ވިހަ ބަންގުރާ ބޮއެގެން އިންޑިއާގައި 11 މީހުން މަރުވެ، ގިނަ ބަޔަކު އެޑްމިޓްކޮށްފި
އިންޑިއާގެ އިރުއުތުރުގެ ސްޓޭޓެއް ކަމަށްވާ މަނީޕޫރުގައި، ބަންގުރާ ބޮއެގެން 11 މީހުން މަރުވެ، 180 އަށްވުރެ ގިނަ މީހުން އެޑްމިޓްކޮށްފިއެވެ.
މި ހިތާމަވެރި ހާދިސާއާ ގުޅިގެން މަނީޕޫރުގެ މުޝީރުލް ވަޒީރު ޔުމްނާމް ކޭމްޗަންދް ސިންގް ހުކުރު ދުވަހު ނެރުއްވި ބަޔާނެއްގައި ވިދާޅުވީ، ގިނަ އަދަދެއްގެ ބަޔަކު ބަލިވެ ހާލުދެރަވީ ސިއްހަތަށް ގެއްލުންހުރި މާއްދާތައް އެކުލެވޭ ބަންގުރާ ބޭނުންކުރުމުގެ ސަބަބުން ކަމަށެވެ. އަދި ވޭތުވެދިޔަ 48 ގަޑިއިރުގެ ތެރޭގައި މި ހާދިސާގައި މަރުވި މީހުންގެ އަދަދު 11 އަށް އަރާފައިވާއިރު، މިހާތަނަށް 180 އަށްވުރެ ގިނަ ބަލިމީހުން ދެ ހޮސްޕިޓަލެއްގައި އެޑްމިޓްކޮށްގެން ފަރުވާ ދެމުން އަންނަ ކަމަށްވެސް އެ ބަޔާނުގައި ފާހަގަކުރައްވާފައިވެއެވެ.
އިންޑިއާގައި ގަވާއިދާ ހިލާފަށް އުފައްދާ އަދި ސިއްހަތަށް ނުރައްކާތެރި މާއްދާތައް ހިމެނޭ ބަންގުރާ ބޮއެގެން މީހުން މަރުވުމަކީ އާންމުކޮށް ހިނގަމުންދާ ކަމެކެވެ. ކޮންޓްރޯލް ކުރެވިފައިވާ ރަސްމީ ނިޒާމުގެ ބޭރުން ވިއްކާ މިފަދަ އަގުހެޔޮ ބަންގުރާގެ ބާވަތްތަކުގައި، ސިނާއީ މަސައްކަތްތަކަށް ބޭނުންކުރާ ނުރައްކާތެރި ވިހަ ކެމިކަލެއް ކަމަށްވާ މެތަނޯލް ގިނަ އަދަދަކަށް އެކުލެވެއެވެ. މިފަދަ ބަންގުރާ ބައެއް ސަރަހައްދުތަކުގައި ޑޮލަރަކަށްވުރެ ވެސް ހެޔޮ އަގުގައި ފަސޭހައިން ލިބެން ހުންނައިރު، އޭގައި ހިމެނޭ މެތަނޯލްގެ ސަބަބުން ލޯ އަނދިރިވުމާއި، ފުރަމޭ ހަލާކުވުމުގެ އިތުރުން ފުރާނައަށް ވެސް ނުރައްކާވެއެވެ.
މި އަހަރުގެ ތެރޭގައި ވެސް އިންޑިއާގެ އެކި ހިސާބުތަކުގައި މިފަދަ ނުރައްކާތެރި ހާދިސާތައް ވަނީ ހިނގާފައެވެ. އެގޮތުން ވޭތުވެދިޔަ މެއި މަހު މަހަރާޝްތުރާ ސްޓޭޓްގެ ޕޫނޭ އާއި ޕިމްޕްރީ-ޗިންޗްވާޑްގައި މެތަނޯލް އެކުލެވޭ ބަންގުރާ ބޮއެގެން 15 މީހަކު މަރުވެފައިވާއިރު، އޮގަސްޓް މަހު ގުޖުރާތުގެ ބާވްނަގަރު ޑިސްޓްރިކްޓްގައިވެސް މިފަދަ ބަންގުރާ ބޮއެގެން 13 މީހުން މަރުވެ، 60 އަށްވުރެ ގިނަ މީހުންގެ ސިއްހަތަށް ބޮޑެތި ގެއްލުންތަކެއް ލިބިފައިވާ ކަމަށް އެ ގައުމުގެ މީޑިއާތަކުން ރިޕޯޓްކޮށްފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް