ޣައްޒާގެ ނާސިރު މެޑިކަލް ކޮމްޕްލެކްސްއަށް އިސްރާއީލުން ދިން ހަމަލާއަކީ ހަނގުރާމައިގެ ޖަރީމާއެއް: ހަމާސް

ޣައްޒާގެ ހާން ޔޫނިސްގައި ހުންނަ ނާސިރު މެޑިކަލް ކޮމްޕްލެކްސްއަށް އިސްރާއީލުގެ އަސްކަރިއްޔާއިން ދިން ވައިގެ ހަމަލާއަކީ ހަނގުރާމައިގެ ޖަރީމާއެއް ކަމަށް ފަލަސްތީނުގެ މިނިވަންކަމަށް މަސައްކަތްކުރާ ޖަމާއަތް، ހަމާސްއިން ބުނެފިއެވެ.

އިސްރާއީލުން ދިން މި ހަމަލާގައި 6 މީހަކު ޝަހީދުވެ، މަދުވެގެން 20 މީހަކު ވަނީ ޒަހަމްވެފައެވެ.

އެގޮތުން، މި ހަމަލާ އަމާޒުކޮށްފައިވަނީ، ހާން ޔޫނިސްގައި ހުންނަ އެ ހޮސްޕިޓަލުގެ ދެވަނަ ފަންގިފިލާއަށެވެ. ނާސިރު މެޑިކަލް ކޮމްޕްލެކްސްއަކީ، ޣައްޒާގައި ހުރި އެންމެ ބޮޑު އެއް ހޮސްޕިޓަލަށް ވާއިރު، އިސްރާއީލުގެ ހަމަލާތަކުގައި އެ ސިޓީގެ އެހެން ހުރިހާ ހޮސްޕިޓަލެއް ސުންނާފަތިވެފައިވާތީ، މިހާރު އެ ސިޓީގައި ހިދުމަތް ދެމުންދާ ހަމައެކަނި ހޮސްޕިޓަލަކީވެސް މިއީއެވެ.

ހަމާސްއިން ނެރުނު ބަޔާނެއްގައި ބުނެފައިވަނީ، ހާން ޔޫނިސްގެ ނާސިރު ހޮސްޕިޓަލަށް ބޮން އެޅުމަކީ ބައިނަލްއަޤްވާމީ ޤާނޫނުތަކާ ހިލާފު ހަނގުރާމައިގެ ޖަރީމާއެއް ކަމަށެވެ. އަދި މި ހަމަލާއިން ހާމަވަނީ، އިސްރާއީލުން އެއްވެސް ޖެހިލުމެއް ނެތި އަދަބަކަށް ބިރުނުގަނެ ޖަރީމާތައް ހިންގަމުންދާ މިންވަރު ކަމަށެވެ.

މީގެ އިތުރުން، ހަމާސްގެ ބަޔާނުގައި ވަނީ، ސުލްހައިގެ މަޝްވަރާތަކުގައި މެދުވެރިންގެ ދައުރު އަދާކުރާ ފަރާތްތަކަށާއި އެމެރިކާގެ ސަރުކާރަށް ވަގުތުން ފިޔަވަޅު އެޅުމަށް ގޮވާލާފައެވެ. އެގޮތުން، އިސްރާއީލުން ތަކުރާރުކޮށް ހިންގަމުންދާ މިފަދަ އުދުވާންތައް ހުއްޓުވައި، ހަމަލާބަދަލުކުރުން ހުއްޓާލުމުގެ އެއްބަސްވުމަށް އިސްރާއީލުން ފުރިހަމައަށް ބޯލަނބާކަން ކަށަވަރުކުރުމަށް އެ ފަރާތްތަކުން މަސައްކަތް ކުރަންޖެހޭ ކަމަށް ހަމާސްއިން ބުނެފައިވެއެވެ.

ޣައްޒާގެ ދެކުނުގެ ސަރަހައްދުތަކުގައި ދިރިއުޅޭ މަދުވެގެން ފަސް ލައްކައެއްހާ ރައްޔިތުންނަށް ސިއްހީ ފަރުވާ ފޯރުކޮށްދެމުންދާ މި މުހިންމު މަރުކަޒަށް ދިން ހަމަލާއާ ގުޅިގެން، އެ ސަރަހައްދުގެ ސިއްހީ ނިޒާމަށް އިތުރު ބޮޑެތި ގޮންޖެހުންތަކެއް ވަނީ ކުރިމަތިވެފައެވެ.