"ބޮސް އަލުން ގެނޭ": އެންވީޑިއާގެ މުވައްޒަފުން ޖެންސެން ހުއާންގް އެނބުރި އައުމަށް އެދި ގޮވާލަނީ ކީއްވެ؟

ދުނިޔޭގެ ޓެކްނޮލޮޖީގެ މައި މަރުކަޒު ކަމަށްވާ ސިލިކަން ވެލީގެ އެންމެ ވަރުގަދަ ކުންފުނިތަކުގެ ތެރޭގައި ހިމެނޭ އެންވީޑިއާ (Nvidia) ގެ ޗީފް އެގްޒެކެޓިވް އޮފިސަރު (ސީއީއޯ) ޖެންސެން ހުއާންގް، ބޮޑެތި އަޚުލާޤީ މައްސަލަތަކަކާ ގުޅިގެން މަޤާމުން އިސްތިއުފާ ދެއްވި ނަމަވެސް، އޭނާ އަލުން މަޤާމަށް ގެނައުމަށް އެ ކުންފުނީގެ ގިނަ އަދަދެއްގެ މުވައްޒަފުން ގޮވާލަން ފަށައިފިއެވެ.

އޭނާގެ އިސްތިއުފާ ދިނީ ޖާސޫސީ މައްސަލަތަކަކާއި ކުންފުނީގެ މުވައްޒަފުންތަކަކާ އެކު ލޯބީގެ ގުޅުންތަކެއް ބޭއްވި ކަމަށް ތުހުމަތުކުރެވުނު މައްސަލަތަކަކާ ގުޅިގެންނެވެ. އެހެންނަމަވެސް، މިފަދަ ބޮޑެތި މައްސަލަތަކެއް ފެންމަތިވެފައި ވަނިކޮށްވެސް، ކުންފުނީގެ މުވައްޒަފުންގެ މެދުގައި އޭނާއަށް އޮތް ތާއީދާއި މަޤްބޫލުކަމަށް ކުޑަވެސް ބަދަލެއް ނާންނަކަން މިހާރު ދަނީ ހާމަވަމުންނެވެ.

ކުންފުނީގެ އެތެރޭގެ ޚިޔާލު ހޯދާ ޕްލެޓްފޯމެއްގައި ހިއްސާކުރި ޕޯސްޓަކަށް 1،600 އަށް ވުރެ ގިނަ މުވައްޒަފުން ކޮމެންޓުކޮށް، އޭނާއަށް ތާއީދު އޮތްކަން ވަނީ ހާމަކޮށްފައެވެ. ނަން ހާމަނުކުރާ މުވައްޒަފަކު ވަނީ "ކުންފުނީގެ މިޝަނަށް އިތުބާރު ކުރާނަމަ، އަހަރެމެންގެ 'ބޮސް' އަލުން ގެންނާން." ގޮވާލާފައެވެ. އަނެއް ބަޔަކު ބުނަމުންދަނީ އޭނާއަކީ ވެސް އިންސާނެއް ކަމަށާއި، ކުށްތަކެއް ކުރެވުނު ނަމަވެސް އިސްލާހުވުމުގެ ދެވަނަ ފުރުސަތެއް އޭނާއަށް ހައްޤުވާ ކަމަށެވެ. އަދި ބައެއް މުވައްޒަފުން ވަނީ މުޅި ކުންފުންޏަށް އީމެއިލް ފޮނުވައި، ޖެންސެންއާއެކު ސާބިތުވެ ތިބިކަން އިޢުލާނުކޮށްފައެވެ.

ޖެންސެން ހުއާންގް ވަނީ 33 އަހަރު ވަންދެން އެންވީޑިއާގެ ކާމިޔާބީގެ ހުންގާނު ހިފަހައްޓައި، އާދައިގެ ދަރަޖައިން ދުނިޔޭގެ އެންމެ އަގުބޮޑު، އާޓިފިޝަލް އިންޓެލިޖެންސް (އޭއައި) ކުންފުންޏަށް އެންވީޑިއާ ހަދައިދީފައެވެ. އެހެންކަމުން، އޭނާ ނެތި އެންވީޑިއާގެ ކުރިމަގު ބަނަވެދާނެ ކަމުގެ ބިރު މުވައްޒަފުންގެ މެދުގައި ވަނީ އުފެދިފައެވެ.

ކުންފުނިތަކުން ވަކިކުރެވޭ ސީއީއޯއިން އަނބުރާ ގެނައުމަށް މުވައްޒަފުންގެ ޕްރެޝަރު ކުރުމުން، އަލުން ރުޖޫޢަވުމަކީ ޓެކް ދުނިޔެއަށް އައު ކަމެއް ނޫނެވެ. 2023 ވަނަ އަހަރު އޯޕަންއޭއައި (OpenAI) ގެ ސީއީއޯ ސޭމް އޯލްޓްމަން މަޤާމުން ވަކިކުރުމުން، ކުންފުނީގެ 95 އިންސައްތަ މުވައްޒަފުން ވަނީ އޭނާ ނުގެނެސްފިނަމަ އިސްތިއުފާ ދޭނެ ކަމުގެ އިންޒާރުދީ، އޭނާ އަލުން މަޤާމަށް ގެނެސްފައެވެ. ހަމައެފަދައިން، ކުރިން އެޕަލް ކުންފުނީގެ ބޯޑުން ސްޓީވް ޖޮބްސް ވަކިކުރުމަށްފަހު، ފަހުން އަލުން ގެނެސް ކުންފުނީގެ ތާރީޚު ބަދަލުކޮށްލި ހާދިސާއަކީ ވެސް މިފަދަ މިސާލެކެވެ.