ހަފްތާއެއް ކުރިން އިއުލާންކޮށްގެން މާފުށީގައި ހެލޯވީން ފާހަގަކުރިއިރު ކައުންސިލްއިން ބުނީ ”ނޭނގޭ“ ކަމަށް

ލޯކަލް ޓޫރިޒަމް އެންމެ ފައްކާވެފައިވާ އެއް ރަށް، ކ. މާފުށީގައި ކްރިސްޓިއަން ދީނުގެ މީހުންގެ ހެލޯވީން ފާހަގަކުރާނެކަން އިއުލާންކޮށް، އެކަން ކޮށް ނިމުނުއިރުވެސް ކައުންސިލްއަށް އެކަމާ ބެހޭ މައުލޫމާތު ”ނޭނގޭ“ ކަމަށް ބުނެފިއެވެ.

މާފުށީ ”ކާނި ހޮޓެލްސް އެންޑް ޓުއާސް“ އިން ”ކާނި ޕާމް ބީޗް“ ގައި މިދިޔަ އޮކްޓޯބަރު މަހުގެ 31 ވަނަ ދުވަހު ހެލޯވީން ޕާޓީއެއް ބާއްވާނެކަން އިއުލާން ކުރީ އެމަހުގެ 24 ވަނަ ދުވަހުއެވެ. އެކަން އިއުލާން ކޮށްފައިވަނީ އެމީހުންގެ މީސްމީޑިއާ ޕްލެޓްފޯމްތަކުގައި އެންމެނަށްވެސް ފެންނަ ގޮތަށެވެ.

ހެލޯވީން ޕާޓީއާއެކު ބުފޭ އަކާއި ޑީޖޭވެސް ބާއްވާނެކަން އެ އިއުލާނުގައި ބުނެފައިވެއެވެ. އަދި އެޕާޓީއަށް އަންނައިރު ކޮސްޓިއުމްލައިގެން އަންނަންވެސް އެދިފައިވެއެވެ.

މިފަދަ ހާމަކަންބޮޑުކޮށް އިއުލާންކުރުމަށްފަހު މިދިޔަ ހޮނިހިރު ދުވަހުގެރޭ އެ ޕާޓީއާއި ޑީޖޭވެސް ބާއްވާފައިވާއިރު، އެ ޕާޓީގެ ވީޑިއޯވެސް މީސްމީޑިއާގައި އާއްމުކުރީ ކާނި ހޮޓެލްސްއިންނެވެ.

މިކަމާގުޅިގެން ގިނަ ބައެއްގެ ފާޑުކިޔުންތައް އަމާޒުވެފައިވާއިރު، އެކަން ކައުންސިލްގެ ސަމާލުކަމަށް އައިސްފައިވޭތޯ ބެލުމަށް ”ވޮއިސް“ އިސް މާފުށީ ކައުންސިލްގެ ރައީސް، ޢަލީ ޝައްމޫންއަށް ގުޅުމުން ވިދާޅުވީ ސަމާލުކަމަށް އިސްފައިވާ ކަމަށެވެ. ނަމަވެސް އެކަން އެނގުނީ ކޮންއިރަކު ތޯއާއި، އެކަމާގުޅިގެން އެއްވެސް ފިޔަވަޅެއް އެޅިތޯ އެހުމުން ޖަވާބެއް ނުދިނެވެ.

ތަކުރާރުކޮށް ގުޅުމުންވެސް އެކަމާ ގުޅޭ ޖަވާބެއް ނުދިނުމުން، ކައުންސިލްގެ ނާއިބު ރައީސް ހުސައިން ޢާމިލްއަށް ގުޅުމުން ވިދާޅުވީ އެކަން ނޭނގޭ ކަމަށެވެ.

”އަޅުގަނޑަކަށް ނޭނގެ ބޭއްވި ކަމެއް… (ހެލޯވީން ޕާޓީގެ) ވީޑިއޯ ތި ވެދާނެ ކުރިންގެ އެއްޗެއް ކަމަށްވެސް. އެ ޕާޓީ ބޭއްވިކަން އަޅުގަނޑަކަށް ނޭނގެ. އެއްވެސް ފަރާތަކުން އެފަދަ ކަމެއް ކައުންސިލްގެ ސަމާލުކަމަށްވެސް ގެނެސްފައި ނުވޭ.“ މާފުށީ ކައުންސިލްގެ ނާއިބު އާމިލް ވިދާޅުވިއެވެ.

ވޮއިސް އަށް މައުލޫމާތު ލިބިފައިވާ ގޮތުގައި މާފުށީގައި މީގެ ކުރިން އަހަރުތަކުގައި އެ ކާނި ހޮޓެލްސްއިން ހެލޯވީން ފާހަގަކުރެއެވެ. އެކަން އެ މީހުންގެ މީސްމީޑިއާ މަންސަތަކުންވެސް ހުރީ ފެންނާށެވެ.

ޤާނޫނު ނަމްބަރު 94/6 ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމާއިބެހޭ ޤާނޫނުގެ ދަށުން ހެދިފައިވާ ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތްކުރުމުގެ ޤަވާޢިދު (R-40/2022) ގެ 9 ވަނަ މާއްދާގައި ވާގޮތުން "ދިވެހިރާއްޖޭގައި ދިރިއުޅޭ ޣައިރު މުސްލިމުންނާއި، ދިވެހިރާއްޖެއަށް ޒިޔާރަތްކުރާ ޣައިރު މުސްލިމުން ފާޅުކަން ބޮޑުގޮތެއްގައި އެމީހުންގެ ދީނީ ޝިޢާރުތައް ފާޅުކުރުމާއި ޢާންމު ތަންތާނގައި ޖަމާޢަތް ހަދައިގެން އެފަދަ ދީނީ ޙަރަކާތްތައް ހިންގުމާއި، އެމީހުންގެ އެފަދަ އެއްވެސް ޙަރަކާތެއްގައި ދިވެއްސަކު ބައިވެރިވުމަކީ މަނާ ކަމެކެވެ."

ކްރިސްމަސް، ހެލޯވީން ފަދަ ޣައިރުދީން ތަކުގެ ޢީދު ފާހަގަކުރުން އިސްލާމް ދީނާއި ރާއްޖޭގެ ގާނޫނު އަސާސީން މަނާ ކުރާއިރުވެސް މި ފަހަކަށް އައިސް ރަށްރަށުގައިވެސް އެފަދަ ކަންކަން ފާހަގަކުރަމުންދާތަން ފެނެއެވެެ. މިފަދަ ކަންކަން ޒުވާން ޖީލުތަކަށް ފެނި، އެކަމަށް އެއްގޯސްވުމަކީ އިޖުތިމާއީ ފޭރާން ހަލާކުވެގެންދާނެ ކަމެއް ކަމަށް ގިނަ ބަޔަކު ދެކެއެވެ.