމަށް ޓަކައި ވާން ޖެހޭ އެންމެ ފަހުގެ ތައްޔާރީތައް ވުޒާރާއިން ކުރަމުންދާއިރު، މިއީ ރައީސުލްޖުމްހޫރިއްޔާގެ ރިޔާސީ ވައުދުފުޅު ތެރޭގައި ހިމެނޭ ކަމެކެވެ. މިއީ ދިވެހީންގެ މެދުގައި ރިވެތި އަޚްލާޤު އިޔާދަކުރުމުގެ ބޭނުމުގައި ފަސް އަހަރު ދުވަހަށް ދެމިގެންދާ ޕްރޮގްރާމެކެވެ.

މި ޕްރޮގްރާމްގެ ކަންކަން ކުރިއަށްގެންދަނީ މިކަމަށް ހާއްސަކޮށްފައިވާ ކޮމިޓީއަކުން ވިލަރެސްކުރާ ގޮތަށެވެ. މި ކޮމިޓީގައި ކަމާގުޅުންހުރި ވުޒާރާތަކާއި މުއައްސަސާތައް ހިމެނޭހެން ޖުމްލަ 9 މެންބަރުން ހިމެނެއެވެ.