ޑިމާންޑް ބޮޑުވެ، އިންޑިއާއިން އިތުރު ހާހެއްހާ މަތިންދާބޯޓަށް އޯޑަރުކުރަނީ
ވައިގެ ދަތުރުފަތުރަށް އިންޑިއާގައި އޮންނަ ޑިމާންޑް ބޮޑުވެ، އިތުރު އެއް ހާސް މަތިންދާބޯޓަށް އޯޑަރުކުރަން އެގައުމު ތައްޔާރަށް އޮތްކަމަށް އިންޑިއާގެ ވިޔަފާރިއާއި ސިނާޢަތްތަކާ ބެހޭ ވަޒީރު ޕިޔުޝް ގޯޔާލް ވިދާޅުވެއްޖެއެވެ.
މިސްރަށް ކުރައްވަމުންގެންދަވާ ދެ ދުވަހުގެ ރަސްމީ ދަތުރުފުޅެއްގައި ނޫސްވެރިންނާ ވާހަކަ ދައްކަވަމުން ގޯޔާލް ވިދާޅުވީ އިންޑިއާއިން މިހާރުވެސް 1200 މަތިންދާބޯޓަށް އޯޑަރު ދީފައިވާކަމަށާއި، އިންޑިއާގެ ވައިގެ ދަތުރުފަތުރުގެ ޑިމާންޑަށް ޚިދުމަތް ދިނުމަށް 2 ހާހެއްހާ މަތިންދާބޯޓު އިތުރަށް ބޭނުންވާކަމަށެވެ. އަދި މިހާރުވެސް 1000 މަތިންދާބޯޓަށް އޯޑަރު ދިނުމަށް އިންޑިއާގެ އެއަރލައިންތައް ތައްޔާރަށް އޮތްކަމަށް އޭނާ ވިދާޅުވިއެވެ. މިހާ ބޮޑު ޑިމާންޑެއް އޮތުމުން މަތިންދާބޯޓު ޝެޑިއުލާއި އެއްގޮތަށް ފޯރުކޮށްދޭކަން ކަށަވަރުކުރުމަށް، މަތިންދާބޯޓު އުފައްދާ އެންމެ ބޮޑެތި އަދި އިތުބާރުކުރެވޭ ކުންފުނިތަކާއެކު މަޝްވަރާކުރަމުން އަންނަކަމަށް ވަޒީރު ގޯޔާލް ވިދާޅުވިއެވެ.
އެއަރ އިންޑިއާ އާއި އިންޑިގޯ އިން މިހާރުވެސް އެއަރބަސް ކުންފުންޏާއި ބޯއިން ކުންފުންޏަށް ގިނަ އަދަދެއްގެ އޯޑަރު ވަނީ ދީފައެވެ. އެއަރބަސް ކުންފުނީގެ ދެ އެސެމްބްލީ ލައިނެއް އިންޑިއާގައި ހިންގިނަމަވެސް، އެއީ ހެލިކޮޕްޓަރާއި އަސްކަރީ ކާގޯ މަތިންދާބޯޓުތަކުގެ ފިނިޝަން މަސައްކަތްކުރާ 2 އެސެމްބްލީ ލައިނެވެ. އަދި ބްރެޒިލްގެ އެމްބްރެއަރ އިން ގެންދަނީ އިންޑިއާގެ އަދާނީ ގްރޫޕާއެކު އިންޑިއާގައި މަތިންދާބޯޓު އެސެމްބްލީ ލައިނެއް ހެދުމުގެ މަޝްވަރާތައް ކުރަމުންނެވެ.
އިންޑިއާއަކީ މިހާރު އެންމެ ހަލުވިކޮށް ކުރިއަރަމުން އަންނަ އޭވިއޭޝަން އެއް މާކެޓެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް