ރަސްމާލޭގެ މާސްޓަރ ޕްލޭން ތައްޔާރުކުރުމަށް ކޮންސަލްޓެންސީ ހިދުމަތް ފޯރުކޮށްދޭނެ ފަރާތެއް ހޯދަނީ
ރަސްމާލެ ތަރައްގީކުރުމުގެ މަޝްރޫއުގެ ދަށުން، އެ ސަރަހައްދުގެ މާސްޓަރ ޕްލޭން ތައްޔާރުކުރުމަށް ބޭނުންވާ ކޮންސަލްޓެންސީ ހިދުމަތް ފޯރުކޮށްދޭނެ ފަރާތެއް ހޯދުމަށް ހައުސިންގ މިނިސްޓްރީއިން އިއުލާންކޮށްފިއެވެ.
މި މަސައްކަތަށް ޝައުގުވެރިވާ ފަރާތްތަކުން މަޝްރޫއާ ގުޅޭގޮތުން ތައްޔާރުކޮށްފައިވާ ޓާމްސް އޮފް ރެފަރެންސް (ޓީއޯއާރް) އާ އެއްގޮތަށް ޕްރޮޕޯޒަލް ހުށެހެޅުމުގެ ފުރުސަތު މިހާރު ވަނީ ހުޅުވާލާފައެވެ.
ޓީއޯއާރްގައި ބަޔާންކޮށްފައިވާ ގޮތުން، ހައުސިންގ މިނިސްޓްރީއިން ހޯދަނީ ތިމާވެށީގެ ދެމެހެއްޓެނިވިކަމާއި، އިގުތިސާދީ ވަރުގަދަކަމާއި، އިޖުތިމާއީ ޝާމިލުވުން ކަށަވަރުކޮށްދޭ، އަދި މޫސުމީ ނުރައްކާތަކަށް ތައްޔާރުވެފައިވާކަން ކަށަވަރުކޮށްދޭ މާސްޓަރ ޕްލޭނެކެވެ. މީގެ އިތުރުން، މާސްޓަރ ޕްލޭންގައި ރަށުގެ ހާލަތާ ގުޅޭގޮތުން، އިއާދަކުރަނިވި ހަކަތައާއި، ދެމެހެއްޓެނިވި އުމްރާނީ ވަސީލަތްތައް އެކުލެވޭ ތަރައްގީގެ ފްރޭމްވޯކެއް ކޮންސަލްޓެންސީގެ ހިދުމަތްދޭ ފަރާތުން ފޯރުކޮށްދޭންޖެހޭނެއެވެ.
މީގެއިތުރުން، މޫސުމީ ނާޒުކުކަމާ ގުޅޭގޮތުން ދިވެހިރާއްޖޭގެ ހާއްސަ ހާލަތްތަކަށް މި ޕްލޭނުގައި ރިއާޔަތްކުރަންވާނެއެވެ. އަދި މޫސުމަށް އަންނަ ބަދަލުތަކަށް ހޭނުމަށް (ކްލައިމެޓް އެޑަޕްޓޭޝަން) ބޭނުންވާ ކަންކަން ހިމަނަންވާނެއެވެ.
ދިވެހި ސަރުކާރުގެ ފަރާތުން މި މަޝްރޫއު ހިންގާ އެޖެންސީއެއްގެ ގޮތުގައި މަސައްކަތްކުރާނީ މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓެވެ. މަޝްރޫއު ހިންގާ އެޖެންސީގެ ހައިސިއްޔަތުން، މަޝްރޫއުގެ މުޅި މުއްދަތުގައި އެންމެހައި ކަމާގުޅޭ ފަރާތްތަކާއި ނަފާލިބޭ ފަރާތްތަކާއެކު ގުޅުންހުރި ކަންކަން ކޯޑިނޭޓްކުރުމުގެ މަސްއޫލިއްޔަތު ކުރިއަށްގެންދާނީ މިނިސްޓްރީންނެވެ.
ރަސްމާލެ މަޝްރޫއުއަކީ ރާއްޖޭގެ ބޯހިޔާވެހިކަމުގެ މައްސަލައަށ ހައްލެއް ހޯދައިދިނުމުގެ ގޮތުން ސަރުކާރުން ހިންގަމުންދާ މަޝްރޫއެކެވެ. އެގޮތުން، މި މަޝްރޫއުގެ ދަށުން ފުށިދިއްގަރުފަޅުން 1،009 ހެކްޓަރުގެ ބިން ހިއްކައި، އެތަނުގައި ރަސްމާލެ ރާއްޖޭގެ ފުރަތަމަ "އިކޯ-ސިޓީ" އެއްގެ ގޮތުގައި ތަރައްގީކުރުމަށް ސަރުކާރުން ވަނީ ނިންމާފައެވެ. މި މަޝްރޫއު ނިމުމުން ރާއްޖޭގެ ބޯހިޔާވެހިކަމުގެ މައްސަލައަށް ބޮޑު ލުޔެއް ލިބި، އިގުތިސާދީ ގޮތުންވެސް ރާއްޖެއަށް އެތަކެއް މަންފާއެއް ލިބިގެންދާނެ ކަމަށް ސަރުކާރުން ފާހަގަކުރެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
