’ޑެތު‘ގެ ބަންދުގެ މުއްދަތު އިތުރުކޮށްފި، މިފަހަރު ޖެހީ 15 ދުވަސް

އިމާރާތްތަކާއި ވެހިކަލްތަކުގައި ހުޅުޖަހައި، އިހްތިޖާޖުކޮށް، ފިހާރަތައް ލޫޓްވާން ގޮވާލި ހއ. ބާރަށު ކުއްޅަވައްގެ، އަލީ ޖުމާން، ޑެތުގެ ބަންދުގެ މުއްދަތު އިތުރުކޮށްފިއެވެ.

މީސްމީޑިއާގައި ޑެތު ކުރި ޕޯސްޓްގައި ވަނީ، އީގަލްސް ހިލްސްއަށް ރަސްމާލެ ދިނުމާ ދެކޮޅު ހެދުމުގެ ގޮތުން އިހްތިޖާޖު ކުރުމާއި އިމާރާތްތަކާއި ވެހިކަލްތަކުގައި ހުޅުޖަހަން ގޮވާލާފަ އެވެ. އަދި ރާއްޖޭގެ އެންމެ މަޝްހޫރު އެއް ފިހާރައިގެ ނަން ފާހަަގަކޮށް ފިހާރަތައް ލޫޓްވަން ހިތްވަރު ދީފައިވެ އެވެ.

ކޯޓް އަމުރެއްގެ ދަށުން އޭނާ ހައްޔަރުކުރީ އޮކްޓޯބަރު 22 ވަނަ ދުވަހުއެވެ.

އޭނާގެ ބަންދާއިމެދު ގޮތް ނިންމަން ހާޒިރުކުރުމުން ފުރަތަމަ ޖެހީ 12 ދުވަހެވެ.

އެ މުއްދަތު ހަމަވެގެން އިއްޔެ ކޯޓަށް ހާޒިރުކުރުމުން ވަނީ 15 ދުވަސް ޖަހާފައެވެ.

އޭގައިވަނީ އޭނާ ބަންދުން ދޫކޮށްލައިފިނަމަ މުޖްތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށެވެ.