ކޮންމެ ގައުމަކަށްވެސް އަމިއްލަ ތަރައްގީގެ މިސްރާބު ކަނޑައެޅުމުގެ ފުރިހަމަ އިހުތިޔާރު އޮންނަންވާނެ: ނައިބު ރައީސް

ކޮންމެ ގައުމަކަށްވެސް އަމިއްލަ ތަރައްގީގެ މިސްރާބު ކަނޑައެޅުމުގެ ފުރިހަމަ އިހުތިޔާރު އޮންނަންވާނެ ކަމަށް ރައީސުލްޖުމްހޫރިއްޔާގެ ނައިބު ހުސެއިން މުހައްމަދު ލަތީފު ވިދާޅުވެއްޖެއެވެ.

ނައިބު ރައީސް މިހެން ވިދާޅުވެފައިވަނީ، އެންޓީގާ އެންޑް ބާބިޔުޑާގައި ކުރިއަށްދާ ކޮމަންވެލްތު ގައުމުތަކުގެ އިސްވެރިންގެ ބައްދަލުވުމުގެ އެގްޒެކެޓިވް ސެޝަން 2 ގައި އެމަނިކުފާނު ވާހަކަފުޅުދައްކަވަމުންނެވެ. އެގޮތުން އެމަނިކުފާނު ވަނީ، ކޮމަންވެލްތުން ވިލުންތެރި ބައިވެރިވުންތަކަށް އިސްކަންދޭނެ ތިން ދާއިރާއެއް ފާހަގަކޮށްފައެވެ.

އެމަނިކުފާނު ވިދާޅުވި ގޮތުގައި، މި ދާއިރާތަކަކީ މުއައްސަސާތަކުގެ ޤާބިލުކަން އިތުރުކުރުމާއި، އަމިއްލަ ފައިމައްޗަށް ތެދުވުމުގެ ގާބިލުކަން އަށަގެންނެވުމުގެ އިތުރުން، ކުރިމަތިވާ ގޮންޖެހުންތައް ހައްލުކުރުމަށް އެންމެން ގުޅިގެން އަމަލީ މަސައްކަތްތަކަކަށް ބަދަލުކުރުމެވެ.

ކޮންމެ މެންބަރު ގައުމަކަށްވެސް އަމިއްލަ ތަރައްގީގެ މިސްރާބު ކަނޑައެޅުމުގެ ފުރިހަމަ އިހުތިޔާރު އޮންނަންވާނެކަން ފާހަގަކުރައްވަމުން، ނައިބު ރައީސް ވިދާޅުވީ މޫސުމީ ވިލުންތެރިކަމާއި ޑިޖިޓަލް ޓްރާންސްފޮމޭޝަން ފަދަ ކަންކަމުގައި ގައުމުތަކުން ތަޖުރިބާ ހިއްސާކޮށް، އަމަލީގޮތުން އެހީތެރިކަން ފޯރުކޮށްދިނުން މުހިންމު ކަމަށެވެ. އަދި ކޮމަންވެލްތު ވަރުގަދަވާނީ ގައުމުތަކުގެ އަމިއްލަ ބާރާއި ގާބިލުކަމުގެ މައްޗަށް ބިނާވެގެން ކަމަށްވެސް އެމަނިކުފާނު ވިދާޅުވިއެވެ.

މި ޖަލްސާގައި ވާހަކަފުޅުދައްކަވަމުން، ރާއްޖެއިން ކަނޑައަޅާފައިވާ ބައެއް މުހިންމު ލަނޑުދަނޑިތަކަށް ވެސް ނައިބު ރައީސް އަލިއަޅުއްވާލެއްވިއެވެ. އެގޮތުން 2040 ވަނަ އަހަރުގެ ނިޔަލަށް ދިވެހިރާއްޖެއަކީ ތަރައްގީވެފައިވާ ގައުމަކަށް ހެދުމަށާއި، 2030 ވަނަ އަހަރުގެ ނިޔަލަށް ޑިޖިޓަލް އިގުތިސާދަކީ ޖީ.ޑީ.ޕީ ގެ 15 އިންސައްތައަށް ހެދުމަށް އަދި 2028 ވަނަ އަހަރުގެ ނިޔަލަށް ހަކަތައިގެ 33 އިންސައްތައަކީ، އިއާދަކުރަނިވި ހަކަތައަށް ހެދުމަށް ސަރުކާރުން އަމާޒުހިފާފައިވާކަން އެމަނިކުފާނު ފާހަގަކުރެއްވިއެވެ.

މި އަމާޒުތަކަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގެންގުޅުއްވާ ތަސައްވުރުގެ ދަށުން ރާއްޖެ އިތުރަށް ވިލުންތެރިކުރުވުމަށް ކުރެވެމުންދާ މަސައްކަތްތަކެއް ކަމަށާއި، ގައުމީ ތަރައްގީގެ އެންމެ ބޮޑު ބާރަކީ ރައްޔިތުން، ހާއްސަކޮށް ޒުވާނުންކަމަށް ނައިބު ރައީސް ވިދާޅުވިއެވެ. އެހެންކަމުން ޒުވާނުންނަށް ހުނަރާއި، އިލްމާއި، ފުރުސަތުތައް ފަހިކޮށްދިނުމަކީ މި ތަސައްވުރު ހިގީގަތަކަށް ހެދުމަށް މުހިންމު ކަމެއް ކަމަށް އެމަނިކުފާނު ފާހަގަކުރެއްވިއެވެ.

ދުނިޔޭގެ ސަޕްލައި ޗޭނަށް އަރާ ބުރޫތަކާއި އިގްތިސާދީ ނުރައްކާތަކުގެ ސަބަބުން ގައުމުތަކަށް ދުރުރާސްތާގެ ލަނޑުދަނޑިތައް ހާސިލުކުރުމުގައި ގޮންޖެހުންތަކާ ކުރިމަތިވަމުންދާކަންވެސް ނައިބު ރައީސްގެ ވާހަކަފުޅުގައި ފާހަގަކުރެއްވިއެވެ. އަދި މިފަދަ ގޮންޖެހުންތަކުން އަރައިގަތުމަށް ވިލުންތެރިކަން އިތުރުކުރަނިވި ބައިވެރިވުންތަކުގެ ތެރެއިން ކޮމަންވެލްތުން މުހިންމު ދައުރެއް އަދާކުރަންޖެހޭނެ ކަމަށް އެމަނިކުފާނު ގޮވާލެއްވިއެވެ.