އިސްރާއީލުން ޣައްޒާގެ މެޑިކަލް ކޮމްޕްލެކްސްއަކަށް ހަމަލާދީފި: އެކި ސަރަޙައްދުތަކުން 9 މީހުން ޝަހީދުކޮށްލައިފި

އިސްރާއީލުގެ ޓެރަރިސްޓް އިސްތިއުމާރީ ބާރުތަކުން ޣައްޒާގެ އެކި ސަރަޙައްދުތަކަށް ދިން ވަރުގަދަ ޙަމަލާތަކެއްގައި މަދުވެގެން ފަލަސްޠީނުގެ 9 މީހަކު ޝަހީދުކޮށްލައިފިއެވެ. މި ޙަމަލާތައް ދީފައި މިވަނީ، ޣައްޒާއަށް ބޯކޮށް ވާރޭވެހި ފެންބޮޑުވުމުގެ ސަބަބުން ޙާލުގައި ޖެހިފައިވާ އެތައް ލައްކަ ރައްޔިތުންނަށް ފެން ނުވަންނަ ފަދަ ޓެންޓުތައް ފޯރުކޮށްދިނުމަށް އދ. އިން އިލްތިމާސެއް ކޮށްފައިވާ ދަނޑިވަޅެއްގައެވެ.

ޣައްޒާގެ ސިވިލް ޑިފެންސްގެ ތަރުޖަމާނު މަޙްމޫދު ބަޞަލް ވިދާޅުވި ގޮތުގައި، ބުރާސްފަތި ދުވަހުގެ ފަތިހުގެ ވަގުތެއްގައި ދެކުނު ޚާން ޔޫނިސްގެ ހުޅަނގުގައި ހުންނަ ނާޞިރު މެޑިކަލް ކޮމްޕްލެކްސްއަށް އިސްރާއީލުން ވައިގެ މަގުން ދިން ޙަމަލާއެއްގައި މަދުވެގެން 4 މީހަކު ވަނީ ޝަހީދުވެފައެވެ. މީގެ އިތުރުން ބުދަ ދުވަހު ޣައްޒާ ސިޓީގެ ދެކުނުގައިވާ އަލްޞަބްރާ އަވަށަށް ދިން ޙަމަލާއެއްގައި އުމުރުން 38 އަހަރުގެ މުޙައްމަދު ސާލިމް އަލްދާޢިޝް ވަނީ ޝަހީދުވެފައެވެ.

އަދި މެދުތެރޭ ޣައްޒާގެ އަލްބުރައިޖް ކޭމްޕުގެ އިރުމަތީ ފަރާތުން އިސްރާއީލު ސިފައިން ބަޑިޖަހައި ފަލަސްޠީނުގެ އިތުރު މީހަކު ޝަހީދުކޮށްލާފައިވާއިރު، ޣައްޒާ ސިޓީގެ ހުޅަނގު އުތުރުގައިވާ އަލްނަޞްރު އަވަށަށް ޑްރޯން ޙަމަލާއެއްދީ ވެސް މީހަކު ވަނީ ޝަހީދުކޮށްލާފައެވެ. ހަމައެއާއެކު، ޣައްޒާ ސިޓީގެ އުތުރުގައި އޮންނަ ޝެއިޚް ރަޟްވާން އަވަށުގައި ޙާލުގައި ޖެހިފައިވާ މީހުން ދިރިއުޅެމުންދިޔަ ޓެންޓަކަށް އަމާޒުކޮށް ދިން ޙަމަލާގައި 2 މީހަކު ޝަހީދުވެ، ގިނަ ބަޔަކު ޒަޚަމްވިއެވެ.

މި ޙަމަލާތަކާ ގުޅިގެން އަލްޖަޒީރާގެ ރިޕޯޓަރު ހިންދް ޚުޟަރީ ވިދާޅުވި ގޮތުގައި، އިސްރާއީލުން އާންމުންނަށް އަމާޒުކޮށް ދެމުންދަނީ އެއްވެސް އިމެއްނެތް އަނިޔާވެރި ޙަމަލާތަކެކެވެ. އެގޮތުން ފެން ތާންގީއަކަށް ފެންއަޅަން ހުރި މީހަކަށް ޑްރޯން ޙަމަލާއެއްދީ ޝަހީދުކޮށްލާފައިވާ ކަމަށާއި، އަލްޖަލާ މަގުގައި ހުރި ޓެންޓެއްގެ ތެރޭގައި ތިބި އަލްޢަބްސީ ޢާއިލާގެ ދެބެއިން ޝަހީދުކޮށްލާފައިވާ ކަމަށް އޭނާ ވިދާޅުވިއެވެ. މިހާރު ޣައްޒާގެ އެއްވެސް ތަނަކީ ރައްކާތެރި ތަނެއް ނޫނެވެ.

