ރަސްމާލެ މަޝްރޫއާ ގުޅޭގޮތުން ފެންނަ ނުފެންނަ ވޯޓެއް ނުނަގާނަން: ރައީސް މުޢިއްޒު

ރަސްމާލެ ތަރައްގީކުރުމުގެ ބިޔަ މަޝްރޫއާ ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް ނުވަތަ ރެފަރެންޑަމެއް ނުނަގާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ރަސްމާލޭން 500 ހެކްޓަރު ޔޫއޭއީގެ އީގަލް ހިލްސް ކުންފުންޏަށް ދޭން އުޅޭ ކަމަށް ބުނާ މައްސަލައިގައި ރައްޔިތުންގެ ފެންނަ ނުފެންނަ ވޯޓަކަށް ދިއުމަށް ގޮވާލަން އިދިކޮޅު އެމްޑީޕީގެ ގައުމީ މަޖިލީހުން ވަނީ ދާދިފަހުން ފާސްކޮށްފައެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، އެ މަޝްރޫއާ ގުޅިގެން ރައްޔިތުންގެ ފެންނަ ނުފެންނަ ވޯޓަކަށް ދާނެތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން ރައީސް ވިދާޅުވީ އެއީ ރެފަރެންޑަމަށް ދާންޖެހޭ ކަމެއް ނޫންކަމަށެވެ.

ރައީސް މިފަދައިން ވިދާޅުވެފައި މިވަނީ، ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ރިއަލް އެސްޓޭޓް ވިޔަފާރީގެ ބިލާ ހަވާލާދެއްވައެވެ. ހެންވޭރު އުތުރު ދާއިރާގެ މެންބަރު އަހުމަދު އައިފާނު ހުށަހެޅުއްވި މި ބިލަކީ ރަސްމާލެ ފަދަ ރިއަލް އެސްޓޭޓް ދާއިރާއަށް ހާއްސަކޮށް އެކުލަވާލެވޭ ފުރަތަމަ ގާނޫނެވެ.

މި ބިލުގެ ދަށުން ރިއަލް އެސްޓޭޓް ވިޔަފާރި ރެގިއުލޭޓް ކުރުމަށްޓަކައި ހާއްސަ އިދާރާއެއް އުފައްދައި، ވިއްކާ ބިންބިމާއި އިމާރާތްތަކުގެ ޔުނިޓުތަކުގެ ދަފްތަރެއް ގާއިމުކުރުމަށް ވަނީ ހިމަނާފައެވެ. އަދި ޑިވެލޮޕަރުންނާއި، ބްރޯކަރުންނާއި، އޭޖެންޓުންގެ އިތުރުން ވެލުއަރުންނަށް ލައިސަންސް ދިނުމުގެ ނިޒާމެއް ހަމަޖައްސައި، އިމާރާތްކޮށް ނުނިމެނީސް ޔުނިޓު ގަންނަން ދައްކާ ފައިސާއަށް ގާނޫނީ ރައްކާތެރިކަން ލިބިގެންދާނެ ކަމަށް ބިލުގައިވެއެވެ.

މަޖިލީހަށް ހުށަހަޅާފައިވާ ބިލުގައި ހިމެނޭ މުހިންމު ކަންކަމުގެ ތެރޭގައި:

77 ވަނަ މާއްދާގެ (ރ): ކަނޑައަޅާ ޒޯނުގައި ތަރައްގީކުރާ ތަންތަނާއި ހިންގާ ވިޔަފާރިތަކަށް އަދި އެތަނުގައި ދިރިއުޅޭ ފަރާތްތަކަށް ވެސް ބަނގުރަލާއި، އޫރުމަހާއި އެފަދަ ތަކެތި އިމްޕޯޓްކުރުމާއި ވިއްކުން ނުވަތަ ބޭނުންކުރުން މުޅިން މަނާވާނެއެވެ.

