ޑްރޯން މެދުވެރިކޮށް ރަށްރަށަށް ބޭސް ފޮނުވަން އަންނަ އަހަރު ޓެސްޓް ކުރަނީ

ޑްރޯން މެދުވެރިކޮށް ރަށްރަށަށް ބޭސް ފޮނުވުމަށްޓަކައި ކުރަންޖެހޭ ޓެސްޓުތައް އަންނަ އަހަރު ރާއްޖޭގެ ފަސް ސަރަހައްދެއްގައި ކުރިއަށް ގެންދިޔުމަށް ސަރުކާރުން ނިންމައިފިއެވެ.

ސްޓޭޓް ފާމާގެ މައި ބޭސް ގުދަނުގައި މިއަދު ނޫސްވެރިންނަށް މައުލޫމާތު ދެއްވަމުން އެކުންފުނީގެ ޗީފް ކޮމާޝަލް އޮފިސަރު އަހުމަދު އިމާދު ވިދާޅުވީ، އެ ކުންފުނިން މިހާރު ދަނީ، ޑްރޯން ބޭނުންކޮށްގެން، ބޭސް އެއްތަނުން އަނެއްތަނަށް އުފުލުމުގެ ޕައިލެޓް ޕްރޮޖެކްޓަކަށް ތައްޔާރުވަމުންނެވެ.

އޭނާ ފާހަގަކުރެއްވި ގޮތުގައި، ފުރަތަމަ ކުއާޓާގެ ތެރޭގައި މި ޕްރޮޖެކްޓުގެ ޓެސްޓުކުރުން ކުރިއަށްދާނެއެވެ. އެގޮތުން، ޕައިލެޓް ޕްރޮޖެކްޓެއްގެ ގޮތުގައި ކުރިއަށް ގެންގޮސް، ނަތީޖާއަށް ބަލައި ރާއްޖޭގެ ބޮޑު ބަޔަކަށް ރޭވިގެން ޕްލޭނެއްގެ ދަށުން ޑްރޯންތައް ޑިވެލޮޕް ކުރެވިގެންދާނެއެވެ.

ސްޓޭޓް ފާމާގެ ކޮމާޝަލް އޮފިސަރު އިމާދު އިތުރަށް ވިދާޅުވީ، ބޭސްތައް ހޯދުމުގައި ރައްޔިތުންނަށް ދިމާވަމުންދާ ދަތިތައް ހައްލުކުރުމަށްޓަކައި އެ ކުންފުނިން މިހާރު ދަނީ ރާއްޖޭގެ ރަށްތަކުން ކަމާބެހޭ ފަރާތްތަކާއި ގުޅިގެން މައުލޫމާތު އެއްކުރަމުން، ޑޭޓާބޭސްއެއް ހެދުމުގެ މަސައްކަތް ކުރަމުންނެވެ. އެގޮތުން، "ސިޓިޒިން ޕޯޓަލް" އެއް ގާއިމްކޮށް، ބޭސް ހުރީ ކިހާވަރަކައްތޯ، ކޮންތާކުތޯ ބެލޭނެ ޑިޖިޓަލް ނިޒާމެއްވެސް ތައާރަފުކުރުމުގެ މަސައްކަތްކުރަމުން އަންނަ ކަމަށް ސްޓޭޓް ފާމާއިން ވަނީ ވިދާޅުވެފައެވެ. އެހެންކަމުން، ނޮވެމްބަރު މަހުގެ ނިޔަލަށް މި ޕޯޓަލް ލޯންޗް ކުރެވިގެންދާނެއެވެ.

ސަރުކާރުން ވަނީ، ސްވިޒަލޭންޑުގެ ރިޖިޓެކް ކުންފުންޔާ ގުޅިގެން 2023 ވަނަ އަހަރުވެސް ޑްރޯން ބޭނުންކޮށްގެން ބޭސް ރަށްރަށަށް ފޮނުވުމުގެ މަޝްރޫއުއެއް ލޯންޗްކޮށްފައެވެ. އެގޮތުން، 2023 ވަނަ އަހަރުގެ ސެޕްޓެމްބަރު މަހު ސަރުކާރުން ވަނީ، ހުވަދު އަތޮޅަށް ބޭސް ފޮނުވުމުގެ ގާބިލުކަން ލިބިފައިވާ ޑްރޯނެއް ތައާރަފުކޮށް، އޭގެ އިތުރު ޑްރޯންތައް ރާއްޖޭގެ އިތުރު ސަރަހައްދުތަކަށް ގެންނާނެ ކަމަށް ބުނެފައެވެ.