ޗައިނާ ސަރުކާރުގެ ސްކޮލަރޝިޕް ޕްރޮގުރާމުގައި ބައިވެރިވުމުގެ ފުރުސަތު ހުޅުވާލައިފި

ޗައިނާ ސަރުކާރުގެ "ޗައިނީޒް ގަވަރމެންޓް ސްކޮލަރޝިޕް ޕްރޮގުރާމް "2027-2028 ގައި ބައިވެރިވުމުގެ ފުރުސަތު މިނިސްޓްރީ އޮފް އެޑިޔުކޭޝަން، ހަޔަރ އެޑިޔުކޭޝަން އެންޑް ސްކިލްސް ޑިވެލޮޕްމަންޓްއިން ހުޅުވާލައިފިއެވެ.

މި ސްކޮލަރޝިޕްގެ ދަށުން ތަފާތު ތައުލީމީ މަރުހަލާތަކަށް ކުރިމަތިލުމުގެ ފުރުސަތު ވަނީ ހުޅުވާލާފައެވެ. އެގޮތުން، އަންޑަރގްރެޖުއޭޓް، ޕޯސްޓްގްރެޖުއޭޓް އަދި ޑޮކްޓޯރަލް ޑިގްރީ ފެންވަރުގެ ޕްރޮގުރާމްތަކަށް އެޕްލިކޭޝަން ހުށެހެޅޭނެ ކަމަށް މިނިސްޓްރީއިން ނެރުނު އިއުލާނުގައި ބަޔާންކޮށްފައިވެއެވެ.

އަންޑަރގްރެޖުއޭޓް ޕްރޮގުރާމްތަކަށް އެދި ހުށަހަޅާ ފަރާތްތަކުން އެޕްލިކޭޝަނާއެކު "ޗައިނާ ސްކޮލާރސްޓިކް ކޮމްޕިޓެންސީ އެސެސްމަންޓް" ގެ ނަތީޖާ ހުށަހަޅަން ޖެހޭނެއެވެ. މި އެސެސްމަންޓް ފުރިހަމަކުރުމަށްޓަކައި ރަޖިސްޓްރީވާނެ ގޮތާއި އިމްތިހާން ބާއްވާނެ ތާރީހުގެ ތަފުސީލުތައް https://www.campuschina.org/scholarships/index.html?k=Chinese%20Government%20Scholarships އިން ލިބެން ހުންނާނެއެވެ.

މި ސްކޮލަރޝިޕްތަކަށް ޝައުގުވެރިވާ ފަރާތްތަކުން 29 ޖަނަވަރީ 2027 ވާ ހުކުރު ދުވަހުގެ ޗައިނާ ގަޑިން 23:59 ގެ ކުރިން އެޕްލިކޭޝަން ހުށަހަޅަންވާނެއެވެ. ޗައިނީސް ގަވަރމެންޓް ވެބްސައިޓް މެދުވެރިކޮށް ހުށަހަޅާއިރު، ބޭނުންވާ ހުރިހާ ޑޮކިއުމެންޓްތައް ފުރިހަމަކޮށްގެން ހުށެހެޅުމަށް މިނިސްޓްރީއިން އިރުޝާދުދީފައިވެއެވެ.

ކޯހަށް ހޮވޭ ބައިވެރިން ކޯހަށް ފުރުމުގެ ކުރިން، ކޯސް ހިންގާ އިންސްޓިޓިއުޓަކީ އަދި ހޮވިފައިވާ ކޯހަކީ މޯލްޑިވްސް ކޮލިފިކޭޝަންސް އޮތޯރިޓީ (އެމްކިޔުއޭ) އިން ގަބޫލުކުރާ ތަނެއްކަން އަދި ކޯހެއްކަން ކަށަވަރުކުރުމަށް މިނިސްޓްރީއިން ވަނީ އިލްތިމާސްކޮށްފައެވެ. މީގެ އިތުރުން، ރާއްޖޭގައި ވަކި ލައިސެންސެއް އޮންނަންޖެހޭ ދާއިރާތަކުން ކިޔަވަންދާ ފަރާތްތަކުން ކަމާބެހޭ އިދާރާތަކުން ގަބޫލުކުރާ މަރުކަޒެއްތޯ ޔަގީންކުރަން ވެސް ވަނީ އިލްތިމާސްކޮށްފައެވެ.