ޤަވާޢިދާ ޚިލާފަށް އެޕާޓްމަންޓް ކުއްޔަށް ދޫކުރި 7 ފަރާތަކަށް އެފްޑީސީން ފިޔަވަޅު އަޅައިފި

ފަހިދިރިއުޅުން ކޯޕަރޭޝަން (އެފްޑީސީ) އިން ދޫކޮށްފައިވާ ސޯޝަލް ހައުސިންގ ޔުނިޓުތަކާ ގުޅޭ އުސޫލުތަކާ ޚިލާފަށް، ހުއްދަނެތި އެހެން މީހުންނަށް ތަންތަން ކުއްޔަށް ދޫކުރި ހަތް ފަރާތެއް ޖޫރިމަނާކޮށްފައިވާ ކަމަށް އެ ކޯޕަރޭޝަނުން ބުނެފިއެވެ.

އެފްޑީސީން އާންމުކުރި އެންމެ ފަހުގެ މައުލޫމާތުތަކަށް ބަލާއިރު، މި ހިނގާ ނޮވެމްބަރު މަހުގެ 5 ވަނަ ދުވަހާ ހަމައަށް، ޢިމާރާތްތަކުގެ ގަވާއިދާ ޚިލާފުވި 92 މައްސަލައެއް ވަނީ ފާހަގަކުރެވިފައެވެ. މީގެ ތެރޭގައި ހުއްދަނެތި ކުއްޔަށް ދިނުމުގެ 18 މައްސަލައެއް ހިމެނޭއިރު، ޖޫރިމަނާކުރި 7 ފަރާތުގެ އިތުރުން 2 ފަރާތަކަށް ވަނީ އިންޒާރު ދީފައެވެ. އަދި ބާކީ މައްސަލަތައް ތަޙުޤީޤު ކުރުމުގެ މަސައްކަތް ދަނީ ހިނގަމުންނެވެ.

އެ ކޯޕަރޭޝަނަށް އެންމެ ގިނައިން ރިޕޯޓުކޮށްފައިވަނީ ހުއްދަ ހޯދުމަކާ ނުލައި ފްލެޓްތަކަށް އެކި ކަހަލަ ބަދަލުތައް ގެނައުމުގެ މައްސަލަތަކެވެ. އެގޮތުން ފާހަގަވި 44 މައްސަލައިގެ ތެރެއިން 14 ފަރާތެއް ޖޫރިމަނާކޮށް، އެއް ފަރާތަކަށް ނޯޓިސް ފޮނުވާފައިވާއިރު، 29 މައްސަލައެއް އަދިވެސް ދަނީ ބަލަމުންނެވެ. މީގެ އިތުރުން، އާންމު ސަރަޙައްދުތަކަށް ގެއްލުން ދިނުމާއި، ކުނި އެޅުމުގެ ގަވާއިދުތަކާ ޚިލާފުވުމުގެ އިތުރުން، ކޯޕަރޭޝަނުގެ އެންގުންތަކަށް ބޯނުލެނބި ބައެއް ފަރާތްތަކަށްވެސް ވަނީ ފިޔަވަޅު އަޅައި އިންޒާރު ދީފައެވެ.

ފްލެޓްތަކުގެ ކުލި ދެއްކުމުގެ ހާލަތަށް ބަލާއިރު، މި މަހުގެ 4 ވަނަ ދުވަހާ ހަމައަށް 3،432 ޔުނިޓަކުން ގަވާއިދުން ފައިސާ ދައްކަމުންދާ ކަމަށް އެފްޑީސީން ބުނެއެވެ. މިއީ ކުރީގެ އަދަދުތަކާ އަޅާބަލާއިރު 12.2 އިންސައްތައިގެ ބޮޑު ކުރިއެރުމެކެވެ. މިއާއެކު، ކުލި ނުދައްކައި ހުރި ޔުނިޓުތަކުގެ އަދަދު މިހާރު ވަނީ 495 އަށް ތިރިކުރެވިފައެވެ.

އެފްޑީސީން ބުނީ، އެ ކުންފުނީގެ އެންމެ ބޮޑު މަޤްޞަދަކީ އެތަނުގައި ދިރިއުޅޭ ހުރިހާ ޢާއިލާތަކަކަށްވެސް އަމާން އަދި ރައްކާތެރި މާޙައުލެއް ޤާއިމުކޮށްދިނުން ކަމަށެވެ. އެހެންކަމުން، ޢިމާރާތްތަކުގެ ރައްކާތެރިކަމަށާއި މުޖުތަމަޢުގެ ލާބައަށްޓަކައި ހެދިފައިވާ އެންމެހައި ޤަވާޢިދުތަކަށް ފުރިހަމައަށް ބޯލަނބައި، އެއްބާރުލުން ދިނުމަށް އެ ކޯޕަރޭޝަނުން ވަނީ އެދިފައެވެ.