އިންޑިއާއިން ވިސާގެ އުސޫލުތައް ފަސޭހަކޮށް، ފޯމު ފުރުމަށް ބޮޑެތި ލުއިތަކެއް

އިންޑިއާއަށް ދަތުރުކުރާ ބޭރު ގައުމުތަކުގެ މީހުންނަށް ވިސާ ދޫކުރުމުގެ ނިޒާމު އިތުރަށް ލުއިފަސޭހަކޮށް، ވިސާގެ ބާވަތްތަކާއި ފޯމުތަކަށް ބޮޑެތި ބަދަލުތަކެއް ގެނެސްފިއެވެ.

އިންޑިއާގެ މިނިސްޓްރީ އޮފް ހޯމް އެފެއާޒް (އެމްއެޗްއޭ) އިން ބުނިގޮތުގައި، މި ގެނެވުނު އިސްލާހުތަކާއެކު މައިގަނޑު ވިސާ ކެޓަގަރީތަކުގެ އަދަދު ވަނީ 13 އިން 9 އަށް މަދުކޮށްފައެވެ. އަދި ސަބް-ކެޓަގަރީތައް ނުވަތަ ގޮފިތަކުގެ އަދަދު ވަނީ 49 އިން 23 އަށް ކުޑަކޮށްފައެވެ. މީގެއިތުރުން، ވިސާ އެދި ހުށަހަޅާ ފޯމުތަކުގައި ފުރިހަމަކުރަންޖެހޭ މައުލޫމާތުތައް %65 އާއި %70 އާ ދެމެދުގެ މިންވަރަކަށް ވަނީ މަދުކޮށްފައެވެ.

މި ބަދަލުގެ މައިގަނޑު މަގުސަދަކީ އެ ގައުމަށް ދަތުރުކުރާ ފަރާތްތަކުން ވިސާއަށް އެދުމުގައި ހޭދަވާ ވަގުތު ސަލާމަތްކޮށްދީ، މަރުހަލާތައް އަވަސްކުރުމެވެ. އަދި ވިސާ ދޫކުރުމުގެ އިދާރީ ހިންގުން ހަރުދަނާކޮށް، ފޯމުތައް ސްކްރޫޓިނައިޒް ކުރުމަށް އޮފިޝަލުންނަށް ފަސޭހަ މާހައުލެއް ގާއިމުކުރުމެވެ. މި ބަދަލުތައް ތަންފީޒު ކުރުމަށްޓަކައި އައިޓީ ނިޒާމުތައް އަޕްޑޭޓް ކުރަމުންދާ ކަމަށާއި، މިއަހަރުގެ ނިޔަލަށް އައު އުސޫލުގެ ދަށުން ވިސާ ދޫކުރަން ފެށޭނެ ކަމަށް އެމްއެޗްއޭއިން ބުނެއެވެ.

އައު އޮނިގަނޑުގެ ދަށުން ހިމެނޭ މައިގަނޑު 9 ކެޓަގަރީއަކީ:

ބިޒްނަސް ވިސާ

ޑިޕްލޮމެޓިކް ވިސާ

ވަރކް ވިސާ

ޖާނަލިސްޓް ވިސާ

މެޑިކަލް ވިސާ

އޮފިޝަލް ވިސާ

ސްޓޫޑެންޓް ވިސާ

ވިޒިޓަރ ވިސާ

މިސެލޭނިއަސް (އެހެނިހެން) ވިސާ އެވެ.

މި ބަދަލުތަކުގެ ތެރޭގައި ކުރިން އޮތް "ޓޫރިސްޓް ވިސާ" ގެ ބަދަލުގައި މިހާރު ވަނީ "ވިޒިޓަރ ވިސާ" ތައާރަފުކޮށްފައެވެ. މިއީ ފަތުރުވެރިކަމުގެ އިތުރުން ވިޔަފާރީގެ ކުރު ބައްދަލުވުންތަކާއި، ސިއްހީ ލަފާ ހޯދުން ފަދަ ކަންކަން އެއް ވިސާއަކުން ފުރިހަމަ ކުރުމުގެ ފުރުސަތު ދިނުމަށެވެ. ވިޒިޓަރ ވިސާ ދެބަޔަކަށް ބަހާލެވިފައިވާއިރު، އޭގެ ތެރޭގައި 30 ދުވަހުގެ މަލްޓިޕްލް-އެންޓްރީ ވިސާ (ވީ-1) އަދި 1 އަހަރާއި 10 އަހަރާ ދެމެދުގެ ދިގު މުއްދަތުގެ ވިސާ (ވީ-2) ހިމެނެއެވެ.

އަދި ބޭސްފަރުވާއަށް އިންޑިއާއަށް ދާ މީހުންނަށް ހާއްސަ މެޑިކަލް ވިސާވެސް ވަނީ އިތުރަށް ފަސޭހަކޮށްދީފައެވެ. އާދައިގެ ބޭސްފަރުވާއަށް 'އެމް-1' އަދި އާޔުޝް (އެކުވެނި ބޭސްވެރިކަން) އަށް 'އެމް-3' ވިސާ ހަމަޖައްސާފައިވާއިރު، ބަލިމީހާއާއެކު ދާ އެހީތެރިންނަށް 'އެމް-2' އަދި 'އެމް-4' ވިސާ ވަނީ ކަނޑައަޅާފައެވެ. މިއީ އިންޑިއާ ސަރުކާރުގެ "ހީލް އިން އިންޑިއާ" ތަސައްވުރުގެ ދަށުން މެޑިކަލް ޓޫރިޒަމް ކުރިއެރުވުމަށް އެޅި ފިޔަވަޅެކެވެ.

މީގެއިތުރުން ކިޔަވާ ކުދިންނަށް ދޫކުރާ ސްޓޫޑެންޓް ވިސާ އާއި، ވިޔަފާރިވެރިންނަށް ދޫކުރާ ބިޒްނަސް ވިސާގެ ދާއިރާތައް ވެސް ވަނީ އެއް ފުރާޅެއްގެ ދަށަށް ގެނެސް، އޮޅުންބޮޅުން ކުޑަވާނެހެން ތަރުތީބުކޮށްފައެވެ.

އިންޑިއާގެ ދާޚިލީ ވުޒާރާއިން ބުނި ގޮތުގައި، މި އިސްލާހުތައް ގެނެސްފައިވަނީ ދުނިޔޭގެ ތަރައްގީވެފައިވާ ގައުމުތަކުގެ ވިސާ ނިޒާމުތައް ދިރާސާކުރުމަށް ފަހުގައެވެ. މީގެ ސަބަބުން އިންޑިއާއަށް އެކި ބޭނުންތަކުގައި ދަތުރުކުރާ ބޭރުގެ ފަރާތްތަކަށް ވިސާ އިޚްތިޔާރު ކުރުމާއި ލިބިގަތުމުގައި ބޮޑެތި ފަސޭހަތަކެއް ލިބިގެންދާނެއެވެ.