78 ވަނަ މާއްދާގެ (ހ): އިންޓެގްރޭޓެޑް ރިއަލް އެސްޓޭޓް ޒޯނެއްގެ ގޮތުގައި ކަނޑައަޅާ ސަރަހައްދެއް މާސްޓަރ ޑިވެލޮޕަރަކަށް ކުއްޔަށް ދެވޭނީ ގިނަވެގެން 99 އަހަރުގެ މުއްދަތަށެވެ.

81 ވަނަ މާއްދާގެ (ހ): މި ޒޯނުގެ ތެރޭގައި ހިންގާ ވިޔަފާރިތަކުން ފޯރުކޮށްދޭ މުދަލާއި ހިދުމަތް ބެލެވޭނީ ޓޫރިޒަމް ދާއިރާގެ މުދަލާއި ހިދުމަތް ކަމުގައެވެ. އަދި ޓެކްސް ނެގޭނީ ވެސް އެ ރޭޓުންނެވެ.

89 ވަނަ މާއްދާގެ (މ): މި ޒޯނުން ޕްރޮޕަޓީއެއް ގަތުމަކުން ރާއްޖޭގެ ރައްޔިތަކަށް ވުމުގެ އެއްވެސް ހައްގެއް ނުލިބޭނެއެވެ.

93 ވަނަ މާއްދާގެ (ށ): އިޒްރޭލުގެ އެއްވެސް ރައްޔިތަކަށް، ނުވަތަ އެ ގައުމުގެ ހިއްސާ އޮންނަ އެއްވެސް ކުންފުންޏަކަށް މި ޒޯނުން އެއްވެސް ޕްރޮޕަޓީއެއްގެ ލީސްހޯލްޑް ރައިޓްސް ނުވިއްކޭނެއެވެ. އަދި ސަބްލީސް ވެސް ނުކުރެވޭނެއެވެ.

95 ވަނަ މާއްދާގެ (ހ): ވަކި އެއް ގައުމެއްގެ ރައްޔިތުންނަށް ނުވަތަ ކުންފުނިތަކަށް ރަޖިސްޓްރީކޮށްދެވޭނީ ޖުމްލަ ބިންތަކުގެ %25 އަށްވުރެ އިތުރުނުވާ މިންވަރަށެވެ.

96 ވަނަ މާއްދާގެ (ހ): ޒޯނުގެ ސަލާމަތާއި ރައްކާތެރިކަން ބަލަހައްޓާނީ ރާއްޖޭގެ ސަލާމަތީ ހިދުމަތްތަކުންނެވެ.

98 ވަނަ މާއްދާ: ރާއްޖޭގެ ގާނޫނުތަކާ ހިލާފު އެއްވެސް ކަމެއް ނުކުރެވޭނެ ކަމަށާއި، ދައުލަތުގެ ސިޔާދަތާއި އިސްތިގުލާލަށް ގެއްލުންވާ ފަދަ އެއްވެސް ކަމެއް ނުކުރެވޭނެ ކަމަށް ބަޔާންކޮށްފައިވެއެވެ. އަދި ޖުވާކުޅުން ފަދަ އިސްލާމީ ޝަރީއަތުގައި މަނާ އެއްވެސް ކަމެއް ނުހިންގޭނެ ކަމަށާއި، އިސްލާމްދީން ފިޔަވައި އެހެން ދީންތަކުގެ ޝިއާރު ފާޅުކުރުމާއި، އަޅުކަންކުރާ ތަންތަން ހެދުން މުޅިން މަނާވާނެއެވެ.

މީގެއިތުރުން، މި ގާނޫނާ ހިލާފުވާ އަމަލުތަކަކީ ޖިނާއީ ކުށެއް ކަމުގައި ބެލެވޭނަމަ، އަޅާ އިދާރީ ފިޔަވަޅުތަކުގެ އިތުރުން އެކަން ތަހުގީގުކުރުމަށް ކަމާބެހޭ މުއައްސަސާތަކަށް ހުށަހަޅަންޖެހޭނެ ކަމަށް ވެސް ބިލުގައި ބަޔާންކޮށްފައިވެއެވެ.