ރާއްޖޭގެ މިނިވަންކަމާއި ސިޔާދަތަށް ޗައިނާގެ ފުރިހަމަ އެއްބާރުލުން އޮންނާނެ: ޗައިނާ ސަފީރު

ރާއްޖޭގެ މިނިވަންކަމާއި ސިޔާދަތަށް ޗައިނާގެ ފުރިހަމަ އެއްބާރުލުން އޮންނާނެ ކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޝިއަންހުއާ ވިދާޅުވެއްޖެއެވެ.

ސަފީރު މިހެން ވިދާޅުވެފައިވަނީ، ޗައިނާގެ ސަން ޔަޓް-ސެންގެ 160 ވަނަ އުފަންދުވަސް ފާހަގަކުރުމުގެ ގޮތުން ބެއިޖިންގައި ބޭއްވި ހާއްސަ ރަސްމިއްޔާތެއްގައި، ޗައިނާގެ ރައީސް ޝީ ޖިންޕިންގް ދެއްކެވި ވާހަކަފުޅާ ގުޅިގެން އޭނާ އެކްސްގައި ކުރެއްވި ޕޯސްޓެއްގައެވެ.

ޗައިނާ ސަފީރު ކޮންގް ބުނި ގޮތުގައި، މީގެ ޤަރުނަކަށްވުރެ ކުރިން، 1911 ވަނަ އަހަރު ސަން ޔަޓް-ސެން އިސްވެ ހުންނަވައިގެން ގެންނެވި އިންގިލާބަކީ ޗައިނާގައި އެތައް ހާސް އަހަރެއް ވަންދެން އޮތް ވިރާސީ ރަސްކަން ނިމުމަކަށް ގެނެސް، ޖުމްހޫރީ ވެރިކަމަކަށް މަގުފަހިކޮށްދިން ތާރީހީ ހާދިސާއެކެވެ. އޭނާގެ މުޅި ހަޔާތް ހޭދަކުރެއްވީ ޤައުމީ މިނިވަންކަމާއި، އިޖުތިމާއީ ކުރިއެރުމާއި، ރައްޔިތުންގެ ލާބައާއި މަންފާއަށް މަސައްކަތް ކުރެއްވުމުގައެވެ. ޗައިނާ އަލުން ދިރުވައި އާލާކުރުމަށް އޭނާ ގެންގުޅުއްވި ތަސައްވުރާއި، ޤައުމީ ލޯތްބާއި، ރައްޔިތުންނަށްޓަކައި ވެވަޑައިގެންނެވި ޤުރުބާނީއާއި ސާބިތުކަމަކީ މިއަދުވެސް ޗައިނާގެ ތާރީހުގައި އޮތް އަގުހުރި ކަމެއް ކަމަށް ސަފީރު ވިދާޅުވިއެވެ.

ދިވެހިރާއްޖޭގެ ތާރީހަށް އަލިއަޅުއްވާލައްވަމުން ސަފީރު ކޮންގް ވިދާޅުވީ، ޖުމްހޫރީ ވެރިކަމެއް ޤާއިމުވެގެން ދިއުމަކީ ދިވެހިރާއްޖޭގެ ތާރީހުގައިވެސް ނުހަނު މުހިންމު އަދި ފާހަގަކޮށްލެވޭ ވަގުތެއް ކަމަށެވެ. އެގޮތުން، ޖުމްހޫރީ ދުވަހަކީ ޤައުމުގެ މާޒީއާއި، މިނިވަންކަމާއި، ސިޔާދަތުގެ އިތުރުން މުސްތަޤުބަލަށް ކުރާ އުންމީދުތަކާ މެދު ވިސްނައި ފިކުރުކުރުމަށް ލިބޭ މުހިންމު ފުރުސަތެއް ކަމުގައި ސަފީރު ފާހަގަކުރެއްވިއެވެ.

މީގެ އިތުރުން، ދިވެހިރާއްޖޭގެ ސިޔާދަތާއި، މިނިވަންކަމާއި، ޤައުމީ ކަރާމާތް ރައްކާތެރިކުރުމުގައި ޗައިނާއިން އަބަދުވެސް ރާއްޖެއަށް ފުރިހަމައަށް އެއްބާރުލުންދީ، ސާބިތުކަމާއެކު ރާއްޖެއާއެކު އޮންނާނެކަމުގެ ޔަޤީންކަން ސަފީރު ދެއްވިއެވެ. އަދި ރާއްޖޭގެ ޤައުމީ ހާލަތާ ގުޅޭ، އަމިއްލަ ތަރައްޤީގެ މަގެއް އިހްތިޔާރުކޮށްގެން ކުރިއަށް ދިއުމަށް ދިވެހިރާއްޖެއިން ކުރާ މަސައްކަތްތަކަށް ޗައިނާއިން ފުރިހަމައަށް ތާއީދުކުރާ ކަމަށްވެސް ސަފީރުގެ ޕޯސްޓުގައި ވިދާޅުވެފައިވެއެވެ.

ސަފީރު ކޮންގް ޝިއަންހުއާގެ މެސެޖު ނިންމަވާލައްވާފައިވަނީ، ދެ ޤައުމުގެ ދެމެދުގައި އޮތް ޒަމާންވީ އެކުވެރިކަމާއި އެއްބާރުލުން އިތުރަށް ބަދަހިކޮށް، ދެ ޤައުމަށްވެސް ފައިދާހުރި ގޮތެއްގައި ގުޅިގެން ތަރައްޤީގެ މަޝްރޫއުތައް ކުރިއަށް ގެންދިއުމަށް ޗައިނާ އޮތީ ތައްޔާރަށްކަން ހާމަކުރައްވަމުންނެވެ.