ޗައިނާ-ރާއްޖެ އިންވެސްޓްމަންޓް ފޯރަމް ފަށައިފި

ޗައިނާ - މޯލްޑިވްސް އިންވެސްޓްމަންޓް ކޯޕަރޭޝަން ފޯރަމް ފަށައިފިއެވެ. މި ފޯރަމް ފަށްޓަވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.

ބާސެލޯ ނަސަންދުރާގައި އެއް ދުވަހުގެ މުއްދަތަށް ކުރިއަށްދާ މި ފޯރަމް އިންތިޒާމުކޮށްފައިވަނީ އިޤުތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ މިނިސްޓްރީއާއި ޗައިނާ އެމްބަސީ ގުޅިގެންނެވެ.

ފޯރަމުގައި 100 އަށް ވުރެ ގިނަ ފަރާތުން ބައިވެރިވެފައިވާ އިރު، ޗައިނާގެ 40 އަށް ވުރެ ގިނަ ކުންފުންޏެއް ހިމެނެއެވެ. މި ފޯރަމް ތެރެއިން ވިޔަފާރީގެ ގުޅުންތައް ބަދަހިކުރުމާ ގުޅޭ ފަސް އެމްއޯޔޫއެއްގައި ސޮއިކުރުމަށް ވަނީ ހަމަޖެހިފައެވެ.

މި ސަރުކާރުން މިހާތަނަށް ހަތް ޤައުމެއްގައި އިންވެސްޓްމަންޓް ފޯރަމްތައް ބާއްވާފައިވެއެވެ. އޭގެ ތެރޭގައި ޗައިނާ، ޔޫއޭއީ، އިންޑިއާ، މެލޭޝިއާ، ސިންގަޕޫރު، އިނގިރޭސިވިލާތް އަދި ޕާކިސްތާނެވެ. އިންޑިއާގެ ތިން ސިޓީއެއްގައި ވަކިވަކިން ފޯރަމް ކުރިއަށް ގެންގޮސްފައިވެއެވެ.