ޝަމްހީދު ނުދައްކަވާ އޮތް 4.3 މިލިއަން ރުފިޔާގެ ބޮޑު ދަރަންޏެއް، ކޯޓުން ހުކުމެއް

ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު، ނުދައްކަވާ އޮތް ބޮޑު ލޯނަކާއި ގުޅިގެން ސިވިލް ކޯޓުން އޭނާގެ މައްޗަށް ހުކުމެއް އިއްވާ އެ ފައިސާ ދައްކާ ޚަލާސް ކުރަން އަންގައިފި އެވެ.

މިއީ މޯލްޑިވްސް އިސްލާމިކް ބޭންކް (އެމްއައިބީ) އަށް 281،000 ވުރެގިނަ ޑޮލަރު ނުވަތަ 4.3 މިލިއަން ރުފިޔާ ނުދައްކާ އޮތް މައްސަލައަކާއި ގުޅިގެން ސިވިލް ކޯޓުން ކުރި ހުކުމެކެވެ.

ދަރަނީގެ ބޮޑު މި މައްސަލަ ކޯޓަށް ހުށައެޅީ އެމްއައިބީންނެވެ. އެ މައްސަލަ ކޯޓުން ނިންމީ އިއްޔެ އެވެ.

އެމްއައިބީން ވަނީ އެ ބެންކުން ދޫކުރި 500،000 ޑޮލަރުގެ ފެސިލިޓީގެ ތެރެއިން 281،474.28 ޑޮލަރު ނުދައްކާ އޮތުމުން ދެ ކުންފުންޏަކަށާއި ލޯނަށް ޒިންމާވާ އަމިއްލަ ފަރުދުންގެ މައްޗަށް ދައުވާ އުފުލާފަ އެވެ. އޭގެ އެއް ބޭފުޅަކީ ހުޅުމާލޭ ދެކުނު ދާއިރާ ތަމްސީލުކުރައްވާ މެންބަރު ޝަމްހީދެވެ. 

ކޯޓުގެ ވަނީ 281،474.28 ޑޮލަރު ކުރިއަށް އޮތް ފަސް މަސް ދުވަހުގެ ތެރޭގައި ދެއްކުމަަށް އަންގާފަ އެވެ. މީގެ ތެރޭގައި ލޯ މުއްދަތުގައި ނުދެއްކުމުން އަރާފައިވާ ޖޫރިމަނާވެސް ދައްކަން އަމުރުކޮށްފައިވެ އެވެ.

ޝަމްހީދުގެ މައްޗަށް މިފަދަ ހުކުމެއް އައިއިރު އޭނާ ގެންދަވަނީ އެމްޑީޕީގެ ރިޔާސީ ޓިކެޓް ހޯއްދަވަން ކެމްޕެއިން ވެސް ކުރައްވަމުންނެވެ. އެގޮތުން ރަށްރަށް ދަތުރުކޮށް ތާއީދު އިތުރުކުރުމަށް ދަނީ މަސައްކަތް ކުރަމުންނެވެ. އަދި ކެމްޕެއިނަށް ވަކި ޕްރަގްރާމްތަކެއް ވެސް ވަނީ ފަށާފަ އެވެ.

އޭނާއަކީ މަޖިލީހުގެ މެންބަރެއް ކަމުން ހުކުމާއި އެއްގޮތަށް ފައިސާ ނުދައްކަވައިފިނަމަ ގޮނޑި ގެއްލުމުގެ ބިރު އޮންނާނެ އެވެ.