ދިރުވާލައިގެން މަސްތުވާތަކެތި އެތެރެކުރަން އުޅުނު 62 އަހަރުގެ ދިވެއްސެއް ހައްޔަރުކޮށްފި

ދިރުވާލައިގެން ރާއްޖެއަށް މަސްތުވާތަކެތި އެތެރެކުރަން އުޅުނު ދިވެއްސަކު މޯލްޑިވްސް ކަސްޓަމްސް ސަރވިސް އިން އަތުލައިގެންފިއެވެ.

ކަސްޓަމްސް އިން ބުނީ މި މައްސަލައިގައި އަތުލައިގެންފައިވަނީ ތައިލޭންޑުން ރާއްޖެ އައި އުމުރުން 62 އަހަރުގެ ދިވެހި ފިރިހެނެއް ކަމަށެވެ. އެ މީހާ ހިފަހައްޓާފައިވަނީ 2026 އޮކްޓޯބަރު 24 ވީ ދުވަހު ވެލާނާ އިންޓަނޭޝަނަލް އެއާޕޯޓުންނެވެ.

ކަސްޓަމްސް އިން ބުނި ގޮތުގައި، މި މީހާ ހުއްޓުވީ އޭނާގެ އަމަލުތައް ހުރިގޮތުން ޝައްކުކުރެވިގެންނެވެ. އަދި އޭނާއާ ސުވާލުކޮށް އިތުރަށް ބަލައިފާސްކުރުމުގެ ތެރޭގައި، ހަށިގަނޑުގެ އެތެރޭގައި މަސްތުވާތަކެތި ފޮރުވައިގެން ގެނެސްފައިވާ ކަމަށް ޝައްކުކުރެވިގެން ސްކޭން ކުރުމުން، ދިރުވާލައިގެން މަސްތުވާތަކެތި އެތެރެކޮށްފައިވާކަން ވަނީ ކަށަވަރުވެފައެވެ.

މިގޮތުން އޭނާގެ ހަށިގަނޑުން ޖުމްލަ 19 ބުލެޓް ވަނީ ނަގާފައެވެ. އޭގެ ތެރޭގައި ހިމެނެނީ 117.6 ގްރާމްގެ ކޮކެއިން އަދި 167.30 ގްރާމްގެ ސިންތެޓިކް ކެތިނޯންއެވެ. މިއާއެކު އަތުލައިގަނެވުނު މަސްތުވާތަކެތީގެ ޖުމްލަ ބަރުދަނަކީ 284.9 ގްރާމެވެ.