ޑުއެލް ޕާސްޕޯޓް އޮންނަ އިސްރާއީލް މީހުންނަށް ވެސް ރަސްމާލޭން ބިން ނުގަނެވޭނެ: ރައީސް މުޢިއްޒު

އެހެން ޤައުމުތަކުގެ ޑުއެލް ޕާސްޕޯޓް އޮންނަ އިސްރާއީލުގެ ރައްޔިތުންނަށް ވެސް ރަސްމާލެ މަޝްރޫޢުގެ ދަށުން ބިން ނުވަތަ ޕްރޮޕަޓީ ނުގަނެވޭނެ ކަމަށާއި، އެކަމުގައި އެއްވެސް "ލޫޕްހޯލެއް" ނޯންނާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، ސަރުކާރުން މަޖިލީހަށް ހުށަހަޅާފައިވާ ރިއަލް އެސްޓޭޓް ބިލާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ. އެ ބައްދަލުވުމުގައި ނޫސްވެރިޔާ ވަނީ ރިއަލް އެސްޓޭޓް ބިލުގައި އިސްރާއީލް ރައްޔިތުންނަށް ޕްރޮޕަޓީ ގަތުން މަނާކޮށްފައިވާއިރު، އިސްރާއީލުގެ ގިނަ ރައްޔިތުންނަކީ އެމެރިކާ ފަދަ ޤައުމުތަކުގެ ޕާސްޕޯޓު ވެސް ގެންގުޅޭ ބަޔަކަށް ވާތީ، އެ ބިލުގެ ތެރެއިން އެފަދަ ފަރާތްތަކަށް ފުރުޞަތު ލިބިދާނެތޯ ސުވާލުކޮށްފައެވެ.

އެ ސުވާލަށް ޖަވާބު ދެއްވަމުން ރައީސް މުޢިއްޒު ވިދާޅުވީ، ސަރުކާރުން ހުށަހެޅި އިމިގްރޭޝަން ބިލުގައި ވަކި ކަމަކާ ނުގުޅުވައި، މުތުލަޤަށް އިސްރާއީލް ޕާސްޕޯޓުގައި ރާއްޖެ އެތެރެވުން މަނާކުރަން ސާފުކޮށް ބަޔާންކޮށްފައިވާނެ ކަމަށެވެ. އަދި ޑުއެލް ޕާސްޕޯޓުގައި ރާއްޖެއަށާއި އެހެން ޤައުމުތަކަށް އެތެރެވުމުގައި ބަލަނީ އިމިގްރޭޝަންގެ މިންގަނޑުތަކަށް ކަމުގައި ވިޔަސް، ރިއަލް އެސްޓޭޓް ބިލުގައި އެއަށްވުރެ ވެސް ހަރުދަނާ އުޞޫލުތަކެއް ކަނޑައަޅާފައިވާނެ ކަމަށް އެމަނިކުފާނު ވިދާޅުވިއެވެ.

ރައީސް އިތުރަށް ތަފްޞީލު ދެއްވަމުން ވިދާޅުވީ، ޑުއެލް ޕާސްޕޯޓެއްގައި ރާއްޖެ އެތެރެވި ކަމުގައި ވިޔަސް، ރާއްޖޭގައި އިންވެސްޓް ކުރެވޭނީ އިތުރު ތަފްޞީލުތައް ބަލައި، ހަރުދަނާ "ކޭވައިސީ" ޗެކްތައް ފުރިހަމަކޮށްގެން ކަމަށެވެ. އަދި އެ ކަންކަން ކަމާބެހޭ އިދާރާތަކުން ކަށަވަރު ނުކުރަނީސް އެއްވެސް ހުއްދައެއް ނުދޭނެ ކަމަށް ވެސް ރައީސް ފާހަގަކުރެއްވިއެވެ.

"އިންވެސްޓް ކުރާއިރު ބަލަން ޖެހޭ އަދި ބެލޭނެ ކަންކަން ހުރޭ. އެހެންވީމާ އެއްވެސް ލޫޕްހޯލެއް އޮތް ކަމެއް ނޫން މިއީކީ،" ރައީސް މުޢިއްޒު ވިދާޅުވިއެވެ.

ސަރުކާރުގެ ފަރާތުން ރިއަލް އެސްޓޭޓް ވިޔަފާރީގެ ބިލު މަޖިލީހަށް ހުށަހަޅާފައިވާއިރު، މި ބިލަކީ ދިވެހިރާއްޖޭގެ ރިއަލް އެސްޓޭޓް ވިޔަފާރީގެ ދާއިރާ ދެމެހެއްޓެނިވި ގޮތެއްގައި ހަރުދަނާކޮށް، ހާމަކަންބޮޑު އަދި ޖަވާބުދާރީވަނިވި ނިޒާމެއްގެ ތެރެއިން އެ ވިޔަފާރި ހިންގުމަށް މަގުފަހިކުރުމުގެ ގޮތުން ސަރުކާރުން ހުށަހެޅި ބިލެކެވެ.

މި ބިލު ހުށަހެޅުމުގެ މައިގަނޑު ސަބަބުތަކުގެ ތެރޭގައި ރިއަލް އެސްޓޭޓް ޑިވެލޮޕަރުން ރަޖިސްޓަރީކުރުމާއި، އެ ފަރާތްތަކުގެ ޙައްޤުތަކާއި ޒިންމާތައް ކަނޑައެޅުމާއި، ޕްރޮޕަޓީ ގަންނަ ފަރާތްތަކުގެ މަޞްލަޙަތު ރައްކާތެރިކުރުން ހިމެނެއެވެ. އަދި މި ވިޔަފާރީގައި ޙަރަކާތްތެރިވާ ފަރާތްތައް މޮނިޓަރކުރެވޭނެ ހަރުދަނާ ޤާނޫނީ އޮނިގަނޑެއް އެކުލަވައިލުމަކީ ވެސް މި ބިލުގެ މުހިންމު މަޤްޞަދެކެވެ.

މި ބިލުގެ 93 ވަނަ މާއްދާގެ (ށ)ގައި ކަނޑައަޅާފައިވަނީ، އިސްރާއީލްގެ ރައްޔިތުންނަށް ނުވަތަ އެ މީހުންގެ ސީދާ އަދި ނުސީދާ ހިއްސާއެއް އޮންނަ ޤާނޫނީ ޝަޚްޞަކަށް ޒޯނުގައިވާ ޕްރޮޕަޓީއެއްގެ ލީސްހޯލްޑް ރައިޓްސް ނުވިއްކޭނެ ކަމަށާއި އަދި ބިމެއް ސަބްލީސް ވެސް ނުކުރެވޭނެ ކަމަށެވެ.