ފަލަސްތީނުގެ ހުޅަނގު އައްސޭރީގައި އިތުރު 895 ޔަހޫދީ އާބާދީ ޔުނިޓް އިސްރާއީލުން އަޅަނީ

ފަލަސްތީނުގެ ހުޅަނގު އައްސޭރީގެ އެކި ސަރަހައްދުތަކުގައި ގަވާއިދާ ހިލާފަށް އާބާދުކޮށްފައިވާ ޔަހޫދީ އާބާދީތައް އިތުރަށް ފުޅާކުރުމަށްޓަކައި، އާ 895 ހައުސިންގ ޔުނިޓް އެޅުމުގެ 11 މަޝްރޫއެއް އިސްރާއީލުގެ ކަމާބެހޭ އިދާރާތަކުން ކުރިއަށް ގެންދަން ނިންމައިފިއެވެ.

ފަލަސްތީނުގެ ރަސްމީ ނޫސް އެޖެންސީ، ވަފާއާ ހަވާލާދީ 'ކޮލޮނައިޒޭޝަން އެންޑް ވޯލް ރެސިސްޓެންސް ކޮމިޝަން' އިން މިކަން ވަނީ ކަށަވަރުކޮށްދީފައެވެ.

މި ކޮމިޝަނުން ހޮނިހިރު ދުވަހު ނެރުނު ހަފްތާގެ ރިޕޯޓުގައި ފާހަގަކޮށްފައިވާ ގޮތުގައި، އިސްރާއީލުގެ މި މަޝްރޫއުތައް ބިނާވެފައިވަނީ މައިގަނޑު ތިން ކަމެއްގެ މައްޗަށެވެ. އޭގެ ތެރޭގައި އިތުރު ބޯހިޔާވަހިކަމުގެ ޔުނިޓްތައް ބިނާކުރުމާއި، ފަލަސްތީނުގެ ދަނޑުވެރިކަމުގެ ބިންތަކާއި ހުސް ސަރަހައްދުތައް ސިނާއީ އަދި އާބާދީ ބޭނުންތަކަށް ބަދަލުކުރުމުގެ އިތުރުން، ޔަހޫދީ އާބާދީތައް އިތުރަށް ފުޅާކުރުމަށް މަގުފަހިވާނެ ފަދަ އަސާސީ ހިދުމަތްތައް ތަރައްގީކުރުން ހިމެނެއެވެ.

މި މަޝްރޫއުތައް ހިންގުމަށް ހަމަޖެހިފައިވަނީ، ހުޅަނގު އައްސޭރީގެ ގަލްގީލިއާ، ސަލްފީތު، ނާބްލުސް، ރާމަﷲ އަދި އަލް-ބީރާގެ އިތުރުން ހެބްރޯން ގަވަރުނޭޓްގައެވެ. މީގެ އިތުރުން ހުޅަނގު އައްސޭރީގެ ދެކުނުގައި އޮންނަ ގުޝް އެޓްޒިއޮން ސެޓްލްމަންޓް ބްލޮކް ވެސް މި މަޝްރޫއުތަކުގެ ތެރޭގައި ހިމެނެއެވެ.

މި ޕްލޭންތަކުގެ ދަށުން އެންމެ ގިނަ ޔުނިޓް އެޅުމަށް ހަމަޖެހިފައިވަނީ، ގަލްގީލިއާގެ ކަފްރު ގައްދޫމް އަވަށުގެ ބިމުގައި ހަދާފައިވާ ކެދުމީމް އާބާދީގައެވެ. އެތަނުގައި 288 ޔުނިޓް އެޅުމަށް ނިންމާފައިވާއިރު، ހެބްރޯންގެ ބެއިތު ހަގައި އާބާދީއަށް 225 ޔުނިޓް އަދި ރާމަﷲ ކައިރީގައި އޮންނަ ތަލްމޮން އާބާދީއަށް 200 ޔުނިޓް އިތުރުކުރުމަށް ވަނީ ރާވާފައެވެ. ހަމައެއާއެކު، ނާބްލުސް ކައިރީގައި އޮންނަ އެލޯން މޯރޭ އާބާދީގައި 83 ޔުނިޓް އެޅުމަށްޓަކައި ފަލަސްތީނުގެ ދަނޑުބިންތައް ބޭނުންކުރުމަށް އިސްރާއީލުން ދަނީ ތައްޔާރުވަމުންނެވެ.

ބައިނަލްއަގުވާމީ ގާނޫނުތަކާއި އދ. ގެ ގަރާރުތަކަށް ބަލާއިރު، އިސްރާއީލުން ހިފާފައިވާ ހުޅަނގު އައްސޭރީގައި ބިނާކޮށްފައިވާ ހުރިހާ ޔަހޫދީ އާބާދީތަކަކީ ވެސް ގާނޫނާ ހިލާފު ތަންތަނެވެ. އެހެންނަމަވެސް، ބައިނަލްއަގުވާމީ މުޖުތަމައުގެ ފާޑުކިޔުންތަކަށް ބެލުމެއް ނެތި އިސްރާއީލުން ދަނީ ފަލަސްތީނުގެ ބިންތަކަށް ވެރިވެގަނެ، އާބާދީތައް ފުޅާކުރުމުގެ މަސައްކަތް ހުއްޓުމެއް ނެތި ކުރިއަށް ގެންދަމުންނެވެ.