ކުރިއަށް އޮތް ބަންދު ދުވަސްތަކުގައި ކަނޑު ދަތުރުކުރުމުގައި ސަމާލުވުމަށް ފުލުހުން އިލްތިމާސްކޮށްފި
ކުރިއަށް އޮތް ބަންދު ދުވަސްތަކުގައި ކަނޑުދަތުރުކުރުމުގައި ސަމާލުވުމަށް ފުލުހުން އިލްތިމާސްކޮށްފިއެވެ.
މޫސުމާބެހޭ ގައުމީ އިދާރާއިން ވަނީ ހުޅަނގު މޫސުމުގެ ބާރުގަދަވުމާއެކު ކުރިއަށް އޮތް 24 ގަޑިއިރު ރާއްޖޭގެ ބޮޑު ބަޔަކަށް ވިއްސާރަކޮށް، ގުގުރައި ކަނޑުގަދަވުމާއެކު ބައެއް ވަގުތުތަކުގައި ބޯކޮށް ވާރޭވެހޭނޭކަމަށް ލަފާކޮށްފައެވެ. މި ދުވަސްތަކަކީ ރާއްޖެއަށް މޫސުން ގޯސް ދުވަސްވަރެއްކަން ފާހަގަކުރަމުން ފުލުހުން ނެރުނު ބަޔާނެއްގައި ބުނެފައިވަނީ، ހާއްސަ ގޮތެއްގައި ކަނޑުދަތުރުކުރާ ފަރާތްތަކުން މޫސުމަށް ސަމާލުވުމަށް އެދިފައެވެ. އެގޮތުން މޫސުމާ ބެހޭ އެންމެ ފަހުގެ މައުލޫމާތު ބެލުމަށްފަހު ނޫނީ ކަނޑުމައްޗަށް ނޭރުމަށާއި، އުޅަނދުގައި ލައިފްޖެކެޓް ހުރިތޯ ކަށަވަރުކޮށް، މޫސުން ގޯސްނަމަ ކަނޑުމައްޗަށް ނޭރުމަށް ފުލުހުން ވަނީ އިލްތިމާސްކޮށްފައެވެ.
ފުލުހުން ވަނީ މޫސުން ގޯސްނަމަ އެއްގަމު ދަތުރުފަތުރުކުރާ ފަރާތްތަކުންވެސް އުޅަނދު ދުއްވުމުގައި ސަމާލުވުމަށް އިލްތިމާސްކޮށްފައެވެ. އެގޮތުން ވާރޭވެހޭއިރު ދުވެލިމަޑުކޮށް ދެ އުޅަނދު ދޭތެރޭ އެކަށީގެންވާ ދުރުމިނެއް ބަހައްޓައި ފެންބޮޑުވެފައިވާ މަގުތަކުގައި ހާއްސަ ސަމާލުކަމެއް ދީގެން ދުއްވުމަށް އިރުޝާދުދީފައެވެ.
މީގެ އިތުރުން، ފެންބޮޑުވާ ސަރަހައްދުތަކުގައި ދިރިއުޅޭ ފަރާތްތަކުން ފެންގަނޑުގައި ހުރެ ކަރަންޓު ސްވިޗްތަކާއި ވަޔަރުތަކުގައި އަތްނުލުމަށާއި، ވައިގަދަނަމަ ބެލްކަނީގައި ވަޔާ ދާގޮތަށް އެއްޗެހި ނުބެހެއްޓުމަށް އިލްތިމާސްކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
