ޤައުމަކަށް މޮޅާ ލާބަ ލިބޭނީ އެ ބައެއްގެ ކިބައިގައި އަށަގެންފައި ހުންނަ އަޚުލާގަށް ބަލައި: ވަޒީރު ހީނާ
ޤައުމަކަށް މޮޅާއި ލާބަ ލިބޭނީ އެ ބައެއްގެ ކިބައިގައި އަށަގެންފައި ހުންނަ އަޚުލާޤީ ސިފަތަކުގެ މައްޗަށް ބަލައިގެން ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު ހީނާ ވަލީދު ވިދާޅުވެއްޖެއެވެ.
ވަޒީރު މިހެން ވިދާޅުވީ މިއަދު ރަސްމީކޮށް އިފްތިތާޙުކުރެވުނު "އިޙްތިރާމް އަދާކުރުމުގެ ޤައުމީ މަޝްރޫޢު" އިފްތިތާޙުކޮށްދެއްވުމުގެ ގޮތުން ބޭއްވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުންނެވެ. ހީނާ ވިދާޅުވީ މި މަޝްރޫޢަކީ އަންނަން އޮތް ޖީލުތަކުގެ ދެމިއޮތުމަށާއި، އިންސާނީ ބިނާކުރުމަށްޓަކައި ދިވެހި ވެރިޔަކު މިހާތަނަށް ފެއްޓެވި އެންމެ ބޮޑު އެއް މަސައްކަތްޕުޅުކަމަށެވެ. .
ވަޒީރު ހީނާގެ ވާހަކަފުޅުގައި، މީގެ 700 އެއްހާ އަހަރު ކުރިން ރާއްޖެ ޒިޔާރަތްކުރެއްވި މަޝްހޫރު ސައްޔާޙު އިބްނު ބަތޫތާގެ ލިޔުންވުންތަކަށް އަލިއަޅުއްވާލެއްވިއެވެ. ދިވެހިންނަކީ ސުލްޙަވެރި، ދީންވެރި އަދި ތެދުވެރި ބައެއްގެ ގޮތުގައި އިބްނު ބަތޫތާ ފާހަގަކުރައްވާފައިވާކަން ހަނދާންކޮށްދެއްވަމުން ވަޒީރު ވިދާޅުވީ، ބަޔަކު ޙަޟާރަތެއްގެ ވެރި ބަޔަކަށް ވަނީ ހަމައެކަނި ރީތި ޢިމާރާތްތަކަކުން ނޫން ކަމަށާއި، އެކަމުގެ އަސްލު ބިންގަލަކީ އެ ބައެއްގެ ކިބައިގައި ހުންނަ އަޚުލާޤީ ސިފަތައް ކަމަށެވެ. އަދި އަދަބާއި އިޙްތިރާމަކީ މުޖުތަމަޢެއްގެ ފުރާނަ ކަމަށާއި، ކާބަފައިންނަކީ ދީނަށާއި، ބޮޑެތި މީހުންނަށާއި، އަވަށްޓެރިންނަށް ކަމޭހިތައިގެން ދަރިން ތަރުބިއްޔަތުކުރި ބައެއްކަން ފާހަގަކުރެއްވިއެވެ.
ނަމަވެސް މިއަދުގެ ޙާލަތާމެދު ކަންބޮޑުވުން ފާޅުކުރައްވަމުން ވަޒީރު ވިދާޅުވީ، ޒަމާނަށް އައި ބަދަލުތަކާއެކު ދިވެހިންގެ އުޅުމާއި ގުޅުމަށް ނޭދެވޭ ބަދަލުތަކެއް އައިސްފައިވާ ކަމަށެވެ. އެގޮތުން ބޮޑެތި މީހުންގެ ފަރާތުން ފެންނަންޖެހޭ ރިވެތި ނަމޫނާ ކުޑަކުދިންނަށް ނުފެނުމާއި، އިސްރަށްވެހިންނަށް އިޙްތިރާމް ކުޑަވުމާއި، މީހުންގެ އަބުރު ކަތިލުމަށް ދޫތައް ވީއްލިފައިވުން ފަދަ ކަންކަން ވަޒީރު ފާހަގަކުރެއްވިއެވެ. މީގެއިތުރުން ބަންގީގެ އަޑުއިވޭ ހިނދު ކުޅިވަރާއި ކޮފީ މޭޒުތަކުގައި ވަގުތު ބޭކާރުކުރުމާއި، އިސްލާމީ މިންގަނޑުން ބޭރުން ހެދުން އެޅުމާއި، މަގުމަތީގެ އަމާންކަން ގެއްލި ފުރައްސާރަކުރުން އިތުރުވެފައިވާކަން ވެސް ހިތާމައާއެކު ފާހަގަކުރެއްވިއެވެ.