މި ޙަމަލާތައް ކުރިއަށްދާއިރު، ޣައްޒާގެ ސަރުކާރުގެ މީޑިއާ އޮފީހުން ހާމަކޮށްފައިވާ ގޮތުގައި ފާއިތުވި ބަންދު ދުވަސްވަރު ވެހުނު ބޯ ވާރޭގެ ސަބަބުން މަދުވެގެން 70،000 ޓެންޓުގައި ވަނީ ފެންބޮޑުވެފައެވެ. ޔުނިސެފުން ބުނާ ގޮތުގައި މި ވިއްސާރައިގެ އަސަރު 106،000 އަށްވުރެ ގިނަ މީހުންނަށް ސީދާ ގޮތުން ކޮށްފައިވާއިރު، ފާޚާނާތައް ފުރިގެން ބޭރުވުމުގެ ސަބަބުން ބޮޑެތި ތަކުލީފުތަކެއް ވަނީ ކުރިމަތިވެފައެވެ. ޒަރޫރީ އެހީތެރިކަން ވެއްދުމަށް އިސްރާއީލުން ހުރަސްއަޅަމުންދާތީ، އަމިއްލަ ޖަމްޢިއްޔާތަކަށް މިކަމަށް އެކަށީގެންވާ ޙައްލެއް ހޯދައިދެވޭ ގޮތެއް ނުވެއެވެ.

އދ. ގެ ތަރުޖަމާނުގެ ނައިބު ފަރްޙާން ޙައްޤު ވިދާޅުވީ، ޓެންޓުތައް އެތެރެކުރުމަށްޓަކައި އިސްރާއީލުގެ ކަމާބެހޭ ފަރާތްތަކުގެ ހުއްދައާއި އެއްބާރުލުން ނުހަނު ބޭނުންވާ ކަމަށެވެ. މީގެ އިތުރުން، އދ. ގެ އިންސާނީ އެހީއާ ބެހޭ އިސްވެރިޔާ ޓޮމް ފްލެޗަރ ވިދާޅުވީ، ޣައްޒާއަށް ފިނިމޫސުމުގެ ސާމާނު ފޮނުވޭނީ އިސްރާއީލުގެ އައު ސަރުކާރެއް އެކުލަވާލުމުން ކަމަށް ބައެއް ޤައުމުތަކުން ބުނަމުންދާ ކަމަށެވެ. އަދި މިއީ ބަލައިގަނެވޭނެ އުޒުރެއް ނޫން ކަމަށްވެސް އޭނާ ވިދާޅުވިއެވެ.

ޣައްޒާގައި ފެންބޮޑުވުމާ ގުޅިގެން އިޓަލީގެ ޚާރިޖީ ވަޒީރު އެންޓޯނިއޯ ތަޔާނީ ވަނީ، ވަގުތުން އެހީތެރިކަން ފޯރުކޮށްދިނުމަށް 5 މިލިއަން ޔޫރޯ (5.5 މިލިއަން ޑޮލަރު) ގެ ކުއްލި އެހީގެ ޕްރޮގްރާމެއް އިޢުލާނު ކުރައްވާފައެވެ.

ފަލަސްޠީނުގެ ވަފާ ނިއުސް އެޖެންސީއަށް ޞިއްޙީ މަޞްދަރުތަކުން މަޢުލޫމާތު ދީފައިވާ ގޮތުގައި، 2023 އޮކްޓޯބަރު 7 އިން ފެށިގެން އިސްރާއީލުން ހިންގަމުންދާ ޤަތުލުޢާންމުގައި ޝަހީދުވި މީހުންގެ އަދަދު ވަނީ 74,653 އަށް އަރާފައެވެ. އަދި ވޭތުވެދިޔަ ތިން އަހަރު ދުވަހުގެ ތެރޭގައި 176,007 މީހުން ވަނީ ޒަޚަމްވެފައެވެ. މީގެއިތުރުން، 2025 އޮކްޓޯބަރު 11 ގައި "ހަނގުރާމަ ހުއްޓާލުމުގެ" އެއްބަސްވުމަށް ޢަމަލުކުރަން ފެށި ފަހުންވެސް، އިސްރާއީލުން ވަނީ ފަލަސްޠީނުގެ 1,622 މީހުން ޝަހީދުކޮށް، 5,878 މީހުން ޒަޚަމްކޮށްލާފައެވެ.