ރަށްރަށަށް ބޭސް ފޮނުވަން ބޭނުންކުރަން ގެނައި ދެ ޑްރޯން ސްޓޭޓްފާމާއާ ހަވާލުކޮށްފި
ޑްރޯން މެދުވެރިކޮށް ރަށްރަށަށް ބޭސް ފޮނުވުމަށްޓަކައި ކުރަންޖެހޭ ޓެސްޓުތައް އަންނަ އަހަރު ފެށުމަށް އެކަމަށް ބޭނުންވާ ދެ ޑްރޯން ރާއްޖެ ގެނެސްފި އެވެ.
ސްޓޭޓް ފާމާ އިން މިއަދު ވަނީ ދެ ޑްރޯން ނޫސްވެރިންނަށް ދައްކާލާ ޑްރޯން އޮޕަރޭޝަން ކުރިއަށް ގެންދަން ނިންމާފައިވާ ސަބަބުތައް ސާފުކޮށް ދީފަ އެވެ. ސްޓޭޓް ފާމާގެ އެމްޑީ ޑރ. ޝާހް މާހިރު ވިދާޅުވީ މި ޑްރޯންތަކަކީ ބެޓެރި އޮޕަރޭޓެޑް އެއްޗެއް ކަމުން ބޭހާއި އިންޖެކްޝަން ފަދަ ތަކެެތި ފޯރުކޮށް ދިނުމަށް ކުރަންޖެހޭ ޚަރަދުތައް ޑްރޯންއާއެކު ވަރަށް ބޮޑުތަނުން ކުޑަކުރެވޭނެ ކަމަށެވެ.
"މިއީ ވަރަށް އޮޓޮމޭޓެޑް އެއްޗެހިތަކެއް. މިއީ ޖިއޯލޮކޭޝަންގައި އެ ބުނާ ތަނަކަށް ޖައްސައިދޭ ނުވަތަ ލޭންޑްކުރުމުގެ ޕްރަގްރާމް މިއަށް ދިނީމަ ވަރަށް ޕްރިޒިޝަން ރަނގަޅު އެއްޗެހިތަކެއް،" ޝާހް މާހިރު ވިދާޅުވި އެވެ.
ސަރުކާރުން ވަނީ، ސްވިޒަލޭންޑުގެ ރިޖިޓެކް ކުންފުންޔާ ގުޅިގެން 2023 ވަނަ އަހަރުވެސް ޑްރޯން ބޭނުންކޮށްގެން ބޭސް ރަށްރަށަށް ފޮނުވުމުގެ މަޝްރޫއުއެއް ލޯންޗްކޮށްފައެވެ. އެގޮތުން، 2023 ވަނަ އަހަރުގެ ސެޕްޓެމްބަރު މަހު ސަރުކާރުން ވަނީ، ހުވަދު އަތޮޅަށް ބޭސް ފޮނުވުމުގެ ގާބިލުކަން ލިބިފައިވާ ޑްރޯނެއް ތައާރަފުކޮށް، އޭގެ އިތުރު ޑްރޯންތައް ރާއްޖޭގެ އިތުރު ސަރަހައްދުތަކަށް ގެންނާނެ ކަމަށް ބުނެފައެވެ.
ޝާހް ވިދާޅުވީ މިއަދު ޑްރޯންތައް ގެނެސްފައިވާއިރު ޑްރޯން ދަތުރުކުރާއިރު ދިމާވެދާނެ މައްސަލަތައް ދެނެގަންނާނެ ކަމަށެވެ. އަދި އެ ދަތުރުތައް ފެށުމުގެ ކުރީން އެމްއެންޑީއެފާއި އޭވިއޭޝަން ސެކިއުރިޓީއާ ކަމާގުޅޭ އިދާރާތަކާއެކު ވަރަށް ގިނަ ބައްދަލްވުންތައް ބޭއްވި މަޝްވަރާ ކުރެވިފައިވާ ކަމަށް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް