ދިގު ހަފްތާ ބަންދަށް އެޗްޑީސީން ލޯތްބާއެކު ދައުވަތެއް؛ ހުޅުމާލޭގައި ގިނަ ހަރަކާތްތަކެއް، ކެޑޭޓް ޕެރޭޑަކާއި ކާނިވަލެއް

ޖުމްހޫރީ ދުވަހުގެ މުނާސަބަތުގައި މި ނޮވެމްބަރު 11 ވާ ބުދަ ދުވަހަކީ ބަންދު ދުވަހެއްގެ ގޮތުގައި ހަމަޖެހިފައިވާއިރު، ނޮވެމްބަރު 12 ވާ ބުރާސްފަތި ދުވަސްވެސް ސަރުކާރުން ވަނީ ބަންދު ދުވަހެއްގެ ގޮތުގައި ހަމަޖައްސަވައިދެއްވާފަ އެވެ. މިއާއެކު، ބުދަ ދުވަހުން ފެށިގެން ހޮނިހިރު ދުވަހުގެ ނިޔަލަށް 4 ދުވަހުގެ ބޮޑު ޗުއްޓީއެއް މިވަނީ ލިބިފައެވެ. މިއީ ގޭގައި ތިބުމުގެ ބަދަލުގައި، އާއިލާއާއި ރައްޓެހިންނާއެކު ބޭރަށް ނުކުމެ، މި ދިގު ހަފްތާ ބަންދުގައި ހުޅުމާލޭގައި ރޭވިފައިވާ ގިނަ ހަރަކާތްތަކުގައި ބައިވެރިވެ، އުފާވެރި ވަގުތުކޮޅެއް ހޭދަކޮށްލަން ލިބޭ ފުރުސަތެކެވެ.

އެގޮތުން ހުޅުމާލޭގައި ގިނަ ހަރަކާތްތަކެއް ވަނީ އިންތިޒާމުކޮށްފަ އެވެ. މި ހަފްތާ ބަންދުގެ ހަރަކާތްތަކުގެ ތެރެއިން އެންމެ ފާހަގަކޮށްލެވެނީ، ޖުމްހޫރީ ދުވަހުގެ މުނާސަބަތުގައި މޯލްޑިވްސް ނޭޝަނަލް ކެޑޭޓް ކޯ (އެމްއެންސީސީ) އިން އިންތިޒާމުކުރާ ކެޑޭޓް ޕެރޭޑެވެ. މާލެ ސަރަޙައްދުގެ 16 ސުކޫލަކުން ގިނަ އަދަދެއްގެ ކެޑޭޓުން ބައިވެރިވާ މި ޕެރޭޑް، ހުޅުމާލެގެ ފޭސް 1 އަދި ފޭސް 2 ގައި ކުރިއަށްދާނެއެވެ. ނޮވެމްބަރު 11 ވާ ބުދަ ދުވަހުގެ ހަވީރު މި ޕެރޭޑް ފަށާނީ ހުޅުމާލޭ ފޭސް 1 ގެ ހުރަވީ ސްކޫލް ސަރަހައްދުންނެވެ. ކެޑޭޓުންގެ ހުނަރާއި ގައުމީ ލޯބި ރަމްޒުކޮށްދޭ މި ހިތްގައިމު ޕެރޭޑް ބައްލަވާލެއްވުމަށް އާއިލާއާއެކު ނުކުތުމަކީ ކުޑަކުދިންނަށްވެސް ލިބިގެންދާނެ ވަރަށް އުފާވެރި އަދި ޝައުގުވެރި ތަޖުރިބާއެކެވެ.

މި ޗުއްޓީ ދުވަސްވަރު ހުޅުމާލެ ސެންޓްރަލް ޕާކުގައި އޮންނާނެ އެންމެ ކުލަގަދަ އެއް ހަރަކާތަކީ ބޭންކް އޮފް މޯލްޑިވްސް (ބީއެމްއެލް) އިން އިންތިޒާމުކުރާ ކާނިވަލެވެ. ތަފާތު ހަރަކާތްތައް ހިމެނޭހެން މި ކާނިވަލް ކުރިއަށްދާނީ ނޮވެމްބަރު 11 އިން 13 އަށް، ކޮންމެ ދުވަހެއްގެ ހަވީރު 16:00 އިން ރޭގަނޑު 23:00 އަށް ސެންޓްރަލް ޕާކުގައެވެ. މި ކާނިވަލްގައި ތަފާތު ވައްތަރުގެ ކާބޯތަކެއްޗާއި ފުޑް ސްޓޯލްތަކުގެ އިތުރުން ލައިވް މުނިފޫހިފިލުވުމަށް ލައިވް މިއުޒިކްވެސް ފެނިގެންދާނެއެވެ. އަދި އެއާއެކު، ބީއެމްއެލްގެ ތަފާތު ހިދުމަތްތަކުގެ މައުލޫމާތުތައްވެސް މި ކާނިވަލްއިން ލިބޭނެއެވެ.

މި ހަރަކާތްތަކާއެކު، ކުރިއަށް މިއޮތް ހަތަރު ދުވަހުގެ ދިގު ޗުއްޓީއަކީ އާއިލީ ގުޅުންތައް ބަދަހިކޮށް، ކުދިންނަށް އުފާވެރި މާހައުލެއް ހޯދައިދިނުމަށް ލިބޭނެ އަގުހުރި ފުރުސަތެކެވެ. މި ހަފްތާ ބަންދަކީ ފޫހި ނުވާނެހާ ގިނަ ހަރަކާތްތައް ހުޅުމާލޭގައި ރާވާފައިވާ ހަތަރު ދުވަހެވެ. ސެންޓްރަލް ޕާކުގެ ހިތްގައިމު މާހައުލުގައި އާއިލާއާއެކު ވަގުތު ހޭދަކޮށް، ކެޑޭޓުންގެ ހިތްގައިމު ޕެރޭޑް ބައްލަވައި، އުފާވެރިކަމުގައި ބައިވެރިވުމަށް ހުޅުމާލޭގެ އެންމެހައި ރައްޔިތުންނަށާއި މާލެ ސަރަހައްދުގެ އެންމެހައި ފަރާތްތަކަށް އެޗްޑީސީން ލޯތްބާއެކު ވަނީ ދައުވަތު ދީފަ އެވެ.