އިޙްތިރާމަކީ ފައިސާއަކުން އަގުނުކުރެވޭނެ، ކޮނޑުއަޅައިގެން ނުއުފުލޭނެ، ދުލުން ބަޔާންކޮށްދިނުމަށް ނުކުޅެދޭނެ އަދި ހިސާބަކުން ޢަދަދު ނުކުރެވޭނެ ފަދަ މަތިވެރި މުއްސަނދިކަމެއް
މީގެއިތުރުން، މީގެ 38 އަހަރު ކުރިން ރާއްޖޭގެ މަޝްހޫރު އަދީބު، އަލްމަރުޙޫމް އަލްއުސްތާޛު އިބްރާހީމް ޝިހާބު ދޫކުރައްވާފައިވާ ޢިބްރަތްތެރި ނަޞޭޙަތްޕުޅު ވަޒީރު ހަނދާންކޮށްދެއްވިއެވެ. އެއީ ދިވެހީންގެ އަޚްލާޤިއްޔާތު ދުވަހުން ދުވަހަށް ދަށަށްދާ ސަބަބުތައް ދެނެގަނެ، އެކަންކަން އިޞްލާޙުކުރުމަށް އަވަސް ފިޔަވަޅުތަކެއް އަޅަންޖެހިފައިވާ ކަމަށް ވިދާޅުވި ވިދާޅުވުމެވެ.
ކާބަފައިންގެ ޒަމާނުގައި މައިންބަފައިންނަށާއި، މުދައްރިސުންނަށާއި، އިސްރަށްވެހިންނަށް އަދި އަވަށްޓެރިންނަށް އަދާކުރި ގަދަރާއި އިހުތިރާމް މިއަދުގެ މުޖުތަމައުން ފަނޑުވަމުންދާތީ ވަޒީރު ކަންބޮޑުވުން ފާޅުކުރެއްވިއެވެ.
ޒަމާނަށް އައި ބަދަލުތަކާއެކު އަމިއްލަ އެދުން އިސްވުމާއި، ބޮޑެތި މީހުންގެ ފަރާތުން ކުޑަކުދިންނަށް ނަމޫނާ ނުފެނުމާއި، މީސްމީޑިއާގައްޔާއި އެހެނިހެން ގޮތްގޮތުން މީހުންގެ އަބުރު ކަތިލުމާއި، ނަމާދު ވަގުތުތަކުގައި ކުޅިވަރާއި މަޖަލުގައި ވަގުތު ބޭކާރުކުރުމާއި، އިސްލާމީ މިންގަނޑުތަކާ ހިލާފު ހެދުން އެޅުމާއި މަގުމަތީގެ ފުރައްސާރަ އިތުރުވުމަކީ މިއަދު ފެންނަ ހިތާމަވެރި ހަގީގަތްތަކެއް "
ވާހަކަފުޅު ނިންމަވާލައްވަމުން ވަޒީރު ހީނާ ވަލީދު ވިދާޅުވީ، ދުނިޔޭގެ ކުރު ހަޔާތުގައި އެކަކު އަނެކަކަށް ރިވެތި ހިނިތުންވުމެއް ބަދަލުކޮށްލުމަކީ އަގުނުކުރެވޭ ފަދަ ނިއުމަތެއް ކަމަށެވެ. އަދި އިންސާނިއްޔަތުކަމާއި އިހްތިރާމަކީ ފައިސާއިން ގަނެވޭނެ އެއްޗެއް ނޫން ކަމަށްވާއިރު، ގެއްލެމުންދާ މި އަގުހުރި ސިފަތައް އަލުން ދިރުވައި، އިހްތިރާމްގެ ރިވެތި ސަގާފަތެއް ބިނާކުރުމަށް މުޅި މުޖުތަމައު އެކުގައި އަތުގުޅާލުމަށް އެންމެހައި ދިވެހި ރައްޔިތުންނަށް އެކަމަނާ ވަނީ އިލްތިމާސްކުރައްވާފައެވެ
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
